မဲခေါင်၊ ဩဂုတ် ၂၂
ရှမ်းပြည်နယ် တောင်ပိုင်း၊ ဆီဆိုင်မြို့နယ် လူဝင်မှုကြီးကြပ်ရေးဌာန လ.ဝ.က ရုံး ဝန်ထမ်းတွေဟာ နိုင်ငံသား စိစစ်ရေးကဒ် မှတ်ပုံတင် လာလုပ်တဲ့ ဒေသခံတွေကို ငွေကျပ်တစ်သိန်း အထိ တောင်းတဲ့အပြင် ဒေသခံ တိုင်းရင်းသားတွေကို ရိုင်းရိုင်းစိုင်းစိုင်း ဆက်ဆံနေတယ်လို့ ဒေသခံ ပအိုဝ်းတိုင်းရင်းသားတွေက ပြောပါတယ်။
စစ်တပ် အာဏာမသိမ်းမီက မှတ်ပုံတင် ပြုလုပ်ပါက အများဆုံး ကျပ် ၃ သောင်း တောင်းပေမယ့် ဒီနှစ်ထဲမှာတော့ ကျပ်တစ်သိန်းအထိ တောင်းနေတယ်လို့ ဆီဆိုင်မြို့နယ်နေ ပအိုဝ်း ဒေသခံ တစ်ဦးက ပြောပါတယ်။
“ပြောတော့ ပအိုဝ်း ကိုယ်ပိုင်အုပ်ချုပ်ခွင့်ရဒေသတဲ့၊ မှတ်ပုံတင်လုပ်တာ ဗမာစကား မတတ်တော့ အဆဲခံရတယ်။ သူတို့ လက်မှတ် တစ်ခုရဖို့ အနှိမ်ခံရတယ်။ မနေ့က လူငယ် ၄ ဦးဆို မှတ်ပုံတင် လာလုပ်တာ လဝက ရုံးက လူတွေက သူတို့ကို ဆဲဆိုတာတင် မကဘူး။ လက်ဝါးနဲ့ ရိုက်ဖို့တောင် ရွယ်လိုက်တယ်ဗျာ။ ကျွန်တော်တို့ ဒေသခံ တိုင်းရင်းသားတွေ အရမ်းအနှိမ်ခံရတယ်။ စိတ်နာစရာ ကောင်းလိုက်တာဗျာ” လို့ ဆီဆိုင် ဒေသခံက ပြောပါတယ်။
ဒေသခံ တချို့က ငွေကြေးခက်ခဲလို့ ကျပ် ၂ သောင်းသာယူဖို့ ညှိနှိုင်းပေမယ့် လဝက ရုံးက ကျပ်တစ်သိန်းရမှ မှတ်ပုံတင် လုပ်ပေးမယ်လို့ ပြောပြီး ဒေသခံတွေကို ပြန်လွှတ်လိုက်တာတွေ ရှိတယ်လို့ ကိုယ်တွေ့ ကြုံခဲ့ရတဲ့ ဆီဆိုင်မြို့နယ် ဒေသခံ တစ်ဦးက ပြောပါတယ်။
“ငွေကြေး အခက်အခဲရှိလို့ ငွေ ၂ သောင်းကျပ်ပဲ ပါလာတယ်လို့ တောင်းပန်လည်း မရဘူး။ တစ်သိန်းမပါရင်တောင် ၅ သောင်းတော့ ပါအောင် ယူခဲ့ပေါ့ဆိုပြီး ဆူငေါက်ပြီး ဒီအတိုင်းပဲ ပြန်ခိုင်းတယ်” လို့ သူကပြောပါတယ်။
ဒေသခံ အများစုက ဗမာ စကားမတတ်တာနဲ့ လူနည်းစု တိုင်းရင်းသားတွေ ဖြစ်နေတာကြောင့် ကျေးရွာတွေက မှတ်ပုံတင် လာလုပ်သူတွေကို လဝက ရုံးက ငွေအများအပြား တောင်းတာ ဖြစ်တယ်လို့ သူကဆက်ပြောပါတယ်။
လက်ရှိ နိုင်ငံရေးနဲ့ စီးပွားရေး အခြေအနေ ဆိုးရွားလာတာကြောင့် ဆီဆိုင်မြို့နယ် ဒေသခံ အများအပြား ထိုင်းနိုင်ငံသို့ အလုပ်သွားလုပ်ဖို့ ပြင်ဆင်မှုအဖြစ် မှတ်ပုံတင် ပြုလုပ်သူတွေ များပြားလာပါတယ်။
“မှတ်ပုံတင် လာလုပ်တဲ့ လူတွေလည်း လဝက ရုံးမှာ နေ့တိုင်း ပြည့်နေတာ။ ထိုင်းကို အကုန်သွားကြတာလေ။ တစ်ချို့ရွာဆို လူအိုနဲ့ ကလေးပဲ ကျန်တော့တဲ့ အထိ သွားကြတာ။ အခုက သူတို့ စစ်အာဏာရှင်ခေတ်လည်း ဖြစ်နေတော့ လဝက ရုံးက လူတွေလည်း ပေါ်တင် တောင်းစားကြတာ” လို့ ဆီဆိုင်မြို့ခံ တစ်ဦးက ပြောပါတယ်။
လဝကရုံးက အခုလိုလို ပြုမူနေတာကြောင့် ဒေသခံတွေဟာ မှတ်ပုံတင်ရရှိဖို့ ကျေးရွာကနေ ခဏခဏ သွားရလို့ ခရီးစရိတ် အကုန်အကျ များတဲ့အပြင် တောင်ယာ အလုပ်လည်း ပျက်ရတယ်လို့ ဒေသခံတွေက ဆိုပါတယ်။
CJ-002
#MeKongNews
#ဆီဆိုင်မြို့နယ်
#လ.ဝ.က
#မှတ်ပုံတင်