မဲခေါင်၊ ဇွန် ၄

ရွှေတြိဂံဒေသ မဲခေါင်မြစ်ကမ်းမှ ဝင်ရောက်လာသည့် မှောင်ခိုကုန်စည်သယ်ကားများထံမှ ဦးကျော်ဝင်းဦးဆောင်သည့် ကော်မယ်
လိတ်ပြည်သူ့စစ်က ဂိတ်ဖွင့်ကာ ငွေကောက်နေကြောင်း ဒေသခံများက မဲခေါင်သို့ ပြောသည်။

မှောင်ခိုကုန်စည်သယ်ကားများမှာ မယ်ယန်းဂိတ်မှ ဖြတ်သန်းခွင့်မရတော့သည့် နောက်ပိုင်း ဝှေလေလန်-မိုင်းကိုး ကျေးရွာချင်းဆက်လမ်းကိုအသုံးပြုကာ သွားလာနေခြင်းဖြစ်ပြီး ဦးကျော်ဝင် ဦးဆောင်သည့် ကော်မယ်လိတ်ပြည်သူ့စစ်က ယင်းလမ်းပေါ်တွင် ဂိတ်ဖွင့်ကာ ကားတစ်စီးလျှင် ဘတ် ၅၀၀မှ ဘတ် ၂၀၀၀ အထိ ကောက်ခံနေခြင်းဖြစ်ကြောင်း ဒေသခံတစ်ဦးက ပြောသည်။

“မယ်ယန်းဂိတ်က ဆီပြသနာတွေဖြစ်တဲ့ကာလတဝိုက်မှာ ဖြတ်သန်းခွင့်ပိတ်လိုက်တာ။ အဲဒီတော့ ကျေးရွာချင်းဆက်လမ်းကို သုံးပြီးတော့ သွားနေကြတာ” ဟု ၎င်းက ပြောသည်။

မှောင်ခိုကားများမှာ တာချီလိတ်မြို့နယ်အတွင်းရှိ မဲခေါင်မြစ်ဆိပ်ဖြစ်သည့် ဝမ်ပုံကျေးရွာ အနီးတဝိုက်သို့ ဝင်ရောက်လာသည့် ထိုင်းနှင့် တရုတ်ကုန်စည်များကို တင်ဆောင်လာခြင်းဖြစ်ပြီး တာချီလိတ်မှ တဆင့် ရှမ်းအရှေ့နှင့် မြန်မာပြည်အနှံ့သို့ ပြန်လည်တင်ပို့ခြင်းဖြစ်သည်။

လက်ရှိ ကုန်စည်များသွားလာရန် အသုံးပြုနေသည့် ဝှေလေလန်-မိုင်းကိုးလမ်းမှာ ကျေးရွာချင်းဆက်လမ်းသာဖြစ်ပြီး ကုန်စည်တင်ဆောင်သည့်လမ်းမဟုတ်သည့်အတွက် လမ်းပျက်စီးမည်ကိုလည်း စိုးရိမ်ကြောင်း ဒေသခံများက ပြောသည်။

တာချီလိတ်မြို့နယ်အတွင်း ပြည်သူ့စစ်အဖွဲ့ ၅၀ကျော်ရှိပြီး အားလုံးနီးပါးမှာ မှောင်ခိုလုပ်ငန်းများနှင့် တရားမဝင်လုပ်ငန်းများတွင် ပါဝင်ပတ်သက်နေကြောင်း ဒေသခံများထံမှ သိရသည်။

#MeKongNews
#ဝှေလေလန်
#မိုင်းကိုး
#ကော်မယ်လိတ်ပြည်သူ့စစ်
#ဦးကျော်ဝင်း

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)