မဲခေါင်၊ ဇန်နဝါရီ ၂၆
ရှမ်းပြည်တောင်ပိုင်း ၊ တောင်ကြီးမြို့၊ ကန်ကြီးရပ်ကွက်တွင် ၂ တန်းကလေးငယ်တစ်ဦးကို ကားဖြင့် ဖမ်းခေါ်ကာ ပြန်ပေးဆွဲခဲ့သည့် အမျိုးသားတစ်ဦးကို ဖမ်းဆီးမိကြောင်း ဒေသခံများထံမှ သိရသည်။
ပြီးခဲ့သည့် ဇန်နဝါရီ ၂၃ ရက်တွင် ကလေးကို ဖမ်းခေါ်သွားပြီး မိဘကို ကျပ်သိန်း ၃ ထောင်ဖြင့် ပြန်ရွေးခိုင်းကာ ၂၄ ရက်တွင် ညောင်ရွှေမြို့ အဝင်ဂိတ်တွင် ကလေးနှင့်အတူ ပြန်ပေးဆွဲသူကို ဖမ်းမိခဲ့ကြောင်း သိရသည်။
“ကလေးက အိမ်ရှေ့မှာ ဆော့နေတာ။ အဲလူက ရောက်လာပြီး ကလေးကို ကားပေါ်တင်ပြေးတယ်။ နောက်တစ်နေ့မှ ကလေးကို ဖမ်းသွားတဲ့ကား ညောင်ရွှေမှာတွေ့တာ အဲတာနဲ့ ရပ်ကွက်ကလူတွေ လိုက်သွားတော့ အဲကားက မောင်းပြေးသွားတယ်။ မောင်းပြေးပြီး ညောင်ရွှေဂိတ်နား ရောက်တော့ ပြန်ပေးဆွဲတဲ့ကောင်ကို ရပ်ကွက်က ကားတွေနဲ့ တိုက်ပြီး ပိတ်ဖမ်းလိုက်တယ်။ကလေးတော့ ဘာမှမဖြစ်ဘူး။ ပြန်ပေးဆွဲဖို့ လုပ်တဲ့သူတော့ ရဲဖမ်းသွားတယ်”ဟု ဒေသခံတစ်ဦးက မဲခေါင်သို့ ပြောသည်။
ပြန်ပေးဆွဲခံရသော ကလေး၏ မိဘများသည် ချမ်းသာသူဖြစ်ပြီး ယခုလို ဖြစ်စဉ်ကြောင့် တောင်ကြီးမြို့ခံများ စိုးရိမ် ထိတ်လန့်ကြရကြောင်း ၎င်းက ဆိုသည်။
“ရပ်ကွက်လဲသန့်တယ်နော် အဲဒါတောင် မလုံခြုံတော့ဘူး။။ တောင်ကြီးမြို့လေးလဲ မကြားဖူးတာတွေ ကြားနေရပြီ။ ခုလိုလုပ်တဲ့သူကို ထိထိရောက်ရောက် အရေးယူသင့်ပါတယ်”ဟု ၎င်းက ဆက်ပြောသည်။
ပြီးခဲ့သည့် ဒီဇင်ဘာ ၂၄ ရက်တွင်လည်း တောင်ကြီးမြို့၊ ဘုရားဖြူရပ်ကွက် အထက (၄) Grade 10 ကျောင်းသား မောင်အနဂ္ဂရဲထက်သည် ဆိုင်ကယ် လုယက်ခံရပြီး သတ်ဖြတ်ခံခဲ့ရသေးကြောင်း မြို့ခံများထံမှ သိရသည်။
စစ်ကောင်စီတပ်နှင့် ပအိုဝ်းပြည်သူ့စစ် – PNO တို့ ကြီးစိုးရာ တောင်ကြီးမြို့ပေါ်တွင် ယခုလို ဖြစ်ပွားခြင်းသည် တရားဥပဒေစိုးမိုးမှု မရှိသည်ကို ပြသနေခြင်းဖြစ်ကြောင်း မြို့ခံများက ပြောသည်။
ထို့ပြင် ခိုးဆိုးလုယက်မှု မကြာခဏ ဖြစ်နေသော်လည်း စစ်ကောင်စီတပ်များက အရေးယူနိုင်ခြင်း မရှိသောကြောင့် မြို့ခံများအနေဖြင့် မိမိလုံခြုံရေးကို စိုးရိမ် ကြောက်လန့်နေကြရကြောင်း သိရသည်။
#MeKongNews
#တောင်ကြီး
#ကလေးငယ်
#ပြန်ပေးဆွဲ
#ဖမ်းမိ
