မဲခေါင်၊ ဇွန် ၁၃
စစ်ကောင်စီ ပြန်လည်ထိန်းချုပ်ထားသည့် ရှမ်းပြည် မြောက်ပိုင်း၊ လားရှိုးမြို့တွင် သေနတ်ကိုင်လူတစ်စုက ‘ထိုက်’ ဖုန်းဆိုင်အား ဓားပြတိုက်ကာ ဖုန်းနှင့်ငွေများ ယူဆောင်သွားကြောင်း သိရသည်။
ယမန်နေ့ ဇွန်လ ၁၂ ရက်နေ့၊ နေ့လယ် ၂ နာရီခွဲခန့်တွင် လားရှိုးမြို့လယ်၊ မန်ဆူဘုရားရှေ့တွင် ဖွင့်လှစ်ထားသည့် ‘ထိုက်’ဖုန်းအရောင်းဆိုင်သို့ သေနတ်ကိုင်ထားသည့် လူ ၅ ယောက်မှ Crown ကားအဖြူနှင့်လာရောက်ကာ ဓားပြတိုက်ယူသွားသည်ဟု ဓားပြတိုက်ခံရသူ ဆိုင်ပိုင်ရှင်နှင့် နီးစပ်သူက ပြောသည်။
“(ဆိုင်ပိုင်ရှင်က) မန္တလေးသွားရာက ပြန်အတက်မို့ ဆိုင်မှာမရှိဘူး။ ဆိုင်ဝန်ထမ်း ကလေးမလေး ၄ ယောက်ကို ဓားပြမတိုက်ခင် ၁၀မိနစ်လောက်မှာ iPhone ပြခိုင်းပြီးမှ ခဏနေပြန်လာမယ်ပြောပြီး နောက်ပြန်လာပြီး ဓားပြတိုက်တာ” ဟု ၎င်းကပြောသည်။
ယင်းနောက် Crown ကားအဖြူနှင့် ပြန်လာပြီး Mask မတပ်ထားသည့် ၂ ယောက်က ဖုန်းများကို ပြန်ပြခိုင်း၍ ထုတ်ပြစဥ် ကားပေါ်မှ Mask တပ်ထားသည့် ၃ ယောက် ထပ်ဆင်းလာပြီး သေနတ်နဲ့ချိန်ကာ ဖုန်းများနှင့် ငွေများကို ဆာလာအိတ်နှင့် ထည့်ယူသွားခြင်း ဖြစ်ကြောင်း ဆိုင်ပိုင်ရှင်နှင့် နီးစပ်သူထံမှ သိရသည်။
“အဲအချိန် ဆိုင်ထဲမှာ ဝယ်သူနှစ်ယောက်ရှိတာမှာ ယောက်ျားလေးကို ဒူးထောက်ခိုင်းပြီး သေနတ်နဲ့ချိန်ထားတယ်။ ပြီးတော့ လူတွေကို ဘာမှမလုပ်ဘဲထွက်သွားတာ တော်သေးတယ်။ CCTV က Hard Disk ကို ဖြုတ်ယူသွားတယ်” ဟု ၎င်းက ဆိုသည်။
ဓားပြတိုက်မှုကြောင့် iPhone အသစ်နှင့် တပတ်ရစ်များအားလုံး ဆိုင်ရှိငွေများအားလုံး ယူဆောင်သွားခံရကြောင်း သိရသည်။
ယခုရက်ပိုင်းအတွင်း ယင်း Crown ကားအဖြူရောင်ဖြင့် လူ ၅ဦးက လားရှိုးမြို့ပေါ်တွင် လုယက်မှုများ ကျူးလွန်နေပြီး ယင်းအဖွဲ့ဟု ယူဆရသည့် အဖွဲ့၏ လုယက်ခံရသူတစ်ဦးကလည်း “ကျမကိုလည်း သေနတ်နဲ့ထောက်ပြီး ဆွဲကြိုးဖြတ်သွားတာ Crown ခဲဖြူနဲ့ လူ ၅ ယောက် Mask တောင်မတပ်ဘူးဗျာ။ တစ်ယောက်က မျက်နှာမှာ ဝက်ခြံတွေ အများကြီးနဲ့ပဲ” ဟု ပြောကြားသည်။
ပြီးခဲ့သည့် မေလ ၂၈ ရက်၊ နေ့လယ် ၁ နာရီခွဲဝန်းကျင်ကလည်း ရပ်ကွက် ၁၂၊ ခိုလောင်း တရုတ်ကျောင်းလမ်းရှိ ကားဘော်ဒီရုံတွင် ပြုပြင်နေသည့် Landcruiser အနက်ရောင် တစ်စီးနှင့် Crown အဖြူရောင် တစ်စီးကို ကားတစ်စီးဖြင့် ရောက်လာသည့် လူ ၃ ဦးက သေနတ်ကိုင်ခြိမ်းခြောက်ကာ လုယက်သွားမှု ဖြစ်ခဲ့သေးသည်။
လားရှိုးတွင် သေနတ်ဖြင့် လုယက်ဓားပြတိုက်မှုများ ခပ်စိပ်စိပ်ဖြစ်ပေါ်နေသဖြင့် ဒေသခံများအထူးသတိပြုကြရန် အချင်းချင်းသတိပေးနေလျက်ရှိသည်။
အုပ်ချုပ်ရေးကမူ လားရှိုးအထွက် ရေပူစမ်း လမ်းဆုံရှိ စုပေါင်းဂိတ်တွင် လာသမျှကားများကို စစ်ဆေးဖမ်းဆီးနေသည့်အလုပ်သာရှိနေပြီး ဓားပြတိုက်လုယက်မှုများကို ထိရောက်စွာ ကာကွယ် ဖမ်းဆီးနိုင်မှုမရှိသည့်အပေါ် ဒေသခံများက ပြစ်တင် ဝေဖန်လျက်ရှိသည်။
စစ်ကောင်စီ လားရှိုးကို ပြန်လည်တာဝန်ယူသည့် ဧပြီလ ၂၂ ရက်မှ ယခုအထိ လုယက်သူများက ဓား၊ သေနတ်တို့ဖြင့်လမ်းပေါ်တွင် နေ့ခင်းကြောင် တောင်လုယက်နေသည်သာမက အိမ်အတွင်းထိ ဝင်ရောက် အကြမ်းဖက် လုယက်မှုများလည်း ရှိခဲ့ပြီး အမှုပေါင်း ၃၀ ကျော်ရှိခဲ့ပြီးဖြစ်သည်ဟု ဒေသခံများထံက သိရသည်။
မဟာ
#MeKongNews
#လားရှိုး
#ဖုန်းဆိုင်ဓားပြတိုက်
#ထိုက်ဖုန်းဆိုင်
#မန်ဆူဘုရား
