မဲခေါင်၊ ဩဂုတ် ၁၃
တောင်ကြီးမြို့အပါအဝင် ရှမ်းပြည်တောင်ပိုင်းရှိ ရပ်ကွက်အချို့၌ စစ်မှုထမ်းဆင့်ခေါ်ရာတွင် မဲနှိုက်ခြင်း၊ ငွေကြေးတောင်းခံခြင်းတို့ မပြုလုပ်တော့ပဲ ရုတ်တရက် ဧည့်စာရင်းဝင်စစ်သည့် ပုံစံဖြင့် လာရောက်ခေါ်ဆောင်မှု များလာကြောင်း ရှမ်းတောင်ဒေသခံများထံမှ သိရသည်။
တောင်ကြီးမြို့ပေါ်တွင် စစ်မှုထမ်းကင်းလွက်ရန်အတွက် လစဉ်ကြေးအနေဖြင့် ကျပ်၃သောင်းမှ တစ်သိန်းကျော်အထိ ရပ်ကွက်ပေါ်မူတည်ကာ ပေးဆောင်နေရသော်လည်း နောက်ပိုင်းတွင် နေအိမ်များအထိ ဧည့်စာရင်း ဝင်စစ်သည့် ပုံစံဖြင့် လာရောက်ကာ လူငယ်များကို ခေါ်ဆောင်နေကြောင်း တောင်ကြီးမြို့ခံတစ်ဦးက ပြောသည်။
ရပ်ကွက်အချို့တွင်မူ လိုင်စင်မဲ့ကားများ၊ ဆိုင်ကယ်များကို စစ်ဆေးသည့် ပုံစံဖြင့် လူငယ်ဆိုပါက တပါတည်း ဖမ်းဆီးခေါ်ဆောင်သွားသည့် အခြေအနေများလည်းရှိလာကြောင်း၊ ထို့ကြောင့် ညဘက်တွင် တောင်ကြီးမြို့ပေါ်၌ အသွားအလာကြဲပါးလာကြောင်း ၎င်းကပြောသည်။
အလားတူ ရှမ်းပြည်တောင်ပိုင်းရှိ မြို့ရွာများတွင်လည်း စစ်မှုထမ်းဆင့်ခေါ်ရာတွင် လစဉ်ငွေကြေးကောက်ခံသည့်အပြင် ကြိုတင်အသိပေးခြင်း မရှိပဲ ရပ်ကွက်အုပ်ချုပ်ရေးမှူးနှင့် ရဲ ၂ဦး ပါဝင်သည့် လူစုက လူငယ်များစာရင်းရှိရာ အိမ်သို့ ဝင်ရောက်ခေါ်ဆောင်သည့် ပုံစံကို ကျင့်သုံးလာကြောင်း ဒေသခံများထံမှ သိရသည်။
“အိမ်ထောင်စုစာရင်းကို ကိုင်ပြီးတော့ တိုက်ရိုက်လာခေါ်တာ။ ဆင့်ခေါ်ခံရတဲ့လူက တိမ်းရှောင်မယ်ဆိုရင် ကျန်တဲ့မိသားစုကို ပြသနာရှာ ခြိမ်းခြောက်တယ်” ဟု ရှမ်းတောင် ဒေသခံတစ်ဦးက ပြောသည်။
စစ်ကောင်စီသည် စစ်မှုထမ်းဥပဒေကို ၂၀၂၄ ခုနှစ်တွင် စတင်ခဲ့ပြီး လက်ရှိတွင် အပါတ်စဉ် ၁၅ အထိ ဆင့်ခေါ်ခဲ့ပြီး ဖြစ်ကာ စုဆောင်းခံရသည့် စစ်မှုထမ်းလူငယ်များနှင့် ဆုံးရှုံးသွားသည့် နေရာတချို့ကို ပြန်လည်ထိုးစစ်ဆင်နေသည်။
တောင်ကြီးမြို့နယ်အတွင်း တော်လှန်ရေးလူငယ်များ ဝင်ရောက်လာသည် ဟု အကြောင်းပြချက်ဖြင့် PSMS နည်းပညာကို အသုံးပြုကာ ဟိုတယ်၊ တည်းခိုခန်းများ၊ မြို့ဝင် မြို့ထွက် စစ်ဆေးရေးဂိတ်များနှင့် မော်တော်ယာဉ်လိုင်းများတွင် စစ်ဆေးမှုတို့ကို ပြုလုပ်မည် ဟု ဒေသန္တရအမိန့်ကို ထွေအုပ်က ဩဂုတ်လ ၄ ရက်နေ့တွင် ထုတ်ပြန်ထားသည်။
စစ်မှုထမ်းအပါတ်စဉ် ၁၅ အထိ ရောက်ရှိလာသည့်အချိန်တွင် အစောပိုင်းအပတ်စဉ်များ၌ စစ်မှုထမ်း ခေါ်ဆောင်ခံရသူ လူငယ်များ စစ်မြေပြင်တွင် သေဆုံးမှု မြင့်ပြီး အချိန်ကြာမြင့်သည့်အထိ မိသားစုဝင်များကို အသိမပေးသည့် ဖြစ်စဉ်များလည်း ရှိနေသည်။
ဖေသန်း
#MeKongNews
#တောင်ကြီးမြို့
#စစ်မှုထမ်းဆင့်ခေါ်
#အပါတ်စဉ်၁၅
#ဧည့်စာရင်းစစ်
#လူငယ်
