မဲခေါင်၊ သြဂုတ် ၅
ရှမ်ပြည်တောင်ပိုင်း၊ တောင်ကြီးမြို့နယ်အတွင်း ပါဝင်သည့် တောင်လေးလုံးကျေးရွာအုပ်စု၊ ဘုရားနီကျေးရွာရှိ ရှေးဟောင်းသမိုင်းဝင် နန်းဦး ဘုရားနီ စေတီတော်ကြီးမွမ်းမံရေးလုပ်ငန်းတွင် ရပ်စောက်ကိုရင်လေး ဦးဆောင်သည့် ပြည်သူ့စစ်အဖွဲ့က ၎င်းတို့ စိတ်ထင်သည့်အတိုင်း ထင်ရာစိုင်းပြုမူဆောင်ရွက်နေသဖြင့် လုပ်ငန်းများ ရပ်ဆိုင်းကာ ထွက်ခွာသွားရန် ဆရာတော်များနှင့် တာဝန်ရှိသူများက ဇူလိုင်လ ၃၁ ရက်တွင် အစည်းအဝေးပြုလုပ် ဆုံးဖြတ်လိုက်သည်။
ယင်းအစည်းအဝေးမှတ်တမ်းတွင် ဘုရားနီကျောင်း ဆရာတော်နှင့် သံဃာတော်များမှ ရပ်စောက်ကိုရင်လေး၏ ပအိုဝ်းပြည်သူ့စစ်ခေါင်းဆောင် ဦးဂျော်နီ ဦးဆောင်သည့်အဖွဲ့သည် သက်ဆိုင်ရာ သံဃာတော် ဆရာတော်များကို တင်ပြလျှောက်ထားခြင်း မရှိဘဲ ဂေါပကအဖွဲ့ ရှိလျက်နှင့် ကိုယ့်သဘောနဲ့ကိုယ် ဂေါပကအသစ်ဖွဲ့ခြင်း၊ သံဃာသုံးကုဋီနှင့် ရေချိုးခန်းများကို သော့များရိုက်ချိုး၍ အသုံးပြုခြင်း၊ သစ်ပင်များ ခုတ်ခြင်း၊ အဆောက်အဦ ထရံများဖြိုချကာ အသစ်ကာခြင်း၊ စေတီတော်နှင့်ကျောင်းဆောင်နီအကြား တံတိုင်းခတ်ခြင်း၊ ရှေးမူမပျက် ထားရမည့်အစား မိမိသဘောနှင့် အရန်စေတီများတည်ရန် လုပ်ဆောင်နေခြင်း၊ ကျောင်းဝန်းအဝင်အထွက်တွင် ပြည်သူ့စစ်ဝတ်စုံဝတ် လက်နက်များကိုင်ဆောင်သည့် အစောင့်များထားရှိပြီး ယင်းအစောင့်များက ရဟန်းသံဃာများ၊ ကျောင်းလာ ဒါယိကာ၊ ဒါယိကာမများအား စစ်ဆေးခြင်း၊ စစ်မေးခြင်းများပြုလုပ်နေသဖြင့် ပြည်သူ့စစ်များကို ဖယ်ရှားပေးနိုင်ရေး ရပခစစ်တိုင်းမှူးထံ အကြောင်းကြားခဲ့သည့်အပေါ် ဖြေရှင်းဆောင်ရွက်သည့် အစည်းအဝေးမှတ်တမ်းဖြစ်ကြောင်း တွေ့ရသည်။
“ဘုရားပြင်ဖို့ အကြောင်းပြချက်နဲ့လာရာက ဘုရားနီဆရာတော်ရဲ့အပိုင်ကို လက်နက်အားကိုးနဲ့ လုပ်ချင်ရာလုပ်လာတာ၊ ရပ်စောက်ကိုရင်လေးကို ဒီအခြေအနေနဲ့ပတ်သက်လို့ အသိပေးဖို့နဲ့ သဘောထားကို မေးမြန်းဖို့ သူ့အဖွဲ့ကိုတာဝန်ပေးထားတာ၊ ခုထိ သွားလား၊ မသွားလားတော့ မသိရသေးဘူး” ဟု ယင်းကိစ္စကို သိသူတစ်ဦးက မဲခေါင်ကို ယနေ့ သြဂုတ်လ ၅ ရက်တွင် ပြောသည်။
ပြီးခဲ့သည့် ဇူလိုင်လ ၃၁ ရက် နံနက် ၁၀ နာရီက ယင်းကိစ္စကို ဘုရားနီကျေးရွာတွင် အစည်းအဝေးပြုလုပ်ခဲ့ရာ ယင်းအစည်းအဝေးမှ ပအိုဝ်းပြည်သူ့စစ် ဦးဂျော်နီ၏ သဘောတူညီချက်အရ လာမည့် သြဂုတ်လ ၃၁ရက် နောက်ဆုံးထား၍ တဲများ၊ ပစ္စည်းများကို မယူလိုက လှူပြီး ထွက်ခွာသွားရန် ဆုံးဖြတ်ချက်ချခဲ့ကြကြောင်း သိရသည်။
ယင်းအစည်းအဝေးသို့ သံဃာတော် ၁၂ ပါးနှင့် စစ်ကောင်စီ၏ တောင်ကြီးတပ်နယ်၊ နယ်မြေ ၂ မှူး အပါအဝင် အုပ်ချုပ်ရေးနှင့်မှတ်တမ်းတင် ၂၅ ဦး တက်ရောက်ပါဝင်ခဲ့ပြီး အစည်းအဝေးကို မွန်းလွဲ ၁၂ နာရီခွဲတွင် ရုပ်သိမ်းခဲ့ကြောင်း သိရသည်။
ယင်းအစည်းအဝေးမှတ်တမ်းကို ဇူလိုင်လ ၃၁ ရက်စွဲဖြင့် မှတ်တမ်းတင်သူ ဒုမှူးကြီးနေမျိုးအောင်က လက်မှတ်ရေးထိုးပြီး ရပခတိုင်းမှူးထံ သြဂုတ်လ ၁ ရက်က ပေးပို့ထားကြောင်း သိရသည်။
ယခုကိစ္စဖြစ်ပွားရာ ဘုရားနီ စေတီတော်သည် ရှေးဟောင်း သမိုင်းဝင်စေတီတော် တစ်ဆူဖြစ်ပြီး ၊ ညောင်ရွှေမြို့နယ်၊ ကောသမ္ဘီမြို့ဟောင်းရှိ ပေါရိသတ် စေတီတော်နှင့် မောင်တည်၊ နှမတည် စေတီတော်များ ဖြစ်ကြောင်း ပါးစပ်ရာဇဝင် ရှိခဲ့သည်။
ယင်းဘုရားနီ စေတီတော် ဘုရားကုန်းသည် ခေတ်အဆက်ဆက် ပြုပြင်သူမရှိသဖြင့် ယိုယွင်းနေရာမှ ရပ်စောက်မြို့နယ် အင်ကြင်းတောရကျောင်း ကိုရင်လေး ဇဋိလ (ဗုဒ္ဓရာဇာသာသနာပြုအဖွဲ့) ဦးဆောင်၍ ပြန်လည် မွမ်းမံပြီး ပြီးခဲ့သည့် တပေါင်းလပြည့် မတ်လ ၁၄ ရက်က ထီးတော်တင်ပွဲ ပြုလုပ်ခဲ့သေးသည်။
#MeKongNews
#ကိုရင်လေးပြည်သူ့စစ်
#ဘုရားနီ
#ဦးဂျော်နီ
#နန်းဦးဘုရားနီစေတီ
