မဲခေါင်၊ ဧပြီ ၂၀
ထိုင်းနိုင်ငံ၊ ဘန်ကောက်မြို့၊ ဘန်ကပီ လမ်ကဖဲင် ဆွယ် ၅၂/၁ တွင် ဖြစ်ပွားခဲ့သည့် မြန်မာရွှေ့ပြောင်းလုပ်သားများ အုပ်စုဖွဲ့ အကြမ်းဖက်တိုက်ခိုက်မှုတွင်းမှ သေနတ်ဖြင့် ပစ်ခတ်သူများမှာ လွတ်မြောက်နေဆဲဖြစ်ပြီး ဒဏ်ရာရရှိသူများလည်း ဆေးရုံပေါ်တွင် ဆေးကုသမှု ခံယူနေရဆဲဖြစ်ကြောင်း သတင်းရင်းမြစ်များထံမှ သိရသည်။
ထိုရန်ပွဲတွင် လူမိုက်ခေါင်းဆောင် ခွန်ကျော်လေး ဆိုသူကို လက်ရှိအချိန်ထိ ဖမ်းဆီးရမိခြင်းမရှိသေးဘဲ သေနတ်ဖြင့် ပစ်ခတ်ခံရသဖြင့် ဒဏ်ရာရရှိခဲ့သည့် နမ့်ကွတ်ရွာသားများမှာလည်း ဆေးကုသမှုခံယူနေရဆဲဖြစ်သည်ဟု သတင်းရင်းမြစ်တစ်ဦးက ပြောသည်။
ထို့ကဲ့သို့ သေနတ်ဖြင့်ပစ်ခတ်ပြီး ထွက်ပြေးလွတ်မြောက်နေသူ လူမိုက်ခေါင်းဆောင် ခွန်ကျော်လေး ဆိုသူသည် စစ်ကောင်စီလက်အောက်ခံ PNO ပြည်သူ့စစ် ဗိုလ်ကြီးဖုတ်၏ သားဖြစ်ပြီး PNO ထောက်ပို့အဖွဲ့ဝင်ဖြစ်သည်ဟုလည်း ခွန်ကျော်လေးနှင့် နီးစပ်သည့် သတင်းရင်းမြစ်က ပြောသည်။
“အဲ့လူက တောင်ကြီးမြို့နယ် နောင်ကားရွာသားပဲ ဒီဘန်ကပီမှာ အုပ်စုဖွဲ့ပြီး PNO လူကြီးသားဆိုပြီး လူမိုက် လုပ်နေတာ။ သူ့အဖေက PNO တပ်က ဗိုလ်ကြီးဖုတ်လေ။ ရွာမှာကတည်းက လူမိုက်လုပ်နေတာ။ အဲ့ကြောင့်လည်း ဒီမှာ လူမိုက်လုပ်ရဲတာ အခုတော့ ထွက်ပြေးနေတယ်၊ ရဲတွေ လိုက်ဖမ်းတာ မမိသေးဘူး။ သံသယရှိသူ တစ်ယောက်ကိုတော့ ရဲက ဖမ်းမိသွားပြီ၊ ကျော်လေးက ထွက်ပြေးနေတုန်းပဲ မမိသေးဘူး” ဟု ၎င်းသတင်းရင်းမြစ်က ပြောသည်။
ပြီးခဲ့သည့် ဧပြီ ၁၅ ရက်တွင် ဘန်ကပီ လမ်ကဖဲင် ဆွယ် ၅၂/၁ ရှိ ဆီဆိုင်မြို့နယ် နမ့်ကွတ်ရွာသားတစ်ဦးပိုင်ဆိုင်သည့် ဆိုင်တစ်ဆိုင်ရှေ့တွင် ခွန်ကျော်လေးဦးဆောင်သည့်အဖွဲ့က သောက်စားမူးယစ်ပြီး ရန်ဖြစ်နေသဖြင့် ဆိုင်ပိုင်ရှင်က ထွက်ပြောရာ ခွန်ကျော်လေးက ဓားဖြင့် ဆိုင်ရှင်ကို ခုတ်လိုက်ရာမှ အုပ်စုဖွဲ့ ရန်ဖြစ်မှု ဖြစ်ပွားခဲ့ခြင်း ဖြစ်သည်။
“အစက သူတို့အချင်းချင်း သောက်စားမူးယစ်ပြီး ရေပက်ရင်းနဲ့ ရန်ဖြစ်တာကို ဆိုင်ရှင်က ထွက်လာပြီး မင်းတို့ရန်ဖြစ်ချင်ရင် တခြားနေရာမှာဖြစ် ဒီမှာရန်ဖြစ်ရင် ငါ့ဆိုင်နာမည်ပျက်တယ်လို့ ပြောတာကို ကျော်လေးက ဒေါပွပြီး ဆိုင်ရှင်ကို ဓားနဲ့စခုတ်တာ။ အခုတ်ခံရတဲ့ ဆိုင်ရှင်က နမ့်ကွတ်ရွာသား၊ အဲ့ဒါ နမ့်ကွတ်ရွာသားတွေက မကျေနပ်လို့ နောက်ည အဲ့ဒီကျော်လေးကို လိုက်ရှာတာ၊ အဲ့ကောင်က ထွက်ပြေးသွားပြီးမှ သူ့ဂိုဏ်းဝင်လူမိုက်တွေကိုစုပြီး ပြန်လာတာ။ အဲဒီမှာ တုတ်တွေ ဓားတွေနဲ့ ရိုက်ကြ ခုတ်ကြရင်း ကျော်လေးတို့အဖွဲ့က သေနတ်နဲ့ ပစ်လိုက်တာ၊ သေနတ်က ကျည်အစစ်ထည့်ပစ်တဲ့ ပစ္စတိုတစ်လက်နဲ့ ဘောသီးတွေ ထည့်ပစ်ရတဲ့ လေသေနတ်က ၂ လက် ပါတယ်။ အခုက သေနတ်တလက်နဲ့ လူတယောက်ပဲ မိသေးတယ်၊ ကျော်လေးက လွတ်နေတုန်းပဲ” ဟု ဘန်ကပီရှိ သတင်းရင်းမြစ်တစ်ဦးကပြောသည်။
ယင်းခိုက်ရန်ဖြစ်ပွားမှုအတွင်း ဆိုင်ရှင် အပါအဝင် အမျိုးသား ၄ ဦးထက်မနည်း ထိခိုက်ဒဏ်ရာရရှိခဲ့ပြီး လက်ရှိတွင်လည်း ဆေးရုံတွင် ဆေးကုသမှုခံယူနေရဆဲ ဖြစ်သည်။
“ဆိုင်ရှင်က အခုတ်ခံရတာ အချက်ပေါင်းမနည်းဘူး။ ကျော၊ လက်၊ ခြေ၊ မျက်နှာ အကုန်ထိတယ်၊ သူက အဆိုးဆုံးဒဏ်ရာရတယ်၊ နောက်တစ်ယောက်က လက်ပြတ်ခါနီးအခြေအနေထိ ခုတ်ခံရတယ်။ နောက်တယောက်က ခြေထောက်ကို သေနတ်နဲ့ပစ်ခံရတယ်။ ကျန်တဲ့သူတွေက သိပ်မပြင်းထန်ဘူး” ဟု ဘန်ကပီတွင်နေထိုင်သည့် သတင်းရင်းမြစ်တစ်ဦးက ပြောသည်။
ထိုအုပ်စုလိုက် အကြမ်းဖက်မှုဖြစ်စဉ်နှင့် ပတ်သက်၍ ထိုင်းရဲတပ်ဖွဲ့မှ စုံစမ်းစစ်ဆေးမှုများ ပြုလုပ်လျက်ရှိပြီး၊ ပါဝင်ပတ်သက်သူများကို ဖမ်းဆီးနိုင်ရန် ကြိုးပမ်းနေကြောင်း သိရသည်။
ယခုကဲ့သို့ ဆုန်ခရန်ကာလအတွင်း ရေကစားမှုမှ စတင်သော အငြင်းပွားမှုများ အကြမ်းဖက်မှုအထိ တိုးမြှင့်လာခြင်းသည် ထိုင်းရောက် ရွှေ့ပြောင်းလုပ်သားများ၏ လုံခြုံရေးအပေါ် စိုးရိမ်မှုများကို ဖြစ်ပေါ်စေကြောင်းလည်း သတင်းရင်းမြစ်များက ပြောသည်။
#MeKongNews
#ဘန်ကောက်
#အုပ်စုဖွဲ့ရန်ပွဲ
#PNO
#ဗိုလ်ကြီးသား
