မဲခေါင်၊ နိုဝင်ဘာ ၂၂
စစ်ကောင်စီ ထုတ်ပြန်သည့် ရွေးကောက်ပွဲကာကွယ်ရေးဥပဒေသည် လွတ်လပ်စွာ ထုတ်ဖော်ပြောဆိုခွင့်ကို တိုက်ရိုက်ချိုးဖောက်နေပြီး ယင်းကိုလက်နက်သဖွယ် အသုံးပြုနေကြောင်း မြန်မာအင်တာနက်ပရောဂျက်က ထုတ်ပြန်သည်။
၂၀၂၅ ရွေးကောက်ပွဲတွင် စနစ် ၂ မျိုးဖြင့် ရောနှော ကျင်းပမည်ဖြစ်ကြောင်း စစ်ကောင်စီက ကြေညာထားပြီး ရွေးကောက်ပွဲကို ဟန့်တား နှောင့်ယှက်ဖျက်ဆီးလျှင် အနည်းဆုံး ထောင်ဒဏ်သုံးနှစ်မှ အများဆုံး ထောင်ဒဏ်တစ်သက်တစ်ကျွန်း နှင့် သေဒဏ်အထိ ချမှတ်ခံရမည့် “ရွေးကောက်ပွဲများကို နှောင့်ယှက်ဟန့်တားဖျက်ဆီးခြင်းမှ ကာကွယ်ပေးရေးဥပဒေ” ကိုလည်း ပြဋ္ဌာန်းထားသည်။
ယင်းဥပဒေကို စတင်ထုတ်ပြန်သည့် ဇူလိုင် ၂၉ ရက်မှ အောက်တိုဘာ ၂၉ ရက်အထိ ၃ လတာအတွင်း ယင်းဥပဒေဖြင့် လူဦးရေ ၉၀ နီးပါး ဖမ်းဆီးအရေးယူခံခဲ့ရကြောင်း မြန်မာအင်တာနက်ပရောဂျက်၏ မှတ်တမ်းအရ သိရသည်။
အဖမ်းခံရသူ အများစုသည် လူမှုကွန်ရက်၌ ပို့စ်တင်၍ထုတ်ဖော်ပြောဆိုခြင်း၊ တင်ထားသောပို့စ်အား တုံ့ပြန်ခြင်းများမှတစ်ဆင့် အရေးယူခံရခြင်းဖြစ်ကြောင်း သိရသည်။
ထိုသို့ အရေးယူမှုများကို မြန်မာအင်တာနက်ပရောဂျက်က အမည်နှင့်တကွ မှတ်တမ်းတင်ခဲ့ရာတွင် စုစုပေါင်း ၃၂ ဦးရှိပြီး အမျိုးသား ၂၉ ဦး နှင့် အမျိုးသမီး ၃ ဦးဖြစ်ကာ ရန်ကုန်တိုင်းမှ ၁၄ ဦး၊ ကရင်နီပြည်နယ်မှ ၅ ဦး၊ ရှမ်းပြည်မှ ၂ ဦး၊ ပဲခူးတိုင်းမှတစ်ဦး၊ ဧရာဝတီတိုင်းမှ ၂ ဦး၊ ကရင်ပြည်နယ်မှ ၂ ဦး၊ မွန်ပြည်နယ်မှတစ်ဦးနှင့် မြို့နယ်အတည်မပြုနိုင် သေးသူ ၅ ဦးပါဝင်ကြောင်း တွေ့ရသည်။
ထိုသို့ အခြေအနေများသည် လွတ်လပ်စွာ ထုတ်ဖော်ပြောဆိုခွင့်အား ဥပဒေလက်နက်ဖြင့် ဖိနှိပ်ကန့်သတ်ခြင်းဖြစ်ပြီး အတုအယောင် ရွေးကောက်ပွဲအပေါ် အများပြည်သူ၏ သဘောထားများကို ထုတ်ဖော်ခွင့်မပေးဘဲ နှုတ်ပိတ်နေစေရန် ခြိမ်းခြောက်နေသော အားထုတ်မှုဖြစ်သည်ဟု မြန်မာအင်တာနက်ပရောဂျက်က ဆိုသည်။
#MeKongNews
#စစ်ကောင်စီ
#ရွေးကောက်ပွဲကာကွယ်ရေးဥပဒေ
#မြန်မာအင်တာနက်ပရောဂျက်
#ဖမ်းဆီးအရေးယူ
