မဲခေါင်၊ ဩဂုတ် ၁၉

ရှမ်းပြည်တောင်ပိုင်း၊ ကလောမြို့နယ် ရေချိုကျေးရွာအုပ်စုတွင် အုပ်ချုပ်ရေးမှူးက စစ်မှုထမ်းအကြောင်းပြကာ လစဉ်စစ်မှုထမ်းကြေး ငွေကောက်စားနေသည်ဟု ဒေသခံသတင်းရင်းမြစ်များကပြောသည်။

ရေချိုကျေးရွာအုပ်စု အုပ်ချုပ်ရေးမှူး ဦးခင်စိုးနှင့် စာရေး ဟန်မျိုးဝေတို့သည့် စစ်မှုထမ်းကြေးနှင့်မြေယာရောင်းဝယ်ရေး များတွင် ငွေကြေးကောက်စားနေခြင်းဖြစ်သည်ဟု ဒေသခံများကပြောသည်။

“စစ်မှုထမ်းကြေးဆိုပြီး တစ်လကို ၅ သောင်းအနည်းဆုံးတောင်းတယ်။ ကျွန်တော်တို့ အိမ်မှာ စစ်မှုထမ်းရမယ့်သူမရှိလည်း ထည့်ရတယ်။ ၂ သောင်းထည့်မယ်ပြောတာမရဘူး။ ၅ သောင်းအတင်းထည့်ခိုင်းတယ်”ဟု‌ ဒေသခံတစ်ဦးကပြောသည်။

ထို့အပြင် စစ်မှုထမ်းမလိုက်ချင်သူများကိုလည်း အုပ်ချုပ်ရေးမှူးက ငွေကြေးသိန်း ၁၈၀ တောင်းစားသည်ဟုလည်း ဒေသခံများကပြောသည်။

“ဇောတိကျေးရွာဆို စစ်ကောင်စီက စစ်မှုထမ်းတောင်းတာ မသွားချင်တဲ့သူတွေကို ၁၈၀ တောင်းပြီး အုပ်ချုပ်ရေးမှူးက မဲမပါအောင် လုပ်ပေးတယ်။ ပြီးတော့ သူတို့အမျိုးလည်း တစ်ယောက်မှ မပါဘူး။ အဲ့ဒါက သက်သက်။ တစ်အိမ် ၅ သောင်း လတိုင်းတောင်းတာကလည်း သက်သက်တစ်ခုစီ”ဟု ဒေသံတစ်ဦးကပြောသည်။

ကလောမြို့နယ် ရေချိုကျေးရွာအုပ်စုသည် အိမ်ခြေတစ်ထောင်ကျော်ရှိသဖြင့် အုပ်ချုပ်ရေးမှူး ကောက်ခံသည့်ငွေသည် လစဉ် ကျပ်သိန်း ၄၀၀ ကျော်ရှိသည်ဟုလည်း ဒေသခံများကပြောသည်။

ထို့အပြင် ကျေးရွာအုပ်စုအတွင်း မြေယာအရောင်းအဝယ် လုပ်ပါကလည်း အုပ်ချုပ်ရေးမှူး ဦးခင်စိုးက လက်မှတ်ထိုးကြေး ၅ သိန်းတောင်းသည်ဟုလည်း ဒေသခံများကပြောသည်။

“မြေကွက်ရောင်းလည်း သူ့ကိုပေးရတယ်။ ရွာသားအချင်းချင်း တောင်ယာ ဝယ်ရောင်းလုပ်လည်း သူ့လက်မှတ်မပါရင် တရားမဝင်ဘူးဆိုပြီး လက်မှတ်ထိုးကြေး ၅ သိန်းပေးရတယ်” ဟု ဇောတိဒေသခံတစ်ဦးကပြောသည်။

ကလောမြို့နယ် ရေချိုကျေးရွာအုပ်စုတွင် ဇောတိကျေးရွာ၊ တံတားဦးကျေးရွာ၊ လွယ်မယ်ရွာ၊ ရေချိုရွာ၊ လွယ်ဟပ်ရွာ၊ ထင်းရှူးကုန်းရွာ၊ ကျောက်စုရွာ၊ နတ်တော်ရွာစသည့် ကျေးရွာများပါဝင်သည်။

#MeKongNews
#ရှမ်းတောင်
#ကလော
#ရေချိုရွာ
#အုပ်ချုပ်ရေးမှူး
#စစ်မှုထမ်း

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)