မဲခေါင်၊ မတ် ၂၆
စစ်ကောင်စီလက်အောက်ခံ PNO ပြည်သူ့စစ်ဟာ အသက်ပေးပြီး ကျွန်ခံနေတာလို့ ပအိုဝ်းအမျိုးသားဖက်ဒရယ်ကောင်စီ (PNFC)ရဲ့ အတွင်းရေးမှူး (၂) ခွန်ဝေထူးက ပြောကြားလိုက်ပါတယ်။
KNU နယ်မြေ ဘားအံခရိုင် ရွာဟောင်းပအိုဝ်းကျေးရွာမှာ ပြုလုပ်တဲ့ ၇၅ နှစ်မြောက် စိန်ရတုပအိုဝ်းအမျိုးသားနေ့အခမ်းအနားမှာ PNFC ရဲ့ အတွင်းရေးမှူး ၂ က ပအိုဝ်းဘာသာနဲ့ ပြောကြားခဲ့တာလို့ သိရပါတယ်။
“စစ်အာဏာရှင်လက်အောက်မှာ အသက်ပေးကျွန်ခံပေးလို့ ကိုယ်ပိုင်အုပ်ချုပ်ခွင့်၊ ကိုယ်ပိုင်ပြဌာန်းခွင့်နဲ့ တန်းတူရေး၊ ရလိမ့်မယ်ဆိုတဲ့ ပြည်သူ့စစ် PNO/PNA ခေါင်းဆောင်တွေရဲ့ မျှော်လင့်ချက်ဟာ
သံလျက် ရေထင် ရွှေသမင်အလိုက်မှားသလို ဖြစ်နေတဲ့အပြင် ဒီလိုမှားယွင်းတဲ့ မျှော်လင့်ချက်ကြောင့်ပအို၀်း တစ်မျိုးသားလုံးရဲ့ဂုဏ်သိက္ခာကို ချိုးနှိမ်ရာလဲ ရောက်ပါတယ်” လို့ ခွန်ဝေထူးက ပြောကြားခဲ့ပါတယ်။
အဆိုပါ အခမ်းအနားကို မတ် ၂၄ ရက် မနက် ၇ နာရီက ၉နာရီအထိပြုလုပ်ရာမှာ ဖားအံ၊ လှိုင်းဘွဲ့၊ ပိုင်ကျုံမြို့နယ် ၃ ခုက ရွာပေါင်း ၂၈ ရွာက အင်အား ၃၀၀ ခန့်တက်ရောက်ခဲ့ပြီး အခမ်းအနားပြုလုပ်နေစဉ်မှာ စစ်ကောင်စီရဲ့လေယာဉ်၀ဲနေတယ်လို့ ဆိုပါတယ်။
ပုံမှန်အားဖြင့် လူ ၁၀၀၀ ကျော် တက်ရောက်နိုင်သော်လည်း လေယာဉ်၀ဲနေတဲ့အခြေအနေကြောင့် လူထုတွေ ထိတ်လန့်စိုးရိမ်နေတာကြောင့် အခက်အခဲ၊ အကြပ်အတည်းတွေကြားက ပြုလုပ်ခဲ့ရတာဖြစ်တယ်လို့ သိရပါတယ်။
ယင်း နယ်မြေဟာ PNFC ရဲ့ နိုင်ငံရေးဦးဆောင်မှုအောက်က တော်လှန်ရေးတပ်ဖွဲ့ဖြစ်တဲ့ PPDF(KD)မြေပြန့်တပ်ဖွဲ့ရဲ့တပ်နယ် ဖြစ်ပြီး ရှမ်းတောင်နဲ့နယ်စပ်ဒေသတွေမှာ PNDF(KK) တောင်ပေါ် တပ်ဖွဲ့ရဲ့ တပ်နယ်တွေဖြစ်ကာ ဘားအံ၊ သထုံနဲ့ရှမ်းတောင်တပ်နယ်(၃)ခုနဲ့ ဖွဲ့စည်းလုပ်ဆောင်နေတယ်လို့ ပအို၀်းအမျိုးသားနေ့မှာ PNFC ရဲ့ဥက္ကဌခွန်မြင့်ထွန်းက ပြောဆိုကြောင်း သိရပါတယ်။
MK-012
ပုံစာ – KNU နယ်မြေမှာ ပြုလုပ်တဲ့ ၇၅ နှစ်မြောက် ပအိုဝ်းအမျိုးသားနေ့
