မဲခေါင်၊ မတ် ၂၈
ဖယ်ခုံမြို့နယ် အနောက်ဘက်ခြမ်းမှာရှိတဲ့ စစ်ရှောင်စခန်း နှစ်ခုမှာ ရေလိုအပ်နေတာကြောင့် သွားရောက်လှူဒါန်းဖြစ်တယ်လို့ စစ်ရှောင်အရေးကူညီပေးနေတဲ့ Dreams – အိမ်မက်များအဖွဲ့က တာဝန်ရှိသူက မတ် ၂၈ ရက်နေ့ကပြောပါတယ်။
“ စစ်ရှောင်စခန်းတွေက ရေဝယ်နိုင်သူရှိသလို မဝယ်နိုင်သူတွေလည်းရှိတယ်။ အများစုက မဝယ်နိုင်ကြတော့ တခါလှူရင် ရေဂါလံ ၂၀၀၀ ပျှမ်းမျှလှူဖြစ်ပါတယ်။ ရေကလည်း မရှိမဖြစ်လိုအပ်တာပေါ့နော်။ စစ်ရှောင်တွေက ရေအခက်အခဲအတွက် အကူညီလိုတာလည်းများတယ်ပေါ့နော်။ ခုတပတ်ထဲမှာ စစ်ရှောင်စခန်း ၇ ခုကို ရေလိုက်လှူဖြစ်ပါတယ်” လို့ သူက ပြောပါတယ်။
မိုးဗြဲမြို့၊ ဖယ်ခုံမြို့နဲ့ အနီးနားကျေးရွာတွေကနေ စစ်ဘေးရှောင်လာကြတဲ့ ပြည်သူတွေက စစ်ရှောင်ကာလ ၆ လကနေ ၂ နှစ်ကျော်အထိ စစ်ဘေးရှောင်နေကြရတယ်လို့ သိရပါတယ်။
ဖယ်ခုံမြို့အနောက်ဘက်ခြမ်းက ရေရှားပါးပြီး မိုးရေကိုပဲ သိုလှောင်သိမ်းဆည်းပြီး တနှစ်ပတ်လုံးအသုံးပြုရတာကြောင့် စစ်ဘေးရှောင်ပြည်သူတွေအတွက် အခက်အခဲဖြစ်နေရတာလို့ ဆိုပါတယ်။
စစ်ဘေးရှောင်ပြည်သူတွေက နေရပ်ပြန်မရတာတွေ၊ စီးပွားရေးလုပ်ကိုင်စားသောက်ဖို့ အခက်အခဲတွေနဲ့ နွေရာသီအချိန် တောင်ယာအငှားလိုက်ရတာတွေမရှိတာကြောင့် ပြည်တွင်းပြည်ပက အလှူရှင်တွေရဲ့ ကူညီထောက်ပံ့မှုနဲ့သာ ရှေ့ဆက်နေရတယ်လို့ စစ်ဘေးရှောင်ပြည်သူတွေဆီက သိရပါတယ်။
CJ004