မဲခေါင် ၊ ဇန်နဝါရီ ၈
လမ်းများ မတ်စောက်သဖြင့် မောင်းရခက်ခဲခြင်း၊ လမ်းအရည်အသွေး ညံ့ဖျင်းခြင်းကြောင့် ကုန်တင်ယာဉ်ကြီးများ မကြာခဏ တိမ်းမှောက်တတ်သဖြင့် တောင်ကြီး – ရွှေညောင် မြို့ရှောင်လမ်းကို သေမင်းတမန်လမ်းဟု ကားသမားများက ကင်ပွန်းတပ်နေကြသည်။
ယခုလ ပထမပတ်အတွင်းမှာပင် ယင်းမြို့ရှောင်လမ်းပေါ်တွင် ကုန်တင်ယာဉ်ကြီးများ ၅ စီးထက်မနည်း တိမ်းမှောက်ခဲ့သည်။
ယခုလ ၂ ရက်၊ ၄ ရက် ၊ ၅ ရက်နှင့် ၆ ရက်တို့တွင် ကားကြီးများ တိမ်းမှောက်ခဲ့ပြီး ကုန်စည်ပစ္စည်း ဆုံးရှုံးမှုလည်း များပြားခဲ့သည်ဟု ကားသမားတစ်ဦးက ပြောသည်။
“ဒီလမ်းကို သွားခိုင်းကတည်းက ခဏခဏ မှောက်နေတာ လမ်းက ကားကြီးတွေ ကုန်သယ်ဖို့ မသင့်တော်တဲ့လမ်းပါ။ ၅ ရက်ဆို တစ်ရက်တည်း ၂ စီးမှောက်တယ်။ ဒါကြောင့် လမ်းအရည်အသွေးက အစ ကားသမားတွေကို သတ်တာနဲ့ တူနေလို့ သေမင်းလမ်းလို့ပဲ ပြောချင်တယ်။”ဟု ကုန်ကားသမားတစ်ဦးက ပြောသည်။
တောင်ကြီး – ရွှေညောင် မြို့ရှောင်လမ်းသည် လမ်းအတက်အဆင်း ရှည်ပြီး မတ်စောက်သည့် အပြင် လမ်းအရည် အသွေးလည်း ညံ့သဖြင့် ကားကြီးများ ဘရိတ်ပေါက်ကာ မကြာခဏ တိမ်းမှောက်ရခြင်း ဖြစ်ကြောင်း အခြား ကားသမားတစ်ဦးက ပြောသည်။
“မြို့ရှောင်လမ်းလို့ မခေါ်သင့်တော့ဘူး။ သေမင်းတမန်လမ်းလို့ ပြောင်းခေါ်သင့်နေပြီ၊ ၁၂ ဘီးတောင် ဂီယာ ၁ နဲ့ပဲ ဆင်းတော့တယ်။ လမ်းတွေကလည်း စုတ်နေပြီ၊ ကတ္တရာသားလည်း မရှိတော့ဘူး။ ဘရိတ်ပျောက်ရင် ကားပါအပျောက်ပဲ ကားသေးတွေ ဆိုင်ကယ်တွေတောင်မှ မနည်းထိန်းရတယ်”ဟု ၁၂ ဘီးကား မောင်းသူတစ်ဦးက ပြောသည်။
ထိုသို့ လမ်းခက်ခဲခြင်းကြောင့် အချို့ ကုန်တင်ကားကြီးများသည် လမ်းပေါ်တွင် ရေဖျန်းကာ မောင်းကြရပြီး ကားကြီးများက ယင်းကဲ့သို့ မောင်းနှင်မှု များပြားလာသဖြင့်လည်း လမ်းချော်မှုများကြောင့် ကားငယ်များ ဆိုင်ကယ်များ သွားလာရ ခက်ခဲပြန်သည်ဟု ကားသမားတစ်ဦးက ပြောသည်။
“ရေမဖျန်းရင် ဖုန်တွေကထ လမ်းတွေဆိုးနဲ့ ကားကြီးအတွက် ခက်ခဲပြန်တယ်။ ကားကြီးတွေ ရေဖျန်းဆင်းတော့လည်း ကုန်ကားအငယ်တွေ အိမ်စီးကားတွေ ဆိုင်ကယ်တွေအတွက် အန္တရာယ်ရှိပြန်ရော” ဟု သတင်းရင်းမြစ်တစ်ဦးက ပြောသည်။
ယခင်တွင် ကုန်ကားကြီးများသည် တောင်ကြီးမြို့အနောက်မြို့ပတ်လမ်းမှ သွားလာကြခြင်းဖြစ်သော်လည်း စစ်တပ်က အာဏာသိမ်းပြီးနောက် မြို့ထဲသို့ ဝင်ခွင့်မပေးတော့ဘဲ တောင်ကြီး မြို့ရှောင်လမ်းမှ သွားလာခိုင်းခဲ့ခြင်း ဖြစ်သည်။
#MeKongNews
#တောင်ကြီး
#လမ်းအရည်အသွေး
#ညံ့ဖျင်း
#ယာဉ်တိုက်မှု
#သေမင်းတမန်လမ်း
