မဲခေါင်၊ မတ် ၈
ရှမ်းပြည်တောင်ပိုင်း၊ တောင်ကြီးမြို့တွင် ယာဉ်များကို စုံ/မ ကားနံပါတ်အလိုက် ခွဲခြားမောင်းနှင်ရန် ပညာပေးကာလ စတင်နေပြီး မြို့တွင်း ယာဉ်သွားလာမှု ယခင်ထက် လျော့နည်းသွားကြောင်း ဒေသခံများထံမှ သိရသည်။
ဒေသခံများ၏ ပြောကြားချက်အရ မတ် ၇ ရက်မှ စတင်ကာ တောင်ကြီးမြို့အတွင်းရှိ မီးပွိုင့်များနှင့် သစ်တောဂိတ်အနီးတွင် ယာဉ်ထိန်းရဲများ စောင့်ကြည့်နေပြီး ကားနံပါတ် စုံ/မ အလိုက် မောင်းနှင်ကြရန် ပညာပေးလုပ် ဆောင်နေကြောင်း သိရသည်။
“မနက်ပိုင်း မြို့ထဲဝင်လာတဲ့ကားတွေကို တချို့နေရာတွေမှာ ရပ်ပြီး စုံ/မ နံပါတ်စနစ်ကို ရှင်းပြနေတယ်။ အခုလောလောဆယ်တော့ ပညာပေးကာလဆိုပြီးပဲ ပြန်လွှတ်ပေးနေတယ်” ဟု ဒေသခံတစ်ဦးက ပြောသည်။
မြို့တွင်း ယာဉ်သွားလာမှုမှာ ယခင်ကထက် လျော့နည်းလာကြောင်း အခြားဒေသခံတစ်ဦးကလည်းပြောသည်။
“အရင်ကလို မြို့ထဲမှာ ကားတွေ မပြည့်တော့ဘူး၊ တချို့ကလည်း မလိုအပ်ရင် မထွက်တော့တာရှိတယ်။ တချို့ကတော့ စုံ/မ ရက်မကိုက်လို့ မောင်းမထွက်တာတွေရှိတယ်” ဟု ၎င်းက ဆိုသည်။
စက်သုံးဆီ ချွေတာရေးဟုဆိုကာ ကားနံပါတ်ပြား၏ နောက်ဆုံးဂဏန်းအပေါ် မူတည်၍ စုံ/မ ရက်အလိုက် မောင်းနှင်ရန် စစ်ကောင်စီက ညွှန်ကြားထားပြီး မတ် ၇ ရက်မှ ၁၃ ရက်အထိ ပညာပေးကာလအဖြစ် သတ်မှတ်ထားကြောင်း သိရသည်။
ထိုကာလ ကျော်လွန်ပြီးနောက် လိုက်နာမှု မရှိသော ယာဉ်များကို ဥပဒေအရ အရေးယူမည်ဖြစ်ပြီး ရာဇသတ်ကြီးဥပဒေပုဒ်မ ၁၈၈ အရ အလုပ်မဲ့ ထောင်ဒဏ်တစ်လ၊ ငွေဒဏ် ကျပ်၂ သောင်း သို့မဟုတ် ဒဏ်၂ ရပ်လုံး ချမှတ်နိုင်ကြောင်း သိရသည်။
စက်သုံးဆီရှားပါးမှုနှင့် စျေးနှုန်းမြင့်တက်မှုများကြောင့် ယာဉ်မောင်းနှင်မှု ကန့်သတ်ခြင်းများ ပြုလုပ်လာခြင်းသည် မြို့ တွင်း သွားလာရေးနှင့် နေ့စဉ်လုပ်ငန်းများအပေါ် သက်ရောက်မှုများ ရှိလာနိုင်ကြောင်းဒေသခံ ပြည်သူများက ပြောသည်။
#MeKongNews
#တောင်ကြီး
#ကားနံပါတ်
#ပညာပေး
#ယာဉ်သွားလာမှု
