မဲခေါင်၊ ဧပြီ ၂၂
ရှမ်းပြည်တောင်ပိုင်း ဆီဆိုင်မြို့နယ်၊ နောင်ထောဝ်ကျေးရွာတွင် စစ်ကောင်စီ လက်အောက်ခံ PNO ပြည်သူ့စစ်က တစ်အိမ် ၅ သိန်းကျပ် အနည်းဆုံး ဆက်ကြေးကောက်ခံခဲ့သည်ဟု ဒေသခံများကပြောသည်။
ယင်းဆက်ကြေးများကို စစ်အသုံးစရိတ်အတွက် ဟုဆိုကာ ဧပြီ ဒုတိယပတ်တွင် PNO ပြည်သူ့စစ်က ကောက်ခံခဲ့ခြင်းဖြစ်ပြီး မထည့်နိုင်သည့် ပြည်သူများလည်း ရှိသည်ဟု ဒေသခံအမျိုးသားတစ်ဦးက ပြောသည်။
“သူတို့စားဖို့ ထမင်းလည်း နေ့တိုင်း ချက်ပို့ပေးရတယ်။ ဒေသခံတွေက စီးပွားရေးလည်း ကောင်းတာမဟုတ်ဘူး။ နောင်ထောဝ်က စစ်ပွဲဒဏ် အများကြီးခံရတာ၊ တချို့တွေဆို နေအိမ်မီးရှို့ခံရလို့ အိမ်တောင် ပြန်မဆောက်နိုင်သေးဘူး။ အခုလို တစ်အိမ် ၅ သိန်းတောင်းတာကျ ရက်စက်လွန်းတယ်” ဟု ၎င်းဒေသခံအမျိုးသားက ပြောသည်။
ထို့ပြင် PNO သည် စစ်အသုံး စရိတ် တစ်အိမ် ၅ သိန်းကျပ်အပြင် ပြည်ပတွင် သွားရောက် အလုပ်လုပ်သူရှိသည့် အိမ်များကိုမူ အမျိုးသားတစ်ဦးလျှင် ၂ သိန်းကျပ် နှင့် အမျိုးသမီးတစ်ဦးလျှင် ကျပ်တစ်သိန်းခွဲပါ ဆက်ကြေးတောင်းခဲ့သည်ဟု နောင်ထောဝ်ဒေသခံများက ပြောသည်။
PNO က ယင်းကဲ့သို့ ဆက်ကြေး ကောက်ခံမှုအပေါ် အချို့ပြည်သူများမှာ ထည့်နိုင်ခြင်း မရှိသေးသဖြင့် ကျေးရွာမှ အပယ်ခံရမည်ကိုလည်း စိုးရိမ်နေကြသည်။
“ကျမတို့က ပွန်ချောင်းအရှေ့ဘက်ကနေ စစ်ရှောင်ရင်း နောင်ထောဝ်မှာ အခြေချကြတာ။ စားဖို့သောက်ဖို့တောင်မှ နေ့စားလိုက်ရမှ အဆင်ပြေတာလေ PNO ကောက်တဲ့ငွေကို ထည့်ဖို့ကျ ကျမတို့ အခြေအနေက မတတ်နိုင်ဘူး၊ သူများဆီ သွားချေးငှားလည်း ပြန်မပေးနိုင်ဘူးလို့ ထင်တာလားမသိဘူး မချေးပေးကြဘူး။ သူများပယ်မှာလည်း ကြောက်ရတယ်” ဟု အမည်မဖော်လိုသည့် သတင်းရင်းမြစ်တစ်ဦးက ပြောသည်။
ယခင်နှစ်တွင်လည်း PNO က နောင်ထောဝ် ကျေးရွာသားများအား စစ်မှုထမ်းရန်အတွက် အတင်းအဓမ္မ ခေါ်ယူမှုများ ပြုလုပ်ခဲ့သေးသည်။
ယခုကဲ့သို့ စစ်ဘေးဒဏ်ကြောင့် ပြည်သူများ လူမှုစီးပွား ခက်ခဲနေချိန်တွင် PNO က မကြာခဏ ဆက်ကြေး ကောက်နေခြင်းသည် ပြည်သူများအတွက် ကြီးလေးသည့် ဝန်ထုပ်ဝန်ပိုးကို ဖြစ်စေပြီး လူထုကို ပိုမိုကျပ်တည်းစေကြောင်း ဒေသခံများကပြောသည်။
#MeKongNews
#ဆီဆိုင်
#နောင်ထောဝ်
#PNO
#ဆက်ကြေးကောက်
