မဲခေါင်၊ ဇန်နဝါရီ ၁၂
နွေဦးတက္ကသိုလ် ကျောင်းသား လူငယ်များရဲ့ နိုင်ငံရေး အတွေးအခေါ် စွမ်းရည်တွေ ရင့်သန်လာစေဖို့ ရည်ရွယ်ပြီးတော့ စကောလားရှစ် သင်တန်းတွေ အခု ဇန်နဝါရီလ အတွင်း ဖွင့်လှစ်သင်ကြား ပေးသွားမယ်လို့ School of Federalism and Peace Studies ကထုတ်ပြန်ပါတယ်။
ဖက်ဒရယ်ရေးရာ အခြေခံ ပညာရပ်များ၊ ငြိမ်းချမ်းရေးနှင့် ပဋိပက္ခဆိုင်ရာ သဘောတရား၊ လူမျိုးတုန်း သတ်ဖြတ်ခြင်း ဆိုင်ရာ လေ့လာမှု စတဲ့ အကြောင်းအရာတွေကို ကျောင်းသား လူငယ်တွေ ထပ်မံလေ့ လာနိုင်ဖို့ Introduction to Federalism ၊ Introduction to Peace and Conflict ၊ Genocide Studies စတဲ့ စကောလားရှစ် တန်းခွဲတွေ ဖွင့်လှစ်ပေးမှာ ဖြစ်ပါတယ်။
“Spring University Myanmar-SUM (နွေဦးတက္ကသိုလ်) ဆိုတာက တော်လှန်ရေး ကာလမှာ လူငယ်တွေ အနေနဲ့ ပညာသင်ကြားမှု ရပ်တန့်မသွားရအောင်၊ ဝါသနာပါတဲ့ ပညာရပ်တွေကို ဆက်လက် လေ့လာနိုင်အောင် ဖွင့်လှစ်ထားတဲ့ သင်တန်းကျောင်း တစ်ခုဖြစ်ပြီး ရရှိလာတဲ့ အကျိုးအမြတ်တွေကိုလည်း CDM သူရဲကောင်းတွေ၊ စစ်ဘေးရှောင် သွေးချင်းတွေဆီ လှူဒါန်းသွားမှာ ဖြစ်တယ်” လို့ Spring University Myanmar တာဝန်ရှိသူက ပြောပါတယ်။
သင်တန်း တက်ရောက်သူတွေ အနေနဲ့ ငြိမ်းချမ်းရေးနှင့် ပဋိပက္ခဆိုင်ရာ သဘောတရားတွေကို လေ့လာကြရမှာ ဖြစ်ပြီး ခေါင်းစဉ် အလိုက် အုပ်စုဖွဲ့ ဒါမှမဟုတ် တစ်ဦးချင်းစီ အပြန်အလှန် ဆွေးနွေးကြရတဲ့ နည်းလမ်းတွေနဲ့ သင်ကြားခွင့်ရမှာ ဖြစ်တယ်လို့ သိရပါတယ်။
“နွေဦးတက္ကသိုလ်ဟာ အခုနှစ်ထဲမှာ အမေရိကန်ရှိ Arizona State University နဲ့ ပူးပေါင်းကာ ကျောင်းသား ၃၀ ကို ပညာသင်ဆု ပေးအပ်ခဲ့သလို ချင်းမိုင်တက္ကသိုလ်နဲ့ ပူးပေါင်းကာ မြန်မာ ကျောင်းသား ၅ဝဝ ခန့်ကို ပထမဆုံး အကြိမ် သင်တန်းပို့ချဖို့ သဘောတူညီထားတယ်” လို့ Spring University Myanmar တာဝန်ရှိသူက ဆက်ပြောပါတယ်။
ဒီသင်တန်းတွေကို ဖေဖော်ဝါရီလ အတွင်း ဖွင့်လှစ်ပေးသွားမှာဖြစ်ပြီး သင်တန်းကာလ အနေနဲ့ ၅ ပတ် ကြာမြင့်မှာ ဖြစ်ကာ လျှောက်ထားလိုသူတွေ အနေနဲ့ School of Federalism and Peace Studies မှာ ဝင်ရောက် လျှောက်ထားနိုင်မှာ ဖြစ်ပါတယ်။
MK-010
