မဲခေါင်၊ မေ ၂၄
ရှမ်းပြည်တောင်ပိုင်း၊ ဆီဆိုင်မြို့နယ်၊ ပင်ညိုးကျေးရွာတွင် ဆက်ကြေး အပြည့်မထည့်နိုင်ဟုဆိုကာ စစ်ကောင်စီ လက်အောက်ခံ PNO ပြည်သူ့စစ်က ပြည်သူ ၃ ဦးကို ဖမ်းဆီးကာ ရိုက်နှက်နှိပ်စက်ခဲ့သဖြင့် ပြည်သူတစ်ဦး ဒဏ်ရာပြင်းထန်ပြီး လက်တစ်ဖက် ဖြတ်ထုတ်လိုက်ရသည်ဟု ဒေသခံ သတင်းရင်းမြစ်များထံမှ သိရသည်။
ဆက်ကြေးအကြွေး တစ်သိန်းကျန်သည်ဟုဆိုကာ PNO က ဒေသခံ ၃ ဦးကို ဖမ်းဆီးသွားခြင်းဖြစ်ပြီး တဦးကို ၄ သိန်းကျပ်ဖြင့် ပြန်ရွေးခိုင်းရာ ၂ ဦးကိုသာ ပြန်ရွေးနိုင်ပြီး ပြန်မရွေးနိုင်သည့် တစ်ဦးကိုမူ PNO ပြည်သူ့စစ်က အလွန်အကျွံရို က်နှက်နှိပ်စက်ခဲ့သည်။
“၂ ဦးကတော့ အမျိုးတွေက ငွေစုပြီး လိုက်ရွေးပေးလို့ ပြန်လွတ်လာတယ်။ သိပ်ပြီးတော့ နှိပ်စက်မခံရဘူး။ ကျန်တဲ့တစ်ဦးကတော့ ပြန်မရွေးနိုင်လို့ ပိုပြီး ရိုက်နှက်နှိပ်စက်ခံရတယ်။ တစ်ကိုယ်လုံး ဒဏ်ရာတွေကြီးပဲ။ သူ့လက်တွေဆို လောက်တွေပါ တက်လို့ ဆေးရုံသွားပြတာ ကုမရတော့ဘူးဆိုပြီး လက်တစ်ဖက် ဖြတ်လိုက်ရတယ်”ဟု ဖြစ်စဉ်ကို သိရှိသည့် ဒေသခံတစ်ဦးက ပြောသည်။
PNO ရိုက်နှက်နှိပ်စက်မှုကြောင့် လက်တစ်ဖက် ဖြတ်လိုက်ရသည့် ဒေသခံမှာ ဦးခွန်မောင်လွန်းဆိုသူ ဖြစ်ပြီး လက်လုပ်လက်စားအဖြစ် နေ့စားလိုက်ကာ ဝမ်းရေး ဖြေရှင်းနေရသူဖြစ်ကြောင်း သတင်းရင်းမြစ်များထံမှ သိရသည်။
ဦးခွန်မောင်လွန်းကို ရိုက်နှက်နှိပ်စက်သည့် PNO တပ်ဖွဲ့ဝင်များမှာ တယံကျေးရွာအုပ်စု အုပ်ချုပ်ရေးမှူး ခွန်ထွက်မောင်၊ ဗိုလ်ကြီးငဲတုတ်၊ ဗိုလ်ကြီးခွန်မြတ် ဆိုသူများဖြစ်ကြောင်း စုံစမ်းသိရှိရသည်။
လက်ရှိတွင် ဦးခွန်မောင်လွန်းမှာ ဒဏ်ရာကြောင့် နေ့စား မလိုက်နိုင်တော့သဖြင့် စားဝတ်နေရေးသာမက ဆေးကုသရေးအတွက်ပါ အကူအညီ လိုအပ်နေသည်။
စစ်ကောင်စီ လက်အောက်ခံ PNO ပြည်သူ့စစ်သည် ယခင်က တော်လှန်ရေးတပ်ဖွဲ့ ဖြစ်ဖူးသော်လည်း ၂၀၀၉ ခုနှစ်မှ စတင်ကာ စစ်တပ်လက်အောက်ခံ ပြည်သူ့စစ်အဖြစ်ပြောင်းလဲဖွဲ့စည်းခဲ့သည်။
ထို့အချိန်မှစ၍ PNO ပြည်သူ့စစ်၏ နိုင်ငံရေးနှင့် စစ်ရေးကော်မတီ ဥက္ကဌအဖြစ် ဦးအောင်ခမ်းထီက တာဝန်ယူကာ စစ်တပ်နှင့်အတူ တော်လှန်ရေးတပ်ဖွဲ့များကို တိုက်ခိုက်ခဲ့သည်။
#MeKongNews
#ဆက်ကြေး
#ပြည်သူများ
#PNO
#ဖမ်းဆီးနှိပ်စက်
#လက်ဖြတ်
