မဲခေါင် ၊ ဧပြီ ၂၁
မုံးကိုးမြို့နယ်ကို သိမ်းပိုက်ထားသည့် ကိုးကန့်တပ်ဖွဲ့ – MNDAA သည် ၁၀၂၇ စစ်ဆင်ရေးပြီးသည့်နောက်ပိုင်းတွင် မြို့နယ်အတွင်းရှိ တအာင်းလူမျိုး ၂၀၀ ကျော်ကို အတင်းအဓမ္မတပ်သားသစ်စုဆောင်းခဲ့သည်ဟု စုံစမ်းသိရှိရသည်။
မုံးကိုးမြို့နယ်သည် ယခင်တွင် စစ်ကောင်စီနှင့် မြောက်ပိုင်းမဟာမိတ်အဖွဲ့များ လှုပ်ရှားခဲ့သော်လည်း ၁၀၂၇ စစ်ဆင်ရေးပြီးနောက် မုံးကိုးမြို့ကို သိမ်းပိုက်ထားသည့် ကိုးကန့်တပ်ဖွဲ့က အဓိက လှုပ်ရှားခဲ့ပြီး ကိုးကန့်မဟုတ်သည့် အခြားလူမျိုးများကိုပါ အဓမ္မတပ်သားသစ် စုဆောင်းလာခဲ့ခြင်း ဖြစ်သည်။
မုံးကိုးဒေသတွင်း သတင်းရင်းမြစ်များထံမှ စုံစမ်းမေးမြန်းမှုအရ မုံးကိုးမြို့နယ်အတွင်းရှိ တရုတ် – မြန်မာနယ်စပ်တွင် တည်ရှိသည့် တအာင်းကျေးရွာများရှိ ဒေသခံများကို ကိုးကန့်တပ်ဖွဲ့က အဓမ္မတပ်သားသစ်စုဆောင်းသွားသည်မှာ ၁၀၂၇ စစ်ဆင်ရေးအပြီးမှ ၂၀၂၆ မတ်အထိ ၂၀၀ ဦးကျော်ရှိပြီ ဖြစ်သည်။
“အရင်က မုံးကိုးမှာ မြောက်ပိုင်းအဖွဲ့တွေ အတူတူလှုပ်ရှားကြတာ။ အဲ့ဒီအချိန် ကိုးကန့်က အားမကောင်းသေးတော့ တအာင်းရွာတွေ ကချင်ရွာတွေကို သူတို့ စစ်သားစုဆောင်းတာတွေ မလုပ်ဘူး၊ ကိုးကန့်တရုတ်ကိုပဲ အဓိက ပြန်စုကြတာပေါ့။ ၁၀၂၇ နောက်ပိုင်း မုံးကိုးကို သိမ်းပြီးတဲ့နောက် အင်အားကောင်းလာတော့ အရင်က သဘောတူထားကြတဲ့ တခြားလူမျိုးရွာကို တပ်သားမစုဆောင်းဘူးဆိုတာကိုလည်း မလိုက်နာတော့ဘူး၊ အင်အားသုံးပြီး တအာင်းရွာတွေကိုပါ ပေါ်တင် စုဆောင်းလာတယ်။ ရွာကြီးတွေဆို တရွာကို ၃၀ ကျော်သွားရတယ်” ဟု မုံးကိုးဒေသခံတစ်ဦးက မဲခေါင်၏ မေးမြန်းမှုကို ပြန်လည် ဖြေကြားသည်။
မုံးကိုးမြို့နယ်တွင် နမ့်ဝါ၊ နမ့်ဟာ ၊ မာန်ကောင်း၊ ပန်စီတိုင်း၊ ရှောက်ရွှေကျင်၊ မန်ခါ၊ ခိုတောင်၊ ဖောင်ဆိုင်၊ ဖာငပ် ကျေးရွာများသည် တအာင်းကျေးရွာများဖြစ်ပြီး မုံးကိုးမြို့ပေါ်တွင်လည်း တအာင်းလူမျိုးအများအပြား နေထိုင်လျက်ရှိသည်။
ထိုတအာင်းကျေးရွာများကို တစ်ရွာလျှင် အနည်းဆုံး ၂၀ ဦးမှ ၃၀ ဦးအထိ ကိုးကန့်တပ်ဖွဲ့က စစ်မှုထမ်းခိုင်းခဲ့ပြီး အချို့အိမ်ခြေများသည့် ကျေးရွာ ၆ ရွာထက်မနည်းမှာ ၃၀ ဦးကျော်အထိ ကိုးကန့်တပ်ဖွဲ့မှ အဓမ္မစစ်သားစုဆောင်းခဲ့သည်။
“တအာင်းရွာတွေက ရွာကြီးတွေများတယ် တချို့ရွာတွေဆို အယောက် ၃၀ ကျော် ကိုးကန့်တပ်ထဲ အဓမ္မစုဆောင်းခံရတယ်။ ညီအစ်ကို မောင်နှစ်မ နှစ်ယောက်ရှိရင် တယောက်က မသွားမနေရ သွားရတယ်။ ကိုးကန့်ဖြစ်လို့ ကိုးကန့်တပ်ထဲ သွားရတာ တအာင်းဖြစ်လို့ တအာင်းတပ်ထဲသွားရတာ ကချင်ဖြစ်လို့ ကချင်တပ်ထဲသွားရတာက အမျိုးသားရေးလို့ နားလည်ပေးလို့ ရသေးတယ်၊ အခု ကိုးကန့်တွေ လုပ်တာက တခြားလူမျိုးတွေကိုပါ သူတို့တပ်ထဲကို အဓမ္မစုဆောင်းနေတာပေါ့ဗျာ”ဟု ရှမ်းမြောက်ဒေသခံတစ်ဦးက ပြောသည်။
ထို့ပြင် မတ် ၁၄ ရက်တွင် စတင်ဖြစ်ပွားခဲ့သည့် ကိုးကန့်တပ်နှင့် တအာင်းတပ် ပဋိက္ခအတွင်း မုံးကိုးမြို့နယ်အတွင်းရှိ တအာင်းတပ်ဖွဲ့များကို ကိုးကန့်တပ်က နှင်ထုတ်ပြီးသည့်နောက် ကိုးကန့်တပ်ဖွဲ့၏ တပ်သားသစ်စု ဆောင်းမှုမှာ ပိုမိုဆိုးရွားလာသည်ဟု ဒေသခံ သတင်းရင်းမြစ်များက ပြောသည်။
“အရင်က တအာင်းတပ်လည်း ရှိတော့ တအာင်းရွာတိုင်းကို ထင်တိုင်းကြဲပြီး စုဆောင်းတာမျိုး သိပ်မလုပ်ဘူး။ သူတို့ပိုအားကောင်းတဲ့ နေရာမှာပဲ လုပ်ကြတယ်။ အခုနောက်ပိုင်းက သာမန်အရပ်သား မပြောနဲ့ တအာင်းတပ်ဖွဲ့ဝင်ဟောင်းတွေ လက်ရှိတအာင်းတပ်ဖွဲ့ဝင် ဖြစ်နေဆဲ သူတွေကိုပါ ကိုးကန့်က အကုန်ဆွဲတယ်။ ရွာတွေမှာဆိုလည်း သင်တန်းက မတက်ရသေးဘူး ယူနီဖောင်းအရင်ပေးပြီး စာရင်းသွင်း စုဆောင်းတာတွေပါ လုပ်လာတယ်”ဟု ရှမ်းမြောက်ဒေသခံ သတင်းရင်းမြစ်က ပြောသည်။
ပြီးခဲ့သည့် မတ်လအတွင်းတွင်ပင် မုံးကိုးမြို့နယ်အတွင်းရှိ တအာင်းတပ်ဖွဲ့ဝင် ၉ ဦးကို ကိုးကန့်တပ်က ဖမ်းဆီးပြီးသည့်နောက် ၅ ဦးကိုသာ ပြန်လွတ်ပေးပြီး ၄ ဦးကိုမူ ကိုးကန့်တပ်ဖွဲ့ထဲသို့ အဓမ္မစုဆောင်းသွားခဲ့သည်၊
မုံးကိုးမြို့နယ်အတွင်းရှိ တအာင်းကျေးရွာများသည် ကိုးကန့်တပ်ဖွဲ့က စေခိုင်းသည့်အတိုင်း စစ်မှုထမ်းခြင်းမပြုပါက နေအိမ်ကိုသိမ်းပြီး ရွာမှနှင်ထုတ်မည်ဟုလည်း ခြိမ်းခြောက်လျက်ရှိသဖြင့် လူငယ်အများအပြားမှာ တရုတ်ဘက်သို့ တရားမဝင် ထွက်ပြေးနေရသည်ဟုလည်း သတင်းရင်းမြစ်များက ပြောသည်။
#MeKongNews
#၁၀၂၇
#မုံးကိုး
#တအာင်းလူမျိုး
#ကိုးကန့်တပ်ဖွဲ့
#တပ်သားသစ်
