မဲခေါင်၊ ဇွန် ၁၆
အချုပ်ကျနေသူနှင့် အကျဉ်းသား ၃၅၀ ဦးကို ဇွန် ၃၀ ရက်တွင် ကျရောက်မည့် ငြိမ်းချမ်းရေး ၃၇ နှစ်ပြည့် အထိမ်းအမှတ်အဖြစ် လွတ်ငြိမ်းချမ်းသာခွင့်ပေးလိုက်သည်ဟု မိုင်းလားအဖွဲ့ – NDAA က ယမန်နေ့တွင် သတင်းထုတ်ပြန်သည်။
ယခုလွတ်ငြိမ်းချမ်းသာခွင့် ပေးလိုက်သည့်သူများသည် စည်းကမ်းလိုက်နာပြီး ပြင်ဆင်လိုစိတ်ရှိသော လွတ်သင့်လွတ်ထိုက်သူများ ဖြစ်ပြီး လူသားချင်းစာနာထောက်ထားမှုအရ လွှတ်ပေးခြင်းဖြစ်သည်ဟု မိုင်းလားအဖွဲ့က ဆိုသည်။
မိုင်းလားတပ်ဖွဲ့ – NDAA သည် ဗမာပြည်ကွန်မြူနစ်ပါတီမှ ခွဲထွက်ပြီးနောက် ၁၉၈၉ ခုနှစ် ဇွန် ၃၀ ရက်တွင် စစ်အစိုးရနှင့် ငြိမ်းချမ်းရေးယူခဲ့ခြင်းဖြစ်သည်။
ငြိမ်းချမ်းရေးယူပြီးနောက် ရှမ်းပြည်အရှေ့ပိုင်းရှိ မိုင်းလား၊ ဆီလူးနှင့် နမ့်ပန်းဒေသကို ထိန်းချုပ်ခွင့်ရကာ ရှမ်းပြည်နယ် အထူးဒေသ ၄ အဖြစ် စစ်အစိုးရက သတ်မှတ်ပေးခဲ့သည်။
NDAA သည် စစ်ကောင်စီ အာဏာသိမ်းပြီးနောက်တွင်လည်း စစ်ကောင်စီနှင့် ပုံမှန်တွေ့ဆုံ ဆွေးနွေးနေသည့်အဖွဲ့ဖြစ်ပြီး လာမည့်ရက်ပိုင်းတွင် ဒုတိယဗိုလ်ချုပ်ကြီးရာပြည့် ခေါင်းဆောင်သည့် စစ်ကောင်စီကိုယ်စားလှယ်အဖွဲ့နှင့် မိုင်းလားတွင် ထပ်မံ တွေ့ဆုံဆွေးနွေးသွားမည်ဟု NDAA ပြောရေးဆိုခွင့်ရှိသူ ဦးကြည်မြင့်က မီဒီယာများကို ဖြေကြားထားသည်။
#MeKongNews
#အကျဉ်းသား ၃၅၀
#NDAA
#လွတ်ငြိမ်းခွင့်ပေး
#မိုင်းလား
