မဲခေါင်၊ မတ် ၂၁
စစ်တပ် အာဏာသိမ်းပြီးနောက်ပိုင်း မြန်မာနိုင်ငံမှာ ကျောင်းပညာရေးကို စွန့်ခွာပြီး ကြုံရာအလုပ် ဝင်ရောက် လုပ်ကိုင် နေရတဲ့ ကလေးနဲ့လူငယ် သန်းနဲ့ချီ ရှိလာတယ်လို့ ပညာရေး အသိုင်းအဝိုင်းက ပြောပါတယ်။
အာဏာသိမ်းပြီး ၂ နှစ်အတွင်း ကျောင်းပြင်ပ ရောက်သွားတဲ့ ကလေး ၇ ဒသမ ၈ သန်းရှိတယ်လို့ နိုင်ငံတကာ အကူအညီပေးရေး အဖွဲ့ Save the Children က ၂၀၂၂ ခုနှစ်၊ ဇွန်လမှာ ထုတ်ပြန်ထားပါတယ်။
“စာမေးပွဲ မဖြေ ကျောင်းမတက်နိုင်တဲ့ ကလေးတွေဟာ လွတ်မြောက် နယ်မြေ နဲ့ တိုင်းရင်းသား နယ်မြေတွေ ရောက်သွားကြတယ်။ အဲဒီ ရောက်သွားတဲ့ ကျောင်းသား၊ ကျောင်းသူက တစ်သိန်း ၂ သိန်းလောက် ရှိတယ်။ ကျန်တဲ့ ကလေး အများစုက မိသားစု စားဝတ်နေရေး အတွက် ရုန်းကန်ရင်း နီးစပ်ရာ နိုင်ငံတွေ ထွက် ပြီး ရရာ အလုပ်လုပ်ကြရတယ်။ တချို့က ဒေသကာကွယ်ရေးအဖွဲ့တွေထဲ ရောက်သွားကြတယ်” လို့ မြန်မာရွေ့လျား ပညာရေး စီမံကိန်း myME တည်ထောင်သူ ဦးတင်မောင်မောင်အေး က ပြောပါတယ်။
Global Coalition to Protect Education from Attack-GCPEA က ၂၀၂၂ ခုနှစ်၊ စက်တင်ဘာလက ထုတ်ပြန်တဲ့ အစီရင်ခံစာအရ ကျောင်းပေါင်း ၁၉၀ ဝန်းကျင် တိုက်ခိုက်ခံခဲ့ရတယ်လို့ ဖော်ပြထား ပေမယ့် ဘယ်သူ၊ ဘယ်ဝါတွေက ဒီတိုက်ခိုက်မှုတွေ ပြုလုပ်ခဲ့တယ်ဆိုတာ ရှင်းရှင်းလင်းလင်း ဖော်ပြမထားပါဘူး။
ဒါပေမယ့်လည်း ၂၀၂၂ ခုနှစ် အတွင်းမှာ ဖြစ်ပေါ်ခဲ့တဲ့ ဆိုးရွားတဲ့ အဖြစ်အပျက်တွေမှာ ကျောင်းတွေကို စစ် ကောင်စီတပ်ဖွဲ့တွေက တိုက်ခိုက်မီးရှို့မှုတွေ လုပ်နေတယ်ဆိုတဲ့ သက်သေ အမြောက်အမြား ရှိနေပါတယ်။
“နိုင်ငံတစ်ခု တိုးတက်ဖို့ ဆိုရင် လူငယ်တွေရဲ့ အခန်းကဏ္ဍက အရေးကြီးတယ် ဆိုတာ အားလုံးက လက်ခံ ထားပါတယ်။ မြန်မာနိုင်ငံကို ကြည့်မယ်ဆိုရင် ဒီကလေးတွေ ဘယ်ရောက်နေပြီလဲ ဆိုတာ ကြည့်ခြင်း အားဖြင့် နိုင်ငံရဲ့ အနာဂတ်က ဘယ်သွားနေသလဲ ဆိုတာ ပြောနိုင်တယ်” လို့ မြန်မာရွေ့လျား ပညာရေး စီမံကိန်း myME တည်ထောင်သူ ဦးတင်မောင်မောင်အေး က သုံးသပ် ပြောဆိုပါတယ်။
၂၀၁၉-၂၀ ခုနှစ် ပညာသင်နှစ်က မြန်မာနိုင်ငံမှာ အခြေခံပညာ ကျောင်းသား၊ ကျောင်းသူဦးရေ ၉ သန်းကျော် ရှိပြီး ဆရာ၊ ဆရာမ ၄ သိန်းကျော် ရှိခဲ့ပါတယ်။
၂၀၂၁ ခုနှစ် မှာတော့ တက္ကသိုလ် ကျောင်းသား ၃ သန်းခွဲကျော်ရှိပြီး ဆရာ၊ ဆရာမ ၂ သောင်းကျော် ရှိခဲ့တယ်လို့ ပညာရေးဝန်ကြီးဌာနရဲ့ စာရင်းတွေက ဖော်ပြထားပါတယ်။
စစ်ခေါင်းဆောင် ကတော့ အာဏာသိမ်းထားတဲ့ ၂ နှစ်အတွင်း တိုင်းပြည်ရဲ့ စီးပွားရေး၊ ကျန်းမာရေးနဲ့ ပညာရေး ကဏ္ဍတွေ ပုံမှန်ဖြစ်အောင် ကြိုးစားနေပေမယ့် နိုင်ငံတစ်ဝန်း လက်နက်ကိုင် ခုခံ တိုက်ခိုက်မှုတွေ လျော့မသွားဘဲ ပိုတိုးလာနေတယ်လို့ အစည်းအဝေးတွေမှာ မကြာခဏ ပြောဆိုလေ့ရှိပါတယ်။
MK-010
#MeKongNews
