မဲခေါင်၊ မေ ၇

ရှမ်းပြည်အရှေ့ပိုင်းတွင် မေလဆန်းပိုင်း၌ စက်သုံးဆီစျေး အနည်းငယ်သာ ကျဆင်းသဖြင့် ယာဥ်စီးခများမှာလည်း အမြင့်စျေးဖြင့်သာ တည်ရှိနေဆဲဖြစ်ကြောင်း ခရီးသွားလုပ်ငန်းများထံမှ သိရသည်။

လက်ရှိအချိန်အထိ ရှမ်းအရှေ့ မြို့အချို့၏ စက်သုံးဆီစျေးနှုန်းများမှာ တာချီလိတ်တွင် ဓာတ်ဆီတစ်လီတာလျှင် ပန့်ဆီစျေးနှုန်း ၄၆ ဘတ်၊ ဒီဇယ် ၆၅ ဘတ်၊ ပြင်ပစျေး ဓာတ်ဆီ ၇၀ ဘတ်၊ ဒီဇယ် ၁၀၀ ဘတ်တို့ ရှိနေကြောင်း သိရသည်။

မိုင်းတုံ၊ မိုင်းဆတ်တွင် ပန့်ဆီဆိုင်စျေးနှင့် ပြင်ပစျေးမှာ အတူတူဖြစ်ပြီး ဓာတ်ဆီတစ်လီတာ ၈ ထောင် ကျပ်၊ ဒီဇယ် တစ်သောင်းကျပ်တို့ ဖြစ်သည်။

ကျိုင်းတုံတွင် စက်သုံးဆီကို မြန်မာဆီ၊ ထိုင်းဆီ စသဖြင့် ခွဲခြား ရောင်းချနေကြသော်လည်း ထိုင်းဆီကိုသာ အများဆုံး အသုံးပြုကြရာ ဓာတ်ဆီ တစ်လီတာလျှင် ၆၄၀၀ ကျပ်၊ ဒီဇယ်တစ်လီတာ ၈ ထောင်ကျပ်တို့ ဖြစ်ကြောင်း သိရသည်။

ပြီးခဲ့သည့်လအတွင်းက ပျမ်းမျှ ဓာတ်ဆီ တစ်လီတာ ၁၀၀၀၀ ကျပ်၊ ဒီဇယ်ဆီ ၁၀၇၀၀ အထိ ရှိခဲ့ရာ ယခုတွင် ကျဆင်းလာခဲ့ခြင်း ဖြစ်သည်။

မိုင်းလားတွင် တရုတ်ဓာတ်ဆီ တစ်လီတာ ၆ ဒသမ ၇ ယွမ်ရှိပြီး ကျိုင်းတုံသို့ ယာဥ်စီးခ လူတစ်ဦး ယွမ် ၁၅၀ ဖြစ်ကြောင်း သိရသည်။

ရှမ်းအရှေ့၊ တာချီလိတ်၊ မိုင်းဆတ်၊ မိုင်းဖြတ်၊ မိုင်းတုံ၊ ကျိုင်းတုံ မြို့များတွင် ထိုင်းနိုင်ငံဘက်မှ စက်သုံးဆီကို အဓိက အမှီပြု သုံးစွဲရပြီး မိုင်းလား၊ မိုင်းယောင်းနှင့် မိုင်းယန်းမြို့များတွင် တရုတ်နိုင်ငံဘက်မှ ဆီများကို အမှီပြုရကာ မိုင်းပျဥ်းမှာမူ ထိုင်းဆီနှင့် မြန်မာပြည်တွင်းမှ ဆီများကို သုံးစွဲကြကြောင်း လေ့လာ သိရှိရသည်။

နိုင်ငံတကာ ဆီအကျပ်အတည်း မဖြစ်မီက တောင်ကြီး – မိုင်းဆတ်၊ တောင်ကြီး – နားကောင်းမူးမှာ ယာဥ်ငယ်ရှေ့ခန်း ကျပ်တစ်သိန်း၊ နောက်ခန်း ၈ သောင်းသာ ရှိခဲ့ရာ ယခုမူ ရှေ့ခန်း ကျပ်၂ သိန်းခွဲ၊ နောက်ခန်း ၂ သိန်းတို့ဖြစ်ကြောင်း သိရသည်။

ယခင် နားကောင်းမူး – တာချီလိတ်မှာ ဘတ် ၈၀၀ သာ ရှိသော်လည်း ယခု ဘတ် ၁၂၀၀ ရှိနေသည်။

တာချီလိတ် – ကျိုင်းတုံ Express နှုန်းထားမှာ ယခင် ဘတ် ၂၆၀ သာ ရှိသော်လည်း ယခု ဘတ် ၃၆၀ မှ ပြန်မကျသေးပေ။

တာချီလိတ် – ရန်ကုန်၊ တာချီလိတ် – မန္တလေး Express ယာဥ်စီးခမှာ ကျပ် ၂ သိန်းဟု GI group က ကြေညာထားကြောင်း သိရသည်။

#MeKongNews
#ရှမ်းအရှေ့
#စက်သုံးဆီစျေး
#ယာဥ်စီးခ
#မြင့်တက်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)