မဲခေါင်၊ ဇန်နဝါရီ ၁၂
စစ်အာဏာရှင်စနစ်ကို တိုက်ထုတ်ဖို့ ဝိဝါဒကွဲပြားမှုကို ကျော်လွှားပြီး တော်လှန် တိုက်ပွဲဝင်ရမယ့် အရေးကြီး ကာလ ရောက်နေပြီလို့ TNLA က ဒီကနေ့မှာ တပ်လှန့် ထုတ်ပြန်လိုက်ပါတယ်။
ဒီကနေ့ ကျရောက်တဲ့ နှစ် (၆၀) ပြည့် တအာင်း အမျိုးသား တော်လှန်ရေးနေ့ အထိမ်းအမှတ် ထုတ်ပြန်ချက်မှာ ပလောင်ပြည်နယ် လွတ်မြောက်ရေးတပ်ဦး-PSLF/ တအောင်း အမျိုးသား လွတ်မြောက်ရေး တပ်မတော်-TNLA က အခုလို တပ်လှန့်လိုက်တာ ဖြစ်ပါတယ်။
ပြည်သူလူထုရဲ့ အခြေခံ အခွင့်အရေးတွေကို ဖိနှိပ်ချုပ်ချယ် ယုတ်လျော့စေခဲ့တဲ့ မဆလ တစ်ပါတီ အာဏာရှင် ဦးနေဝင်း၊ နဝတ-နအဖ စစ်အာဏာရှင် ဗိုလ်ချုပ်သန်းရွှေနဲ့ ယနေ့ခေတ် အာဏာရှင် ဗိုလ်ချုပ်မင်းအောင်လှိုင် အစရှိတဲ့ မြန်မာ အာဏာရှင် အဆက်ဆက်ကို ဒီမိုကရေစီ၊ တော်လှန်ရေး အင်အားစုတွေနဲ့ အတူ တအာင်း လူမျိုးတွေ ကလည်း ပုံစံ အသီးသီးနဲ့ တိုက်ပွဲဝင်နေတယ်လို့ ထုတ်ပြန်ချက်က ဆိုပါတယ်။
ပြည်သူလူထုကို ဖမ်းဆီးနှိပ်စက် သတ်ဖြတ်တာ၊ နေအိမ်တွေ မီးရှို့ဖျက်ဆီးတာ၊ နိုင်ငံရေး အကျဉ်းသားတွေကို သေဒဏ်ပေး ကွပ်မျက်တာ အစရှိတဲ့ စစ်ရာဇဝတ်နဲ့ ပြစ်မှုပေါင်းစုံကို မကြောက်မရွံ့ ကျူးလွန်နေတဲ့ စစ်ကောင်စီ လုပ်ရပ်က တိုင်းရင်းသား ပြည်သူ တရပ်လုံးနဲ့ အမျိုးသား ပြန်လည်သင့်မြတ်ရေး လမ်းကြောင်းကို ဆိတ်သုန်း ကင်းမဲ့နေစေတယ်လို့ အဲဒီထုတ်ပြန်ချက်မှာ ဖော်ပြထားပါတယ်။
ပိုမိုယဉ်ကျေး တိုးတက်လာတဲ့ ၂၁ ရာစု ကမ္ဘာကြီးမှာ ဆိုးရွားတဲ့ မြန်မာ စစ်အာဏာရှင်စနစ်ကို ဖယ်ရှား တိုက်ထုတ်ဖို့ နွေဦးတော်လှန်ရေးက ပေါက်ဖွားလာတဲ့ အင်အားစု အသီးသီးမှ အဖွဲ့အစည်းတွေ၊ တိုင်းရင်းသား တော်လှန်ရေး အင်အားစုတွေက အမျိုးမျိုးသော ဝိဒါဒ ကွဲပြားမှုတွေကို ကျော်လွန်ပြီး ပိုမိုခိုင်မာတဲ့ ညီညွှတ်ရေးနဲ့ အောင်ပွဲခံမယ့် မဟာဗျူဟာတွေနဲ့ တော်လှန်တိုက်ပွဲ ဝင်ရမယ့် အရေးကြီးတဲ့ အချိန်ကာလ ဖြစ်တယ်လို့ ထုတ်ပြန်ချက်မှာ တိုက်တွန်းထားတယ်။
MK-008