မဲခေါင်၊ ဇွန် ၁၉
ဒုတိယဗိုလ်ချုပ်ကြီး ရာပြည်ခေါင်းဆောင်သည့် စစ်ကောင်စီကိုယ်စားလှယ်အဖွဲ့-NSPNCနှင့် ဌာနချုပ်ပန်ဆန်းမြို့တွင် တွေ့ဆုံဆွေးနွေးခဲ့သည်ဟု “ဝ”တပ်ဖွဲ့-UWSA က ပြောသည်။
ထိုတွေ့ဆုံမှုအတွင်း ငြိမ်းချမ်းရေးနှင့် အပြန်အလှန်ယုံကြည်မှု တည်ဆောက်ရေးကိစ္စရပ်များကို ဆွေးနွေးကြသည်ဟု “ဝ”တပ်ဖွဲ့ ပြောရေးဆိုခွင့်ရှိသူတစ်ဦးဖြစ်သည့် ဦးညီရန်းက မဲခေါင်သို့ပြောသည်။
“ဟုတ်ပါတယ်။ ဒီ ၁၈ ရက်နေ့မှာ ကျွန်တော်တို့ ပန်ဆန်းဌာနချုပ်မှာ ဒုတိယဗိုလ်ချုပ်ကြီး ရာပြည့် ဦးဆောင်တဲ့ ကိုယ်စားလှယ်အဖွဲ့နဲ့တွေ့ဆုံတာမှန်ပါတယ်။ အဓိက ဆွေးနွေးတာကတော့ ငြိမ်းချမ်းရေးအတွက်ရယ်၊ ပြီးတော့ အပြန်အလှန် ယုံကြည်မှုတည်ဆောက်ရေးတွေပါပဲ” ဟု “ဝ”တပ်ဖွဲ့ – UWSA ပြင်ပဆက်ဆံရေးဌာန လားရှိုးရုံးတာဝန်ခံ ဦးညီရန်းက ပြောသည်။
“ဝ”ပြည်သွေးစည်းညီညွတ်ရေးတပ်မတော်-UWSA နှင့် စစ်ကောင်စီကိုယ်စားလှယ်-NSPNCတွေ့ဆုံမှုတွင် “ဝ”တပ်ဖွဲ့ဖက်က ဒုတိယဥက္ကဌ ကျောက်ကော်အန်း နှင့် ဒုတိယစစ်ဦးစီးချုပ် ပေါက်အိုက်ခမ်းတို့ ဦးဆောင်သည်ကို တွေ့ရပြီး စစ်ကောင်စီဘက်တွင် ဒုတိယဗိုလ်ချုပ်ကြီးရာပြည့်နှင့် အတွင်းရေးမှူး ဦးမင်းနိုင်တို့ဦးဆောင်သည်ကို တွေ့ရသည်။
တွေ့ဆုံဆွေးနွေးမှုအတွင်း “ဝ”တပ်ဖွဲ့ဘက်က နိုင်ငံရေးပြဿနာကို နိုင်ငံရေးနည်းလမ်းဖြင့်ဖြေရှင်းရန်၊ “ဝ”ပြည်နယ်သည် မြန်မာနိုင်ငံအစိတ်အပိုင်းဖြစ်ပြီး ပြည်ထောင်စုမပြိုကွဲရေးကို ထောက်ခံကြောင်း၊ ပုံမှန်ဆက်သွယ်ရေးလမ်းကြောင်းကို တည်ဆောက်ရေး စသည်တို့ကို ဆွေးနွေးသည်ဟုလည်း “ဝ”တပ်ဖွဲ့က ထုတ်ပြန်သည်။
စစ်ကောင်စီဘက်ကမူ နှစ်ဖက်ကြား ဆက်သွယ်ရေးစနစ်တည်ဆောက်ကာ ယုံကြည်မှု တိုးမြှင့်ရန် လိုအပ်ပြီး “ဝ”တပ်ဖွဲ့အနေဖြင့် စစ်ကောင်စီ၏ ငြိမ်းချမ်းရေးမူဝါဒနှင့်အညီ ဆက်လက်လျှောက်လှမ်းရန် မျှော်လင့်သည်ဟု ပြန်လည်ဆွေးနွေးခဲ့ကြောင်းလည်း ထုတ်ပြန်ချက်တွင်ဖော်ပြသည်။
စစ်ကောင်စီ ကိုယ်စားလှယ်အဖွဲ့သည် ဇွန်လ ၁၇ ရက်နေ့တွင် မိုင်းလားတပ်ဖွဲ့-NDAA နှင့် တွေ့ဆုံပြီးနောက် ဇွန်လ ၁၈ ရက်နေ့တွင် “ဝ”တပ်ဖွဲ့နှင့်ထပ်မံတွေ့ဆုံခြင်းဖြစ်သည်။
#MeKongNews
#ဝတပ်ဖွဲ့
#စစ်ကောင်စီ
#ပန်ဆန်း
#တွေ့ဆုံဆွေးနွေး
