မဲခေါင်၊ ဧပြီ ၂၅

ရှမ်းပြည်အရှေ့ပိုင်း၊ တုံတာမြို့အနီးတွင် ကျိုင်းတုံမှ တောင်ကြီးသို့ ပြေးဆွဲသည့် ဒို့ညီနောင်ခရီးသည်တင်ယာဥ်လိုင်းမှ ယာဉ်တစ်စီး ဧပြီလ ၂၄ ရက် ညပိုင်းက ချောက်ထဲကျတိမ်းမှောက်သွားကြောင်း ယာဉ်ပေါ်ပါလာသည့် ခရီးသည်များထံမှ သိရသည်။

ယမန်နေ့ ဧပြီလ ၂၄ ရက်၊ ညနေ ၄ နာရီက ကျိုင်းတုံမှတောင်ကြီးသို့ ထွက်ခွာလာသည့် ဒို့ညီနောင်မှန်လုံယာဥ်ငယ်မှာ ည ၇ နာရီခွဲခန့်တွင်တုံတာမြို့အနီး ကိုးကွေ့တောင်ချောက်ထဲသို့ ထိုးကျခဲ့ခြင်းဖြစ်ပြီး ယာဉ်မောင်းဖြစ်သူမှာ အရက်မူးနေကာ မဆင်မခြင် မောင်းနှင်သည့်အတွက် ချောက်ထဲသို့ ကျရခြင်းဖြစ်ကြောင်း ခရီးသည်များက ပြောသည်။

ကျိုင်းတုံမှ ညနေ ၄ နာရီကျော် စတင်ထွက်ခွာကတည်းက ယာဉ်မောင်းမှာ မူးနေပြီး ချော်လဲကာ မျက်လုံးများလည်း နီရဲနေကြောင်း၊ ခရီးသည်များက ဂိတ်မှူးကို ဝိုင်းပြောမှသာ ယင်းကားသမားကို နောက်မှလိုက်ခိုင်းကာ အခြားကားသမားတစ်ဦးဖြင့် နောင်ချိုအထိ မောင်းခိုင်းကြောင်း၊ ပန်ကြူအရောက်တွင် အရက်မူးနေသည့် ကားသမားက ပြန်လည်မောင်းနှင်ပြီး အရှိန်ပြင်းပြင်းဖြင့် မောင်းနှင်ကာ လမ်းတွင် ဘီယာတစ်ဘူး ထပ်သောက်ကြောင်း ခရီးသည်တစ်ဦးက မဲခေါင်ကို ပြောသည်။

“ည ၇ နာရီကျော် မှောင်နေတာကိုကားတွေကို အတင်းကျော်တက်ပါတယ်။ လုံးဝအရှိန်မလျှော့ပါဘူး။ အဲလိုမောင်းလို့ ကိုးကွေ့တောင်ရဲ့ခြောက်ကွေ့မြောက်မှာ ကားချောက်ထဲကျတာပါရှင့်” ဟု ၎င်းက ပြောသည်။

ကားမှာ ချောက်ထဲကျသော်လည်း ကမူနှင့်သစ်ပင်ခံနေသည့်အတွက် အောက်ထဲမကျသဖြင့် သေဆုံးသူမရှိခဲ့ဘဲ ခရီးသည်များက ကားထဲတွင် ညပ်နေသည့် ယာဥ်မောင်းကိုပါ ဆွဲထုတ်ကယ်တင်ခဲ့ရကြောင်း သိရသည်။

ယာဥ်ပေါ်တွင် ခရီးသည် အမျိုးသား ၂ ဦး၊ ၄ နှစ်ခွဲ ကလေးငယ်အပါ အမျိုးသမီး ၆ ဦး ၊ စုစုပေါင်း ၈ ဦး ပါရှိရာ ရမခ သို့သွားမည့် ကိုယ်ဝန်ဆောင်သည်တစ်ဦး ခါးထိသွားပြီး ကျန်သူများ ဒဏ်ရာအနည်းငယ်ဆီရကြောင်း သိရသည်။

လမ်းခရီးအရ အစွဲဖြစ်သည့် လူ ၉ ဦး ဖြင့် အရက်အရမ်းမူးနေသူကို မောင်းနှင်စေခြင်း၊ ပန်ကြူအထိမောင်းပေးသည့် ယာဥ်မောင်းကလည်း ခရီးသည်များ၏ အသက်ကို လက်လွတ်စပယ် ပစ်ထားခဲ့ခြင်း၊ ခရီးသည်များက တောင်းပန်သည်ကိုပင် လျစ်လျူရှုယုံသာမက ပိုမို အရှိန်မြင့်မောင်းနှင်သည့် ယာဥ်မောင်းများကို တာဝန်ပေးခြင်းတို့ကြောင့် ဒို့ညီနောင်ကားဂိတ်ကို ခရီးသည်များက အပြင်းအထန် ဝေဖန်နေကြသည်။

“ရဲစခန်းမှာ စစ်တော့ အရက်တင်မက ဆေးပါကြောင်နေတယ်ယူဆလို့ ဆီးပါစစ်ပြီ။ အဲလို ငမူးကို မောင်းခိုင်းတဲ့ ဒို့ညီနောင်ဂိတ်က တာဝန်ရှိပါတယ်။ လမ်းမှာ အခြေအနေမဟန်မှန်းသိလို့ ဝင်မောင်းပေးမယ်ပြောလည်း မရပါဘူး။ အဲလိုပြောလို့ ပိုဆိုးပါတယ်။ ခုလိုဖြစ်တော့ ဘယ်သူမှ တာဝန်မယူပါဘူး။ ကံကြီးလွန်းလို့သာ မသေမပျောက်ကြတာပါ” ဟု အခြားခရီးသည်တစ်ဦးကလည်း ပြောသည်။

ခရီးသည်များမှာ မိမိအစီအစဥ်ဖြင့်မိမိ ခရီးဆက်ထွက်ကြရပြီး ခါးထိထားသည့် ကိုယ်ဝန်ဆောင်အမျိုးသမီးကိုမူ ကျိုင်းတုံသို့ ပြန်လည်သယ်ဆောင်သွားကြောင်း သိရသည်။

မူးနေသည့် ယာဥ်မောင်းဖြစ်သူ တောင်ကြီးမြို့နေ ကိုလဖစ် ၅၁ နှစ်ကို တုံတာနယ်မြေရဲစခန်းမှ ဖမ်းဆီးချုပ်နှောင် အမှုဖွင့်ထားကြောင်း သိရသည်။

#MeKongNews
#ဒို့ညီနောင်
#တုံတာ
#ကျိုင်းတုံ
#ခရီးသည်ယာဉ်
#ကိုးကွေ့တောင်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)