မဲခေါင်၊ ဇွန် ၁၈
တောင်ကြီးမြို့နယ်၊ အေးသာယာနယ်မြေရဲစခန်းမှ စခန်းမှူး ရဲအုပ်စောဦးသည့် ၎င်း၏ အမျိုးသမီးမွေးနေ့ကို ဇွန်လ ၁၅ရက် ညပိုင်းက KTV တစ်ခုတွင် ကျင်းပခဲ့ပြီး မွေးနေ့လက်ဆောင်အဖြစ် ကျပ်သိန်း ဆယ်နှင့်ချီပါသည့် ပန်းစည်းပေးကာ စပရိုက်တိုက်ခဲ့ကြောင်း ရဲတပ်ဖွဲ့နှင့် နီးစပ်သည့် သတင်းရင်းမြစ်များထံမှ သိရသည်။
ယင်းစခန်းမှူး ရဲအုပ်စောဦးသည် အေးသာယာတွင် စခန်းမှူးအဖြစ် လုပ်ကိုင်နေသည်မှာ ၄နှစ်ကျော်ကြာပြီဖြစ်ပြီး ၎င်းလက်ထက်အတွင်း အေးသာယာမြို့၌ တရားမဝင်လုပ်ငန်းများ အများအပြား ကြီးထွားခဲ့ကြောင်း၊ ယင်းလုပ်ငန်းများမှ ရသည့် လာဘ်ငွေများဖြင့် ပြည်နယ်ရဲချုပ် ရဲမှူးချုပ် ကျော်ကျော်ဟန်ကို ဂါရဝကြေး လုံလောက်အောင်ပေးနိုင်သည့်အတွက် မပြောင်းရွှေ့ရခြင်းဖြစ်ကြောင်း အေးသာယာရဲစခန်းနှင့်နီးစပ်သူ တစ်ဦးက ပြောသည်။
“အခုက စပရိုက်တိုက်တာတွေက ခေတ်စားနေတာ။ ဟိုနေ့ကမှ ဟိုပုံးမြို့နယ်အုပ်ချုပ်ရေးမှူးဖြစ်ထားသေးတာကို ဂရုမစိုက်ဘူး ထပ်လုပ်တာပဲ။ သဘောကတော့ ဂရုမစိုက်ဘူးဆိုတဲ့သဘောပေ့ါဗျာ။ အေးသာယာမှာ ရောက်နေတာ ၄နှစ်ရှိပြီ။ ပြည်နယ် CP (ရဲချုပ်) ကို အိပ်ထဲထည့်ထားနိုင်တော့ ကျန်တာ ဘာမှ ဂရုမစိုက်ဘူးဆိုတဲ့သဘောပေါ့” ဟု ၎င်းက ပြောသည်။
တောင်ကြီးမြို့နယ်အတွင်းရှိ အေးသာယာမြို့မှာ ပြည့်တန်ဆာခန်းများအပါအဝင် တရားမဝင်လုပ်ငန်းများ အများအပြားရှိနေပြီး ပြီးခဲ့သည့် ရက်ပိုင်းအတွင်းကပင် အသက်မပြည်သေးသည့် အမျိုးသမီးငယ် ၂ဦးကို ပြည့်တန်ဆာခန်းတွင် ရောင်းစားသည့် ကိစ္စ ဖြစ်ပွားခဲ့သေးသည်။
“အေးသာယာစခန်းမှူးက ရေခိုင်တယ်ဗျ။ ဇလဲဘက်က မှောင်ခိုင်သစ်တွေ ဝင်တာလဲရတယ်။ ဖာဘိ၊ မူးယစ်ဆေး အကုန်ရှိနေတော့ ဝင်ငွေကောင်းတယ်။ လုပ်သမျှ တင့်တယ်တာပေါ့” ဟု ဒေသခံတစ်ဦးကလည်း ပြောသည်။
အေးသာယာနယ်မြေ ရဲစခန်းသည် တောင်ကြီးမြို့နယ်၏ စက်မှုဇုန်နယ်မြေနှင့် အဓိကကုန်သွယ်ရေး လမ်းကြောင်းပေါ်တွင် တည်ရှိသဖြင့် စစ်ကောင်စီလက်အောက်ခံ ရဲတပ်ဖွဲ့ဝင်အချို့ လုပ်ပိုင်ခွင့်အာဏာအသုံးချကာ ကိုယ်ကျိုးရှာမှု အများဆုံးဖြစ်ပွားရာ နေရာတစ်ခုအဖြစ် ဒေသတွင်း နာမည်ဆိုးဖြင့် ကျော်ကြားနေသည့် စခန်းတစ်ခု ဖြစ်သည်။
ပြီးခဲ့သည့် ကာလများအတွင်းကလည်း အေးသာယာရဲစခန်းမှ စခန်းမှူးနှင့် နယ်ထိန်းအဖွဲ့များသည် စက်မှုဇုန်အတွင်းရှိ စီးပွားရေးလုပ်ငန်းရှင်များ၊ တရားမဝင် လောင်းကစားဒိုင်များနှင့် မှောင်ခိုကုန်သည်များထံမှ လစဉ်လိုင်းကြေးငွေများ ကောက်ခံခဲ့သည့်အပြင် အရပ်သားပြည်သူများကို အကြောင်းအမျိုးမျိုးပြ၍ မတရားဖမ်းဆီးကာ ငွေကျပ်သိန်းဆယ်ချီ၊ ရာချီဖြင့် ပြန်ပေးဆွဲသကဲ့သို့ ငွေညှစ်လွှတ်ပေးခဲ့သည့် ဖြစ်စဉ်များကြောင့် မိဘပြည်သူများအကြား ပြင်းထန်စွာ ဝေဖန်ခံခဲ့ရဖူးသည်။
#MeKongNews
#အေးသာယာ
#တောင်ကြီးမြို့နယ်
#ရဲအုပ်စောဦး
#မွေးနေ့လက်ဆောင်
