မဲခေါင်၊ ဖေဖော်ဝါရီ ၁၇
တရုတ်နှစ်သစ်ကူး အကြောင်းပြကာ လောင်းကစားမှုဖြင့် အမှုဖွင့်ခံထားရသူ အားချင်ဆိုသူက ပြည်သူ့စစ်များ၏ လုံခြုံရေးအကာအကွယ်ရယူကာ ကျိုင်းတုံမြို့တွင် လောင်းကစားဝိုင်းများ ပြန်လည်ဖွင့်လှစ်လာကြောင်း ဒေသခံများထံမှ သိရသည်။
ယင်းလောင်းကစားဝိုင်းကို ကျိုင်းတုံမြို့၊ ကတ်ဖကျေးရွာအုပ်စု၊ ကျိုင်းတုံ-မိုင်းလားသွား ကားလမ်းဘေးရှိ နောင်လေရွာထိပ် ငါးကန်တွင် ပြုလုပ်နေခြင်းဖြစ်ပြီး၊ ဖေဖော်ဝါရီ ၁၄ ရက်မှ ၂၄ ရက်နေ့အထိ ၁၀ ရက်တိုင်တိုင် ပြုလုပ်သွားရန် စီစဉ်ထားကြောင်း ဒေသခံများက ပြောသည်။
“ဒိုင်ချုပ်က အားချင် ဆိုတဲ့တစ်ယောက်ပဲ။ သူက ဟိုတစ်ခေါက် နောင်ဖာ၊ ဖားစည်ပို့တဲ့ချောင်းနားကဝိုင်းမှာ အဖမ်းခံရဖူးတဲ့သူ။ အခုက ပြည်သူ့စစ်နဲ့ပေါင်းလုပ်တာ။ လာဆော့တဲ့သူတွေ ဘာမှမဖြစ်စေရဘူးလို့ အာမခံထားတယ်။ အကုန်လုံးကို လိုင်းကြေးပေးထားပြီးသားလို့လည်း ပြောတယ်။ လုံခြုံရေးအတွက် ကတ်ဖပြည်သူ့စစ်က M16 သေနတ်တွေလွယ်ပြီး လုံခြုံရေးယူထားပေးတယ်။ ဓာတ်ပုံမရိုက်ရဘူးဆိုပြီး ဗီနိုင်းတွေလည်း ကပ်ထားတယ်” ဟု ဒေသခံတစ်ဦးက မဲခေါင်သို့ ပြောသည်။
ဒိုင်ချုပ် အားချင် ဆိုသူမှာ ယခင်အမှုပင် မပြီးပြတ်သေးဘဲ ယခုကဲ့သို့ ကစားဝိုင်းများ ပြန်လည်ဖွင့်လှစ်လာခြင်းကြောင်း၊ ယခင်က မဲခေါင်သတင်းဌာနတွင် ၎င်း၏အကြောင်း သတင်းဖော်ပြခံခဲ့ရသဖြင့် တရားရေး၊ ဥပဒေနှင့် ရဲတပ်ဖွဲ့ဝင်များ လုပ်ကိုင်ရခက်ခဲသွားပြီး အမိန့်ချမှတ်ရန် အချိန်ဆွဲထားရသူဖြစ်ကြောင်း ဒေသခံများထံမှ သိရသည်။
“အခုဝိုင်းက ကတ်ဖပြည်သူ့စစ်နဲ့ သူနဲ့ပေါင်းဖွင့်တာ။ အရင်က သတင်းပါလာတော့ ဝိုင်းကြီးမဖွင့်ရဲဘဲ နာရေးအိမ်တွေမှာပဲ ပိုက်ကျူး၊ ရှမ်းကိုးမီးဝိုင်းတွေ လိုက်ဖွင့်နေတာ။ အခုမှ ဝိုင်းကြီးပြန်စလာတာ။ လောင်းကစားဝိုင်းတွေကြောင့် နောက်ဆက်တွဲ ခိုးမှု၊ လုယက်မှုတွေ ပြန်ဖြစ်လာမှာကို ဒေသခံတွေက စိုးရိမ်နေကြတယ်” ဟု ဒေသခံတစ်ဦးက ပြောသည်။
လက်ရှိ နောင်လေရွာရှိ လောင်းကစားဝိုင်းများတွင် ကြက်ဝိုင်း၊ ရှမ်းကိုးမီး၊ ပိုက်ကျူး၊ ဂုံးဂင်းနှင့် လေးကောင်ဂျင်များ ပါဝင်ကြောင်း သိရသည်။
ယခုကဲ့သို့ ကျေးရွာအတွင်း လောင်းကစားဝိုင်းများ လာရောက်လုပ်ကိုင်နေခြင်းကြောင့် ရွာနာမည်ပျက်ရကြောင်း ဒေသခံတစ်ဦးကလည်း ညည်းညူပြောဆိုထားပါသည်။
#MeKongNews
#ကျိုင်းတုံ
#လောင်းကစားဝိုင်း
#အားချင်
#တရုတ်နှစ်သစ်ကူး
