မဲခေါင်၊ မေ ၁
ရှမ်းပြည်အရှေ့ပိုင်း၊ ကျိုင်းတုံမြို့တွင် ပြည်သူများ၏ ပိုက်ဆံအိတ်နှင့် ဖုန်းများကို လုယက်မှု ဆက် တိုက် ဖြစ်ပေါ်နေကြောင်း ဒေသခံများထံမှ သိရသည်။
ယမန်နေ့ ဧပြီ ၃၀ ရက်၊ နံနက် ၁၁ နာရီခန့်တွင် ကျိုင်းတုံမြို့၊ ရပ်ကွက် (၃)၊ မြို့သစ်ရပ်ရှိ ချယ်ရီအလှပြင်ဆိုင်အတွင်းသို့ ဆိုင်ကယ်နှင့်.ရောက်လာသူ အမျိုးသား၂ ဦးက ဆိုင်ရှိအမျိုးသမီး၂ ဦးထံမှ ဖုန်းများကို အကြမ်းဖက် လုယက်ယူဆောင်သွားကြောင်း ဆိုင်နှင့် နီးစပ်သူများထံမှ သိရသည်။
“ဆိုင်ကလူတွေ အလှူသွားနေတာ။ ဆိုင်မှာ အမျိုး သမီး၂ ယောက်ပဲရှိတဲ့အချိန် ဆိုင်ထဲဝင်လာပြီး အကြမ်းဖက် လုပြေးတာ၊ CCTV ပြန်ကြည့်တော့ သင်္ကြန်ရှေ့က အိမ်ဆိုင်အတွင်း ဆိုင်ကယ်ဝင်ခိုးသွားတဲ့ ၂ ယောက်နဲ့ အတူတူပဲ။ လုခံရသူတွေကတော့ ကြောက်ပြီး ငိုနေကြတယ်။ ရဲတော့တိုင်ထားတယ် ပြောတယ်”ဟု နီးစပ်သူတစ်ဦးက ပြောသည်။
အကြမ်းဖက် လုယက်ခံရသဖြင့် ပါသွားသည့် ဖုန်းများမှာ iPhone 16 ပန်းရောင်နှင့် iPhone 13 နက်ပြာရောင် တစ်လုံးတို့ဖြစ်ကြပြီး၂ လုံးပေါင်းတန်ဖိုး ကျပ်သိန်း ၅၀ ခန့် ရှိမည်ဖြစ်ကာ ဖုန်းပေါင်ခြင်း၊ Lock လာဖြည်ခြင်း၊ ဖုန်းလာရောင်းခြင်းများရှိပါက အကြောင်းကြားပေးကြပါရန် ပိုင်ရှင်များက မေတ္တာရပ်ခံထားသည်။
သင်္ကြန်မတိုင်မီ ခိုးခံရသူ ဆိုင်ကယ်မှာ လိုင်စင်ပါ အနီနှင့်အရောင် 125i ဖြစ်ပြီး ကျပ်သိန်း ၅၀ ကျော်တန်သည်ဟု ဆိုသည်။
“သူခိုးတွေက တစ်ရက်တစ်ခါ ခုလို သိန်း ၅၀ လောက်ရနေတာ။ အဖမ်းမခံရတာတွေကြောင့်ကောင်းတာ လုပ်မစားတော့ဘူး။ ခိုးရရင်ရ မရရင်လုတာ အကြမ်းဖက်တာ အသက်ရန်ရှာတာတွေ လုပ်လာကြတာ”ဟု ကျိုင်းတုံ ဒေသခံတစ်ဦးက ပြောသည်။
ထို့အတူ ယမန်နေ့ ည ၆ နာရီခွဲတွင်လည်း ကျိုင်းတုံမြို့၊ စွန်တောင်းကုန်း အတက်နားတွင် ဆိုင်ကယ်စီးလာသူ အမျိုးသမီး ၂ ဦးကို အမျိုးသား၂ ဦးက ဆိုင်ကယ်ကို ခြေထောက်ဖြင့်ကန်၍ လဲအောင်လုပ်ပြီး ပိုက်ဆံအိတ် လုယက်ခံရမှု ဖြစ်ပွားခဲ့သေးကြောင်း သိရသည်။
“ယောင်္ကျားလေး ၂ ယောက်ဆိုင်ကယ်နဲ့ အစ်မတို့ဆိုင်ကယ်နား ကပ်လာပြီး လက်ထဲကိုင်ထားတဲ့ပိုက်ဆံအိတ်ကို လုသွားပါတယ်။ ဆိုင်ကယ်ကိုလည်း ခြေထောက်နဲ့ ကန်ပေါ့၊ လူလည်း ဒဏ်ရာရသွားပါတယ်၊ အစ်မတို့က ၂ ယောက်စီးတော့ ရှေ့ကမောင်းတဲ့တစ်ယောက် တော်တော်နာသွားပါတယ်။ အစ်မကတော့ အတင်းထပြီး ‘သူခိုး သူခိုး’ ကျမပိုက်ဆံအိတ် လာလုနေတယ်လို့ အော်ပြီးပြေးလိုက်ပါတယ်။ အဲ့နားတစ်ဝိုက်လူတွေ ထွက်လာလို့ ဆိုင်ကယ်ပါ မသွားဘူးပေါ့”ဟု လုယက်ခံရသူတစ်ဦးက ဆိုသည်။
အလားတူ ဧပြီ ၂၉ ရက်၊ ညနေ ၅ နာရီကျော်ခန့်တွင် မူးယစ်၀င်းနှင့်ယန္တယား၀င်းကြားလမ်းတွင်လည်းပိုက်ဆံအိတ် အလုခံရကြောင်း သိရသည်။
“အဲ့နားဆို SP ရဲတွေ ရုံးနေရာနား တော်တော်ကို ကြောက်စရာကောင်းပြီ။ ဘယ်မှာလဲ ကျမတို့အတွက် လုံခြုံရေး”ဟု အလုခံရသူက မေးခွန်းထုတ်ထားသည်။
ကျိုင်းတုံမြို့သည် ရှမ်းပြည်အရှေ့ပိုင်း၏ မြို့တော်ဖြစ်သလို ပြည်နယ်ခွဲအဆင့်နှင့် တြိဂံတိုင်းစစ်ဌာချုပ် ရှိသော်လည်း နေ့စဥ်ရက်ဆက် လုယက်မှုများ ဖြစ်ပွားနေသဖြင့် ပြည်သူများ လုံခြုံမှုမရှိဖြစ်နေသည့်အပေါ် ပြည်သူများက ဝေဖန်နေကြသည်။
#MeKongNews
#ကျိုင်းတုံ
#ပိုက်ဆံအိတ်
#ဖုန်းများ
#အကြမ်းဖက်
#လုယက်မှု
