မဲခေါင်၊ မေ ၂
ရှမ်းပြည်မြောက်ပိုင်း၊ ကွတ်ခိုင်မြို့နယ်၊ ခိုတင်ကျေးရွာတွင် လက်နက်ကြီးကျည်တစ်လုံး ပေါက်ကွဲပြီး လူငယ် ၂ ဦး သေဆုံးသည်ဟု ဒေသခံ သတင်းရင်းမြစ်များထံမှ သိရသည်။
ယမန်နေ့ မေ ၁ ရက် နံနက် ၁၀ နာရီအချိန်အတွင် ယင်းပေါက်ကွဲမှု ဖြစ်ပွားခဲ့ခြင်းဖြစ်ပြီး ပေါက်ကွဲမှုအတွင်း အသက် ၁၈ နှစ်အရွယ် မိုင်းအိုက်မောက်နှင့် အသက် ၂၂နှစ်အရွယ် မိုင်းအိုက်လဝ ဆိုသူ ၂ ဦးသည် အခင်းဖြစ်ပွားသည့် နေရာတွင်ပင် သေဆုံးသွားခြင်း ဖြစ်သည်။
“သူတို့က ရွာပြင်မှာ လက်နက်ကြီးကျည်တွေ့လို့ ကောက်လာတာတဲ့၊ အဲ့ဒါအိမ်ထဲရောက်တော့ ကိုင်ကြည့်ရင်းနဲ့ အိမ်ထဲမှာပဲ ကွဲသွားတာ၊ ၂ယောက်လုံး သေသွားတယ်။ အိမ်လည်း ပျက်သွားတယ်”ဟု ဖြစ်စဉ်ကို သိရှိသည့် ဒေသခံတစ်ဦးက ပြောသည်။
ယင်းလက်နက်ကြီးသည် ၈၀ မမအမျိုးအစား မပေါက်ကွဲသေးသည့် လက်နက်ကြီး အမျိုးအစား ဖြစ်ပြီး ကျေးရွာအပြင်ဘက်မှ ကောက်ယူလာခဲ့ခြင်း ဖြစ်သည်ဟု TNLA ပြန်ကြားရေးက ဆိုသည်။
အခြားသတင်းအရင်းအမြစ်အရ သေဆုံးသူမိုင်းအိုက်လဝ၏ အိမ်အတွင်း မပေါက်ကွဲသေးသည့် လက်နက်ကြီးကျည်များ ထပ်မံတွေ့ရှိသဖြင့် MNDAA တပ်ဖွဲ့မှ ရှင်းလင်းခဲ့ကြောင်း သိရသည်။
သေဆုံးသွားသည့် လူငယ် အမျိုးသား ၂ ဦး၏ ရုပ်အလောင်းများကိုမူ ဒေသခံပြည်သူများမှ ဝိုင်းဝန်းကူညီကာ မီးသင်္ဂြိုဟ်ပေးခဲ့သည်။
ဧပြီ ၃၀ ရက်တွင်လည်း လားရှိုးမြို့နယ<် နမ့်ဗေဒါကျေးရွာအနီးတွင် တိုက်ပွဲကျန် လက်ပစ်ဗုံးတလုံးကို တွေ့ရှိ့ဆော့ကစားရာမှ ပေါက်ကွဲမှုဖြစ်ပွားပြီး အသက် ၇ နှစ်အရွယ် ကလေးငယ်တစ်ဦး သေဆုံးခဲ့သေးသည်။
တိုက်ပွဲများဖြစ်ပွားခဲ့သည့် ဒေသများနှင့် ကျေး ရွာအနီးပတ်ဝန်းကျင်များတွင် မပေါက်ကွဲသေးသော စစ်လက်ကျန်ပစ္စည်းများ ကျန်ရှိနေတတ်သဖြင့် ပြည်သူလူထုများအနေဖြင့် တွေ့ရှိပါက မိမိတို့သဘောဖြင့် ကောက်ယူကိုင်တွယ်ခြင်း၊ နေအိမ်သို့ သယ်ဆောင်လာခြင်းနှင့် စမ်းသပ်ဆော့ကစားခြင်းများ လုံးဝမပြုလုပ်ကြရန် အထူးသတိပြုရန် လိုအပ်သည်။
ယင်းပစ္စည်းများ တွေ့ရှိပါက နီးစပ်ရာ တာဝန်ရှိသူများထံ ချက်ချင်း သတင်းပေးအကြောင်းကြား၍ စနစ်တကျ ဖယ်ရှား ရှင်းလင်းနိုင်ရေးအတွက် ပူးပေါင်းဆောင်ရွက်ကြရန် PSLF/TNLA သတင်းနှင့်ပြန်ကြာရေးဌာနက တိုက်တွန်းထားသည်။
#MeKongNews
#ကွတ်ခိုင်
#လက်နက်ကြီးကျည်
#ပေါက်ကွဲ
#သေဆုံး
