မဲခေါင်၊ ဇူလိုင် ၂၄

ရှမ်းပြည်တောင်ပိုင်း၊ မိုင်းရှူးခရိုင်၊ မိုင်းရှူးမြို့နယ်နှင့် မိုင်းရှူးတောင်ပေါ် ရတနာမြေဒေသတို့တွင် စစ်ကောင်စီတပ်နှင့် ရဲ၊ ထွေအုပ် ပူးပေါင်းအဖွဲ့များက လမ်းပေါ်တွင် တွေ့သမျှယောက်ျားလေး ပေါ်တာဆွဲနေသဖြင့် အိမ်အပြင်သို့ပင် မထွက်ရဲကြကြောင်း ဒေသခံများက မဲခေါင်သို့ ပြောသည်။

မိုင်းရှူးမြို့နယ်အတွင်း စစ်ကောင်စီတပ်က စစ်မှုထမ်းရန်အတွက် လစဉ်ကြေးများ ကောက်ခံနေသည့်အပြင် လွန်ခဲ့သည့် ၂ လခန့်မှ စတင်ကာ ဒေသခံ လူငယ်များကို လမ်းပေါ်တွင် အဓမ္မ ပေါ်တာဆွဲ ဖမ်းဆီးမှုများ ပြုလုပ်နေခြင်းဖြစ်ကြောင်း၊ ပေါ်တာဆွဲဖမ်းဆီးသည့် ပူးပေါင်းအဖွဲ့တွင် မိုင်းရှူးတောင်ပေါ်ရဲစခန်းမှ ဒုရဲအုပ် နေလင်းဦး၊ ခလရ (၁၄၉) တပ်ရင်းမှ စစ်ကောင်စီတပ်ဖွဲ့ဝင်များနှင့် လွယ်ခမ်းလုံ/ဝမ်ကန် ရပ်ကျေးစာရေး ကိုကျော်ဦး တို့ ဦးဆောင်ပါဝင်နေကြောင်း ဒေသခံများက ပြောသည်။

“မိုင်းရှူးတောင်ပေါ် ရတနာမြေ ဝမ်ကန်မှာ လစဉ် စစ်မှုထမ်းကြေးလည်း ပေးနေရတာ။ အခုလို အတင်းအဓမ္မ ပေါ်တာလိုက်ဆွဲနေတော့ နေ့ခင်းဘက်တောင် အိမ်ပြင်မထွက်ရဲ၊ အလုပ်မသွားရဲကြတော့ဘူး။ ညဘက်ဆိုရင်လည်း အိမ်ထဲမှာ ကောင်းကောင်းမအိပ်ရဲဘဲ ကြောက်လန့်နေကြရတယ်။ ပြည်သူတွေအဖို့ ကယ်သူမဲ့ပြီး ဒုက္ခရောက်နေကြရတယ်” ဟု မိုင်းရှူးဒေသခံတစ်ဦးက မဲခေါင်သို့ ရင်ဖွင့်သည်။

ထိုသို့ အဓမ္မ ဖမ်းဆီးရမိသည့် လူငယ်များကို မိုင်းရှူးမြို့တွင်း လဝကရုံးအနောက်ဘက်၊ ကုလားဗလီအနီးရှိ ဂိုဒေါင်ကြီးအတွင်း၌ ပိတ်လှောင်ထားရှိပြီး လူအင်အား ပြည့်မီမှသာ စစ်သင်တန်းကျောင်းများသို့ ပို့ဆောင်လေ့ကြောင်း၊ ယင်းသို့ ဖမ်းဆီးထားစဉ်အတွင်း ငွေကြေးတတ်နိုင်သည့် မိဘများထံမှ ပြန်လည်လွတ်မြောက်ရေးအတွက် ငွေကျပ် သိန်း ၂၀၀ အထိ အဆမတန် ငွေညှစ်တောင်းခံမှုများ ရှိနေကြောင်း ဒေသခံများက ဆိုသည်။

ထို့ပြင် စစ်ကောင်စီက စစ်မှုထမ်းရန် ဖမ်းဆီးထိန်းသိမ်းခံထားရသည့် လူငယ် ၂၀ ခန့် ဇူလိုင်လ ၂၂ ရက် ညပိုင်းတွင် ဂိုဒေါင်ဖောက် ထွက်ပြေးလွတ်မြောက်သွားသဖြင့် မြို့ပေါ်နှင့် တောင်ပေါ်ဒေသများတွင် လိုက်လံရှာဖွေကာ အစားထိုးရန်အတွက် ထပ်မံ ရမ်းသန်းဖမ်းဆီးနေခြင်းဖြစ်ကြောင်း ဒေသခံများထံမှ သိရသည်။

လတ်တလောတွင် မိုင်းရှူးတောင်ပေါ် ရတနာမြေ ဝမ်ကန်ဒေသတွင် လမ်းပေါ်တွေ့ရှိသည့် အမျိုးသားမှန်သမျှကို ရမ်းသန်းဖမ်းဆီးလျက်ရှိရာ မိုင်းရှူးတောင်ပေါ်မှ လူငယ် ၇ ဦး ထပ်မံ ပေါ်တာဆွဲ ဖမ်းဆီးခံလိုက်ရကြောင်း ဒေသခံများထံမှ စုံစမ်းသိရှိရသည်။

လက်ရှိတွင် မိုင်းရှူးမြို့ပေါ်နှင့် တောင်ပေါ် ရတနာမြေဒေသတို့၌ စစ်ကောင်စီ ပူးပေါင်းအဖွဲ့များ၏ ပေါ်တာဆွဲ ဖမ်းဆီးမှုများကြောင့် လူငယ်အများအပြား ဘေးလွတ်ရာသို့ ထွက်ပြေးတိမ်းရှောင်နေကြရပြီး မြို့တွင်း စီးပွားရေးနှင့် ဒေသခံများ၏ နေ့စဉ်လူမှုဘဝများ စိုးရိမ်ထိတ်လန့်မှုများဖြင့် ကြုံတွေ့နေရကြောင်း သိရသည်။

#MeKongNews
#မိုင်းရှူး
#မိုင်းရှူးရတနာမြေ
#ပေါ်တာဆွဲ
#ထွေအုပ်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)