မဲခေါင် ၊ ဧပြီ ၁၈
ပြန်လည် စတင်တော့မည့် တရုတ်၏ BRI ပိုးလမ်းမ ရထားလမ်းစီမံကိန်း လုံခြုံရေးနှင့် ပတ်သက်၍ တရုတ်ကိုယ်စားလှယ်အဖွဲ့က စစ်ကောင်စီအပါအဝင် တိုင်းရင်းသား လက်နက်ကိုင်အဖွဲ့များနှင့် ရှမ်းပြည်မြောက်ပိုင်း လားရှိုးမြို့တွင် လာရောက်တွေ့ဆုံပြီး ဆွေးနွေးခဲ့ကြသည်ဟု ရှမ်းမြောက်အရေးကျွမ်းကျင်သူ သတင်းရင်းမြစ်များထံမှ သိရသည်။
ပြီးခဲ့သည့် ဧပြီ ၁၃ ရက်တွင် တရုတ်ကိုယ်စားလှယ်အဖွဲ့က စစ်ကောင်စီ၊ “ဝ”တပ်ဖွဲ့- UWSA၊ ကိုးကန့်တပ်ဖွဲ့- MNDAA၊ ရှမ်းတပ်ဖွဲ့ – SSPP တို့နှင့် လားရှိုးမြို့ အရှေ့မြောက်ပိုင်းတိုင်းစစ်ဌာနချုပ် – ရမခတွင် တွေ့ဆုံခဲ့ခြင်းဖြစ်သည်ဟု ရှမ်းမြောက်အရေးကျွမ်းကျင်သူ သတင်းရင်းမြစ်က ပြောသည်။
“သင်္ကြန်အကြိုနေ့ လားရှိုး ရမခထဲမှာ တွေ့ကြတယ်။ တရုတ်ကိုယ်စားလှယ်အဖွဲ့က မေလမှာ ပြန်စတင်မယ့် BRI စီမံကိန်း လုံခြုံရေးနဲ့ပတ်သက်ပြီး ရှမ်းမြောက်အပိုင်းကို တာဝန်ယူဖို့ လာဆွေးနွေးတာလို့တော့ သိရပါတယ်။ ဘယ်အဖွဲ့က ဦးဆောင်ပြီး ဘယ်အဖွဲ့က ဘယ်အပိုင်းမှာ လုံခြုံရေး အာမခံပေးဖို့ လာဆွေးနွေးတယ်၊ ဒီလောက်တော့ ပြောလို့ရပါတယ်”ဟု ၎င်းသတင်းရင်းမြစ်က ဆိုသည်။
ထိုတွေ့ဆုံမှုနှင့် ပတ်သက်ပြီး မဲခေါင်သတင်းဌာန အနေဖြင့် သီးခြား အတည်ပြုနိုင်ခြင်း မရှိသေးသလို သက်ဆိုင်ရာ လက်နက်ကိုင်အဖွဲ့များ၏ ပြောရေးဆိုခွင့်ရှိသူများကို ဆက်သွယ် မေးမြန်းထားသော်လည်း ပြန်လည် ဖြေကြားခြင်းများ မရှိသေးပေ။
ထို့သို့ တွေ့ဆုံသည့် အချိန်တွင်ပင် ကိုးကန့်တပ်ဖွဲ့သည် နမ္မတူနယ်စပ်နှင့် မူဆယ်၊ နမ့်ခမ်းဖက်တွင် အင်အားတိုးမြှင့် ချထားလာသကဲ့သို့ BRI စီမံကိန်း လမ်းကြောင်းပေါ်တွင် ရှိသည့် နမ္မတူနှင့် သီပေါ မြို့နယ်အစပ် နားကျိုင်းတွင်လည်း SSPP တပ်ဖွဲ့က အင်အားတိုးချဲ့ ဖြည့်တင်းမှု ပြုလုပ်ခဲ့သည်ဟု သတင်းရင်းမြစ်က ပြောသည်။
ယင်း BRI စီမံကိန်းအရ တရုတ်နိုင်ငံ ကူမင်းမြို့မှ မန္တလေး – ရခိုင်ပြည် ကျောက်ဖြူအထိ ပေါက်ရောက်မည့် ရထားလမ်းစီမံကိန်းကို တရုတ်က ယခုနှစ်တွင် ဆောင်ရွက်သွားမည် ဖြစ်သည်။
“ဒါကြောင့် ဒီတလ နှစ်လအတွင်းမှာတော့ ရှမ်းမြောက်မှာ လှုပ်လှုပ်ခတ်ခတ်တွေ ဖြစ်နိုင်တယ်။ အခုလည်း တရုတ်နဲ့ တွေ့တဲ့အဖွဲ့တွေက နေရာအသီးသီးမှာ အင်အားတွေ ဖြည့်တင်းနေကြသလို စစ်ကောင်စီကလည်း အင်အား ဖြည့်တင်းတာတွေ လုပ်နေတယ်။ တရုတ်ကတော့ သူ့စီမံကိန်းပေါ်မှာ ရှိနေတဲ့ အဖွဲ့တွေကို သူ့စကားနားမထောင်ရင် နည်းပေါင်းစုံနဲ့ ဖယ်ရှားတာတွေ ပြုလုပ်လာနိုင်တယ်”ဟု ရှမ်းမြောက်အရေးကျွမ်းကျင်သူ သတင်းရင်းမြစ်က ပြောသည်။
ကူမင်း – ကျောက်ဖြူ ရထားလမ်းစီမံကိန်းသည် စုစုပေါင်း ၁၅၀၀ ကီလိုမီတာခန့် ရှည်လျားပြီး စီမံကိန်းအတွင်း တံတား ၁၂၄စင်း၊ လိုဏ်ဂူလမ်း ၆၀၊ လျှပ်စစ်ဓာတ်အားပေးစက်ရုံ ၁၁ ခု ပါဝင်ပြီး ရင်းနှီးမြုပ်နှံမှု အမေရိကန်ဒေါ်လာ ၈ ဒသမ ၉ဘီလီယံခန့် ကုန်ကျမည်ဟု တရုတ်ဒေသတွင်း သတင်းဌာနတခုက ဖော်ပြထားသည်။
တရုတ်နိုင်ငံ ယူနန်ပြည်နယ်မှ အိန္ဒိယ သမုဒ္ဒရာကို တိုက်ရိုက်ဆက်သွယ်ပေးမည့် BRI ပိုးလမ်းမ ရထားလမ်း စီမံကိန်းကို တရုတ်ဖက်က မေလတွင် ပြန်လည်စတင်ရန် လုပ်ဆောင်လာနေပြီး စီမံကိန်းတွင်သုံးမည့် စက်ယန္တရားပစ္စည်းများကို မြန်မာနိုင်ငံအတွင်းသို့ ပို့ဆောင်ထားပြီး ဖြစ်သည်။
ထို့ပြင် မေလတွင် စီမံကိန်းအတွက် မြေပြင်တိုင်းတာခြင်း စစ်တမ်းကောက်ယူခြင်း လုပ်ငန်းများကိုလည်း ပြန်လည်စတင် ဆောင်ရွက်မည်ဖြစ်ပြီး စီမံကိန်းအတွက် မြေယာလျော်ကြေးများကို ပေးချေပြီးဖြစ်သည်ဟု တရုတ်ဒေသတွင်း သတင်းဌာနတစ်ခုတွင် ဖော်ပြထားသည်။
#MeKongNews
#BRI
#ရထားလမ်းစီမံကိန်း
#လုံခြုံရေးအတွက်
#စစ်ကောင်စီ
#လက်နက်ကိုင်တပ်ဖွဲ့
#တရုတ်ကိုယ်စားလှယ်
