မဲခေါင်၊ ဧပြီ ၂၇
မူးယစ်ဆေးဝါး အကြောင်းပြပြီး ကိုးကန့်တပ်ဖွဲ့ – MNDAA ဖမ်းဆီးသွားသည့် လူငယ် ၇၀ ကျော်အနက် အချို့ကို သိန်း ၁၀၀ ကျော်ဖြင့် ပြန်လာရွေးယူရန် အဖမ်းခံရသူ၏ မိသားစုဝင်များဆီ ဖုန်းဆက်ခြိမ်းခြောက်လာသည်ဟု သတင်းရင်းမြစ်များကပြောသည်။
ကိုးကန့်တပ်ဖွဲ့က ယင်းကဲ့သို့ ခြိမ်းခြောက် ငွေတောင်းလာခြင်းကြောင့် အချို့မိသားစုဝင်များမှာ ငွေရှာဖွေပြီး အဖမ်းခံရသည့် သားသမီးများကို ပြန်ရွေးရန် လုပ်ဆောင်နေကြသည်ဟုလည်း သတင်းရင်းမြစ်များထံမှသိရသည်။
လားရှိုးမြို့နယ်၊ အီနိုင်းအနီး ဆယ်မိုင်ကုန်းတွင် အဖမ်းခံရသည့် အမျိုးသားတစ်ဦး၏ မိသားစုဝင်ဆီသို့ ဧပြီ ၂၅ ရက် ည ၉ နာရီဝန်းကျင်တွင် ကိုးကန့်တပ်ဖွဲ့အရာရှိတစ်ဦးက ဖုန်းဆက်လာပြီး ငွေကျပ်သိန်း ၁၀၀ ကျော်ပေးနိုင်ပါက ပြန်လွှတ်ပေးမည်ဖြစ်ပြီး မပေးနိုင်ပါက စစ်မှုထမ်းရန် အမြန်ဆုံး ပို့ဆောင်မည်ဟု ခြိမ်းခြောက်ခဲ့သည်ဟု မိသားစုဝင်နှင့် နီးစပ်သည့် သတင်းရင်းမြစ်တစ်ဦးက ပြောသည်။
“အစက မက်ဆေ့တွေ ပို့လာတာ။ စာမပြန်ရဲဘူး။ ပြီးမှ ဖုန်းဆက်တိုက်ခေါ်လာမှ ကိုင်ကြည့်တော့ ဗမာစကား ပြောလာတာရှိတယ်။ ဖမ်းထားတဲ့ နင်တို့သားကို ပြန်ခေါ်ချင်ရင် ပိုက်ဆံနဲ့ သိန္နီကို လာထုတ်ရမှာတဲ့၊ မထုတ်နိုင်ရန် စစ်မှုထမ်းဖို့ ပို့တော့မယ်တဲ့” ဟု သတင်းရင်းမြစ်က ပြောသည်။
ထို့ကြောင့် ကိုးကန့်တပ်အရာရှိဆိုသူ တောင်းထားသည့် ငွေများကို ပေးနိုင်ရေး မိသားစုဝင်များက ငွေသိန်း ၁၀၀ ကျော် ရရှိရန် အပူတပြင်းရှာဖွေပြီး သိန္နီသို့ ပို့ပေးရန် လုပ်ဆောင်နေသည်ဟုလည်း ၎င်းသတင်းရင်းမြစ်က ပြောသည်။
“ကျနော် လက်လှမ်းမှီသလောက် သိရတာကတော့ အဲ့လိုဖုန်းဆက်လာပြီး ငွေတောင်းခံရတဲ့ အိမ်က ၂ အိမ်ရှိတယ်။ တောင်းတဲ့ငွေ ပမာဏကလည်း သိန်း ၁၀၀ ကျော် အတူတူပဲ” ဟု ၎င်းက ဆက်ပြောသည်။
ထိုအဖမ်းခံရသည့်သူ၏ မိသားစုဝင်များကို ဖုန်းဆက် ခြိမ်းခြောက်ပြီး ငွေတောင်းသည့် ကိုးကန့်အရာရှိဆိုသူမှာ အစစ်အမှန် ဟုတ်၊ မဟုတ်ကိုမူ မဲခေါင်အနေဖြင့် သီးခြားအတည်ပြုနိုင်ခြင်း မရှိသေးပေ။
ကိုးကန့်တပ်ဖွဲ့ – MNDAA သည် ပြီးခဲ့သည့် ဧပြီ ၂၁ ရက်တွင် လားရှိုးမြို့နယ် အီနိုင်း၊ ဆယ်မိုင်ကုန်း၊ တောင်တလောင်ဒေသတွင် ဒေသခံများနှင့် ခရီး သွားလူငယ်များ ၇၀ ကျော်ကို ရှောင်တခင်စစ်ဆေးကာ ဖမ်းဆီးသွားခဲ့သည်။
ဖမ်းဆီးခံရသည့်သူများကို ကိုးကန့်တပ်ဖွဲ့က စစ်မှုထမ်းခိုင်းရန် သိန္နီသို့ နေ့ချင်း ခေါ်ဆောင်သွားခဲ့ပြီး လက်ရှိအချိန်ထိ မိဘများနှင့် တွေ့ခွင့်မပေးသေးကြောင်း ဒေသခံ သတင်းရင်းမြစ်များက ပြောသည်။
ကိုးကန့်တပ်ဖွဲ့သည် ၁၀၂၇ စစ်ဆင်ရေးပြီးသည့်နောက်ပိုင်း ၎င်းထိန်းချုပ် နယ်မြေအတွင်း ကိုးကန့်မဟုတ်သည့် အခြားလူမျိုးများကိုပါ နည်းမျိုးစုံဖြင့် စစ်မှုထမ်းရန် လုပ်ဆောင်နေပြီး သားသမီး ထွက်ပြေးပါက မိဘများကို ဖမ်းဆီးထားခြင်းများလည်း ပြုလုပ်နေသည်။
#MeKongNews
#ဒေသခံ
#ခရီးသွားလူငယ်
#ဖမ်းဆီး
#MNDAA
