မဲခေါင်၊ နိုဝင်ဘာ ၁
ရှမ်းပြည်မြောက်ပိုင်း၊ လားရှိုးမြို့တွင် စစ်ကောင်စီနှင့် MNDAA တို့ ယမန်နေ့ အောက်တိုဘာ ၃၁ရက်က ထပ်မံတွေ့ဆုံကြောင်း MNDAA နှင့်နီးစပ်သူ ဒေသခံများထံမှ သိရသည်။
ယင်းတွေ့ဆုံမှုမှာ ပြီးခဲ့သည့် စက်တင်ဘာ ၁၆ရက် တွေ့ဆုံအပြီး တစ်လခွဲခန့်အကြာတွင် ထပ်မံတွေ့ဆုံကြခြင်းဖြစ်ပြီး ယခင်အတိုင်း ဆင်နှစ်ကောင်ဟိုတယ်တွင်ပင် ပြုလုပ်ခဲ့ခြင်းဖြစ်ကာ သိန္နီမြို့ပြန်ပေးရန်ကိစ္စ အဓိကဆွေးနွေးကြောင်း MNDAA နှင့် နီးစပ်သူတစ်ဦးက ပြောသည်။
“သိန္နီပြန်ပေးဖို့ ကိုးကန့်မှာ အစီအစဉ် မရှိဘူးခင်ဗျ။ သိရသလောက် တရုတ်လုပ်ငန်းရှင်တွေပါ စစ်တပ်အကြပ်ရိုက်အောင် ခေါ်ထည့်ထားတယ်။ တချို့တော့ ပြန်ရုပ်သွားတာရှိတယ်။ လားရှိုးမြို့နယ်ထဲက ထိမ်းချုပ်ဒေသတွေကိုလဲ တရုတ်ကျောင်းတွေ ထပ်ဆောက်တာ၊ စာသင်ကျောင်းတွေ ပြုပြင်တာ၊ ဂိတ်တွေ ထပ်တိုးချတာ၊ ခံစစ်ပြင်တာတွေ လုပ်ထားတယ်” ဟု ၎င်းက မဲခေါင်သို့ ပြောသည်။
တွေ့ဆုံမှုမှာ နံနက် ၉နာရီခန့်မှ ညနေ ၃နာရီကျော်အထိ ကြာမြင့်ခဲ့ပြီး ဆွေးနွေးမှုအသေးစိတ်ကိုမှု ၂ဖက်တပ်များ ယခုချိန်ထိ ထုတ်ပြန်မှု မရှိသေးပေ။
ဆွေးနွေးမှုများတွင် သိန္နီပြန်ပေးရေး၊ တရုတ်က ဖမ်းထားဆဲ MNDAA ခေါင်းဆောင် ၄ဦး ပြန်လွှတ်ရေးနှင့် တရုတ်ဘက်က ပိတ်ထားသည့် ဘဏ်အကောင့်များ ဖွင့်ပေးရေးတို့ပါဝင်နိုင်ကြောင်း သတင်းရင်းမြစ်တစ်ဦးက သုံးသပ်သည်။
“တရုတ်က ဘဏ်အကောင့်တွေ ပိတ်ထားလို့ ငွေကြပ်နေတာကို ဖြေရှင်းဖို့၊ သိန္နီနဲ့ လားရှိုး နယ်တဝိုက်က လယ်မြေတွေ တရုတ်တွေကို ဇွတ်မြူဆွယ်လုပ်ခိုင်းတာဟာ ဘတ်ဂျက်လိုငွေ ဖာဖို့ပါပဲ။ သိန္နီစျေးအငှားချတာက အစပေါ့” ဟု ၎င်းက ပြောသည်။
ရှမ်းမြောက်စစ်ဆင်ရေးများတွင် အမှန်တကယ် စစ်ရှုံးသူမှာ အာဏာသိမ်းစစ်တပ်ပင်ဖြစ်ကြောင်း ရှမ်းမြောက် စစ်ဆင်ရေးများနှင့် လက်ရှိ နိုင်ငံရေးစစ်ရေးအခြေအနေနှင့် ပတ်သက်၍ ရှမ်းပြည်နိုင်ငံရေးအကဲခတ် နိုင်ကျဥ်းတစ်ဦးကသုံးသပ်သည်။
“တကယ်တမ်းကြ တကယ်ရှုံးတာက စစ်တပ်၊ လားရှိုးကို ပြန်ပေးပြီး မြို့အများကြီး MNDAA ကယူသွားတာ။ MNDAA က ချင်းရွှေဟော်၊ လောက်ကိုင်၊ ကုန်းကြမ်း၊ မော်ထိုက်၊ ဖောင်းဆိုင်၊ မုံးကိုး၊ ကြူကုတ်၊ ကွမ်းလုံ၊ တာမိုးညဲ၊ သိန္နီ၊ လားရှိုးမြို့ ၁၀ မြို့သိမ်းပြီး လားရှိုးတစ်မြို့ပဲ ပြန်ပေးတာ။ TNLA လည်းသိမ်းတာ ၁၂မြို့၊ ၅ မြို့ပြန်ပေးတယ်။ ကျန်တဲ့ ၇မြို့ TNLA ဆီပါသွားပြီ။ TNLA က မန်တုံ၊ မိုးမိတ်၊ မိုင်းလုံ၊ မိုင်းငေါ့၊ နောင်ချို၊ ကျောက်မဲ၊ နမ့်ဆန်၊ နမ်ခမ်း၊ နမ္မတူ၊ ကွတ်ခိုင်၊ မိုးကုတ်၊ သီပေါမြို့ ၁၂ မြို့သိမ်းပြီး ၅ မြို့ပဲ စစ်တပ်ကပြန်ရတာ။ မူဆယ် ၁၀၅ မိုင်ဂိတ်လည်း ညီနောင်သုံးဖော်ကို ပေးလိုက်ရပြီ။ ဒါကို စစ်တပ်က သူတို့အနိုင်ရတာလို့ ထင်နေတာ” ဟု ၎င်းက ပြောသည်။
MNDAA ခေါင်းဆောင်ကမူ စစ်ရပ်စဲရေးသဘောတူညီချက်သည် စစ်မှန်သည့်ငြိမ်းချမ်းရေးမဟုတ်ကြောင်း အောက်တိုဘာ၂၅ရက်က သင်တန်းဆင်းပွဲ၌ ပြောထားသည်။
MNDAAသည် လက်ရှိ သိန္နီမြို့ကိုအုပ်ချုပ်ရေးပိုင်းများ တိုးမြှင့်လုပ်ဆောင်လျက်ရှိနေပြီး သိန္နီပြည်သူ့ဆေးရုံကိုလည်း အဆင့်မြင့်ဆေးရုံအဖြစ် အသစ်ပြန်လည်တည်ဆောက်နေသည့်အပြင် ရေပူစစ်ဆေးရေးဂိတ်ကိုလည်း ဖွင့်နိုင်ရန်ကြိုးပမ်းနေကြောင်း မြေပြင်သတင်းများအရသိရသည်။
တရုတ်၏ ကြားဝင်ဖိအားပေးမှုကြောင့် MNDAA နှင့် စစ်ကောင်စီတို့အကြား အပစ်ရပ်ခဲ့ပြီး MNDAA ထိန်းချုပ်သည့် လားရှိုးမြို့ပေါ်ရပ်ကွက်၁၂ခုကို ပြီးခဲ့တဲ့ ဧပြီလ၂၂တွင် စစ်ကောင်စီထံ ပြန်လည်လွှဲပြောင်းပေးခဲ့သည်။
#MeKongNews
#လားရှိုး
#စစ်ကောင်စီ
#MNDAA
#ရှမ်းမြောက်
#တရုတ်
