မဲခေါင်၊ မေ ၂၄

ရှမ်းပြည်မြောက်ပိုင်း၊ TNLA ထိန်းချုပ်၊ တအာင်းဒေသ၊ နမ့်ဆန်မြို့နယ်၊ ကျောက်ဖြူလေးကျေးရွာမှ အမျိုးသမီးငယ်တစ်ဦး မူဆယ်ကို အလုပ်သွားလုပ်ရာမှ ပျောက်ဆုံးနေသည်မှာ ၂ လနီးပါးရှိနေပြီဖြစ်ကြောင်း မိသားစုနှင့် နီးစပ်သူများထံမှ သိရသည်။

ယင်းအမျိုးသမီးငယ်၏ အမည်မှာ မိုမိုးအေးဖြစ်ပြီး မိဘအမည်များမှာ ဦးအိုက်ပန်နဲ့ ဒေါ်အေးမဲ့တို့ဖြစ်ကြောင်း သိရသည်။

“မူဆယ်မှာ ရှာနေတာတော့ သတင်းမရဘူး။ ဟိုဘက်ရောက်သွားရင်တော့ ကောင်မလေးကိုယ်တိုင်က ဆက်သွယ်လာမှဖြစ်မှာ။ မိဘကလည်းမလွှတ်သင့်ဘူး”ဟု မူဆယ်လူမှုကူညီသူတစ်ဦးက ​ပြောသည်။

၎င်းအမျိုးသမီးငယ်မှာ ပြီးခဲ့သည့် ဧပြီလက မူဆယ်ရှိ ဂိမ်းဆိုင်တစ်ခုတွင် အလုပ်လုပ်မည်ဆိုကာ သွားရောက်ရာမှ ယခုအထိ အဆက်အသွယ် မရတော့ဟု သိရသည်။

ပြီးခဲ့သည့် မေ ၅ ရက်က မူဆယ်တွင် အထည်ချုပ်လုပ်ငန်း လစာကောင်းသည်ဆိုကာ လာရောက်သည့် လပွတ္တာမှ အသက် ၁၇ နှစ်အရွယ် အမျိုးသမီးငယ်တစ်ဦးကိုလည်း မိဘများကိုယ်တိုင် စစ်ကောင်စီ လူကုန်ကူးမှုတားဆီးရေး ရဲတပ်ဖွဲ့ အကူအညီဖြင့် လာရောက် ရှာဖွေသော်လည်း ယခုထိ မတွေ့သေးကြောင်း သိရသည်။

မူဆယ်ရှိ လူမှုရေးအသင်းများကမူ လူကုန်ကူးမှုဖြစ်စဥ်များ တွေ့ကြုံရမှု များပြားလွန်းသဖြင့်အမျိုး သမီးငယ်များ လာရောက်ခြင်းမပြုရန် အကြံပြုလျက်ရှိသည်။

#MeKongNews
#နမ့်ဆန်
#အမျိုးသမီးငယ်
#မူဆယ်
#ပျောက်ဆုံး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)