မဲခေါင်၊ နိုဝင်ဘာ ၂
ရှမ်းပြည်နယ်မြောက်ပိုင်း တရုတ်-မြန်မာနယ်စပ် မူဆယ်ခရိုင် ကြူကုတ်(ပန်ဆိုင်း)မြို့ကို ကိုးကန့်တပ်မတော်- MNDAAက မနေ့ နိုဝင်ဘာ ၁ ရက်နေ့ ညနေပိုင်းလောက်မှာ တိုက်ခိုက်သိမ်းပိုက်လိုက်ပြီလို့ ပန်ဆိုင်းမြို့ခံတွေက ပြောပါတယ်။
မနေ့ ညနေပိုင်းအချိန်မှာ စစ်ကောင်စီတပ်ရဲ့ ပန်ဆိုင်းမြို့မ တပ်စခန်းကို သိမ်းပိုက်လိုက်သလို ရဲစခန်းကိုလည်း MNDAAက မီးရှိူ့ဖျက်ဆီးလိုက်ပြီး မြို့တွင်းမှာ ဝင်ရောက်နေထိုင်လိုက်တယ်လို့ ဆိုပါတယ်။
” ရဲစခန်းနဲ့ မြို့နားကစခန်း ကျသွားပြီ။ ကိုးကန့်တွေ အဲမှာဝင်ထိုင်နေပြီ။ ရဲစခန်းက မနေ့ညကတည်းက မီးလောင်နေတာ။ စစ်တပ်က လေယာဉ်နဲ့ မြို့ထဲလာကြဲနေတာ” လို့ ပန်ဆိုင်းမြို့ခံအမျိုးသမီးတစ်ဦးက ပြောပါတယ်။
မြန်မာနယ်စပ်ပို့ကုန် ၉၀ ရာခိုင်နှုန်းခန့် ကုန်သွယ်လျက်ရှိတဲ့ မူဆယ်မြို့နယ်ထဲက ဂိတ် ၂ ခုမှာ တစ်ခုရှိတဲ့အတွက် တရုတ်-မြန်မာ နယ်စပ်ကုန်သွယ်ရေးအတွက် ကြူကုတ်(ပန်ဆိုင်း)မြို့ဟာ အရေးပါတဲ့ မြို့တစ်မြို့ဖြစ်ပါတယ်။
MNDAAက ပန်ဆိုင်းမြို့ထဲ ဝင်ရောက်နေထိုင်တာကြောင့် စစ်ကောင်စီတပ်က ဂျက်လေယာဉ်နဲ့ ဗုံးကြဲတိုက်ခိုက်လို့ ဒေသခံ ၂ ဦးသေဆုံးခဲ့ပြီး နေအိမ် အများအပြားလည်း ထိခိုက်ပျက်ဆီးခဲ့ပါတယ်။
ဒါ့အပြင် ပန်ဆိုင်းမြို့နယ် နမ့်ပါတပ်ကျေးရွာမှာ လက်ရှိသတင်းရေးသားနေချိန်အထိ စစ်ကောင်စီတပ်နဲ့ MNDAAတို့ တိုက်ပွဲပြင်းထန်နေတာကြောင့် မြို့ခံတွေ ဝမ်တိန်မြို့ဘက်ကို ထွက်ပြေးတိမ်းရှောင်သွားကြပါတယ်။
” စစ်တပ်ကလေယာဉ်နဲ့ ပစ်လို့ ကျမတို့အိမ် တစ်ဘာမှရစရာမရှိတော့ဘူး။ အခုချိန်ထိ သူတို့ပစ်နေကြတုန်းဘဲ။ ကျမတို့ တရုတ်ပြည်ထဲပြေးမလို့ တရုတ်က ပေးမဝင်တော့ ဝမ်တိန်တံတားအောက်မှာ နေကြတယ် “ လို့ နောက်ထပ် မြို့ခံအမျိုးသမီးတစ်ဦးက ဆိုပါတယ်။
ထွက်ပြေးတိမ်းရှောင်ကြတဲ့ ဒေသခံတွေဟာ အိမ်ထောင်စု (၁၀၀၀)ဝန်းကျင်ရှိပြီး တရုတ်-မြန်မာနယ်စပ် ဝမ်တိန်ဂိတ်အနီးမှာ တိမ်းရှောင်ကြတာလို့ သူက ဆက်ပြောပါတယ်။
စစ်ကောင်စီတပ်ရဲ့ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းလည်း ချင်းရွှေဟော်၊ ဖောင်းဆိုင်နဲ့ ကြူကုတ်(ပန်ဆိုင်း)မြို့ရှိ တပ်စခန်းတွေကိုဆုံးရှူံးလိုက်ရကြောင်း ပြောဆိုထားပါတယ်။
မူဆယ်နယ်စပ်ကုန်သွယ်ရေးဟာလည်း တိုက်ပွဲအခြေနေတွေကြောင့် စစ်ကောင်စီခန့်ဝန်ထမ်းတွေ ထွက်ပြေးတိမ်းရှောင်သွားတာကြောင့် မူဆယ် ၁၀၅ မိုင် ကုန်သွယ်ရေးဇုန်ထဲက ကုန်ပစ္စည်းတွေ ပိတ်မိနေသလို ရက်လွန်လို့ ကုန်စည်အချို့ ဆုံးရှုံးနေရပါတယ်။
CJ – 014
