မဲခေါင်၊ ဖေဖော်ဝါရီ ၄
ရှမ်းပြည်မြောက်ပိုင်း၊ လားရှိုး – သိန္နီလမ်းပေါ်ရှိ မိုင်းလီကျေးရွာတွင် အိမ်ထောင်စု ၂၇ စု ပိုင်ဆိုင်သည့် မြေယာဧက ၁၀၀ ခန့်ကို MNDAA က တရုတ်နိုင်ငံသား တစ်ရှုးငှက်ပျော လုပ်ငန်းရှင်များကို ခေါ်လာပြီး ခြိမ်းခြောက် သိမ်းယူခဲ့ကြောင်း ဒေသခံများထံမှ သိရသည်။
ပြီးခဲ့သည့် ဇန်နဝါရီ ၃၁ ရက်က MNDAA သိမ်းယူခဲ့သည့် မြေယာအများစုမှာ လားရှိုး – သိန္နီ လမ်းမဘေးတွင်ရှိကြောင်း ဒေသခံတစ်ဦးက ပြောသည်။
ဒေသခံတောင်သူများ စိုက်ပျိုးထားသည့် ဆောင်းသီးနှံများကို အလျင်အမြန် ရှင်းလင်းပြီး အတင်းအဓမ္မ သိမ်းယူခဲ့ခြင်းကြောင့် မြေရှင် တောင်သူများနှင့် MNDAA တပ်ဖွဲ့ဝင်များအကြား ရုန်းရင်းဆန်ခတ် ဖြစ်ပွားခဲ့သော်လည်း သေနတ်ဖောက်၍ ခြိမ်းခြောက်သောကြောင့် ဒေသခံများမှာ အားမတန် မာန်လျှော့ခဲ့ကြရသည်ဟု သိရသည်။
“ကျေနပ်တာတော့ လုံးဝမရှိဘူး။ သူတို့ရုံးကို တိုင်ပေမဲ့လည်း ဘာမှလုပ်ပေးမယ် မထင်ဘူး။ ကူညီ ကယ်တင်ပေးမယ့်သူလည်း မရှိဘူး။ အခုက မြေမရှိရင် ရွာပျက်ပြီး ပြောင်းရမလို ဖြစ်နေတာ။ သူတို့က လူတွေကိုပါ မနေနိုင်အောင် လုပ်နေတာ” ဟု ဒေသခံတစ်ဦးက မဲခေါင်သို့ ပြောသည်။
စစ်ကောင်စီက သိန္နီမြို့ကို ပြန်လည် တောင်းဆိုထားသကဲ့သို့ MNDAA အနေဖြင့် တရုတ်နိုင်ငံသားများ အခြေချ စီးပွားရှာနိုင်ရန် ဒေသခံများ၏ လယ်ယာမြေများကို ယခုလို နည်းလမ်းမျိုးဖြင့် သိမ်းယူနေသဖြင့် ဒေသခံများ ဒုက္ခရောက်နေကြရကြောင်း သိရသည်။
ထို့အတူ လားရှိုးမြို့နယ်၊ နမ့်ပေါင်ကျေးရွာအုပ်စုတွင်လည်း MNDAA က ရွှေတူးရန် စီစဉ်နေမှုကို ကန့်ကွက်သည့် ဒေသခံ ပြည်သူများအား ဖမ်းဆီးထားပြီး ရိုက်နှက် နှိပ်စက်နေကြောင်း ဒေသခံများထံမှ သိရသည်။
ပြီးခဲ့သည့် ဖေဖော်ဝါရီ ၁ ရက်တွင် MNDAA က လယ်ပိုင်ရှင်များကို အသိမပေးသလို ခွင့်လည်းမတောင်းခဲ့ဘဲ နမ့်ပေါင်ကျေးရွာအုပ်စု၊ ဝမ်စယ်ကျေးရွာမှ ဒေသခံပြည်သူများ ပိုင်သည့် လယ်မြေများပေါ်တွင် ရွှေတူးရန် တရုတ် လုပ်ငန်းရှင်များကို ခေါ်လာခဲ့သည်ဟု ဒေသခံများက ဆိုသည်။
လားရှိုးမြို့ ကို ၂၀၂၄ ခုနှစ်၊ ဩဂုတ် ၃ ရက်တွင် MNDAA က တိုက်ခိုက် သိမ်းပိုက်နိုင်ခဲ့ပြီးနောက် ယမန်နှစ် ဧပြီ ၂၁ ရက်တွင် တရုတ်၏ ဖိအားကြောင့် စစ်ကောင်စီထံ ပြန်လည် ပေးအပ်လိုက်ရသည်။
ထိုနောက်ပိုင်း လားရှိုးမြို့တွင် နှစ်ဖက်တွေ့ဆုံ ဆွေးနွေးမှုများ အကြိမ်ကြိမ် ပြုလုပ်ခဲ့ပြီး သန္နီမြို့ကိုလည်း ပြန်လည် ပေးအပ်ရန် စစ်ကောင်စီက အစဉ်တစိုက် တောင်းဆိုနေခဲ့ရာ MNDAA က ငြင်းဆန်ထားသည်။
လတ်တလောတွင် MNDAA ထိန်းချုပ်နယ်မြေများ၌ တရုတ် စီးပွားရေးလုပ်ငန်းများ ချဲ့ထွင်လာနေပြီး တစ်ရှုးငှက်ပျောစိုက်ခင်းများ ပိုမိုများပြားလာကြောင်း ဒေသတွင်းသတင်းများအရ သိရသည်။
လက်ရှိတွင် MNDAA က ကိုးကန့်ဒေသကို အထူးဒေသ – ၁ အဖြစ် သတ်မှတ်ကာ ကွတ်ခိုင်၊ သိန္နီ၊ မုံးကိုးနှင့် လောက်ကိုင် စသည့် ခရိုင် ၄ ခုဖြင့် အုပ်ချုပ်နေသည်။
#MeKongnews
#တရုတ်
#တစ်ရှုးငှက်ပျော
#သိန္နီဒေသခံ
#စိုက်ပျိုးမြေ
#MNDAA
