မဲခေါင်၊ ဩဂုတ် ၁၈
ရှမ်းပြည်တောင်ပိုင်း၊ အင်းလေးဒေသ၊ နမ့်ပန်ကျေးရွာတွင် ဩဂုတ် ၁၅ ရက် နမ့်ပန်ဈေးနေ့၌ စက်လှေများကို လိုင်စင်စစ်ဆေးမည်ဟုဆိုကာ စက်လှေဂေါက်တံများ ဖြုတ်ယူသိမ်းဆည်းပြီး တစ်ချောင်းလျှင် ကျပ် ၂၅,၀၀၀ ပေး၍ ပြန်လည်ရွေးယူခိုင်းခဲ့သဖြင့် ဈေးသည်များနှင့် ဈေးလာဝယ်သူများ အခက်အခဲကြုံခဲ့ရကြောင်း ဒေသခံများထံမှ သိရသည်။
ဒေသခံများ၏ ပြောကြားချက်အရ အဆိုပါ စက်လှေစစ်ဆေးမှုသည် နမ့်ပန်မြို့နယ် အုပ်ချုပ်ရေးမှူး၏ ညွှန်ကြားချက်ဖြင့် ပြုလုပ်ခဲ့ခြင်းဖြစ်ပြီး လိုင်စင်စစ်ဆေးရေးကို အကြောင်းပြကာ စက်လှေဂေါက်တံများကို ဖြုတ်ယူသိမ်းဆည်းခဲ့ခြင်းဖြစ်သည်ဟု ဆိုသည်။
အင်းလေးဒေသတွင် စက်လှေများသည် ဒေသခံများ၏ နေ့စဉ်သွားလာရေးအတွက် အဓိကအသုံးပြုရသည့် ယာဉ်များဖြစ်သဖြင့် စက်လှေဂေါက်တံများ သိမ်းဆည်းခံရပါက စက်လှေကို ဆက်လက်အသုံးပြုသွားလာရန် အခက်အခဲရှိကြောင်း ဒေသခံများက ပြောသည်။
“လိုင်စင်မရှိလို့ တကယ်အရေးယူမယ်ဆိုရင် သတ်မှတ်ထားတဲ့ ဥပဒေအတိုင်း လုပ်ပေးစေချင်တယ်။ အခုက ဂေါက်တံဖြုတ်ယူပြီး ပိုက်ဆံပေးမှ ပြန်ရတဲ့ပုံစံ ဖြစ်နေတော့ ရေလမ်းကို အဓိကအားထားနေရတဲ့သူတွေအတွက် အရမ်းအခက်တွေ့တယ်” ဟု နမ့်ပန်ဒေသခံတစ်ဦးက မဲခေါင်သို့ ပြောသည်။
စက်လှေဂေါက်တံများ သိမ်းဆည်းခံရမှုကြောင့် ဈေးလာရောက်ဝယ်ယူသူအချို့မှာ ဈေးအတွင်းသို့ပင် မဝင်ရောက်တော့ဘဲ ပြန်လည်ထွက်ခွာသွားကြပြီး ဈေးသည်များမှာလည်း ကုန်ပစ္စည်းများ ရောင်းချနိုင်ခြင်းမရှိဘဲ ပြန်လည်သယ်ယူသွားရသည့် အခြေအနေ ဖြစ်ပေါ်ခဲ့သည်။
အဆိုပါဖြစ်စဉ်ကြောင့် နမ့်ပန်ဈေးမှာ ပုံမှန်ထက်စော၍ လူသူကင်းမဲ့သွားပြီး ဈေးသည်များနှင့် ဝယ်ယူသူများအကြား စိုးရိမ်မှုများလည်း ဖြစ်ပေါ်ခဲ့သည်။
လက်ရှိတွင် လာမည့်ဈေးနေ့များ၌ အလားတူ စက်လှေစစ်ဆေးမှုများနှင့် ငွေကြေးပေးဆောင်ရသည့် အခြေအနေများ ထပ်မံဖြစ်ပေါ်လာမည်ကို ဒေသခံများက စိုးရိမ်နေကြသည်။
စက်သုံးဆီနှင့် အခြေခံစားသောက်ကုန်ဈေးနှုန်းများ မြင့်တက်နေပြီး သွားလာရေးနှင့် စားဝတ်နေရေးအတွက် အခက်အခဲများရှိနေသည့် အချိန်တွင် ယခုကဲ့သို့ စက်လှေသွားလာရေးနှင့် ပတ်သက်သည့် စစ်ဆေးမှုများကြောင့် အင်းလေးဒေသခံများ၏ နေ့စဉ်ဘဝနှင့် ဒေသတွင်းကုန်သွယ်ရေး ပိုမိုထိခိုက်လာနိုင်ကြောင်း ဒေသခံများက ပြောဆိုကြသည်။
#MeKongNews
#အင်းလေး
#ရှမ်းတောင်
#နန်းပန်
#ဈေးနေ့
