မဲခေါင်၊ ဇွန် ၂၇
ယမန်နေ့တွင် ပေကျင်းမြို့၏ အမြင့်ဆုံး Citic Tower မိုးမျှော်တိုက်ကို လေယာဉ်ငယ်တစ်စင်း ဝင်တိုက်ခဲ့ပြီး အဆောက်အအုံမှ အပျက်အစီးများနှင့် လေယာဉ်အစိတ်အပိုင်းများ အောက်ရှိ လမ်းမများပေါ်သို့ ပြုတ်ကျခဲ့သဖြင့် လူအများ ထွက်ပြေးခဲ့ကြရသည်။
လူမှုကွန်ရက်တွင် မျှဝေထားပြီး The New York Times က အတည်ပြုထားသော ဗီဒီယိုများတွင် မိုးမျှော်တိုက်မှ အပျက်အစီးများ ပြုတ်ကျနေသည်ကို မြင်တွေ့ရပြီး လူများက ဘေးလွတ်ရာသို့ ပြေးနေကြသည်ကိုလည်း တွေ့ရသည်။
ဗီဒီယိုများတွင် ပြတင်းပေါက်များ ပျက်စီးနေခြင်းနှင့် လေယာဉ်ငယ်တစ်စင်း၏ အမြီးပိုင်းဟု ယူဆရသော အစိတ်အပိုင်းများ အပါအဝင် အပျက်အစီးများသည် အထပ်ပေါင်းများစွာမှ လမ်းမပေါ်သို့ ပြုတ်ကျနေသည်ကို ဖော်ပြထားသည်။
ထိုအဆောက်အအုံသည် မြို့တော်၏ လူစည်ကားသော စီးပွားရေးဗဟိုဌာနတွင် တည်ရှိပြီး၊ ညနေခင်း ရုံးဆင်းချိန်တွင် ကားများဖြင့် ပြည့်ကျပ်နေခဲ့သည်။
ထိခိုက်ဒဏ်ရာရသူ အရေအတွက် သို့မဟုတ် ရှိ၊ မရှိကို ချက်ချင်း မသိရသေးဘဲ လေယာဉ်မောင်းသူ၏ တည်နေရာနှင့် အထောက်အထားလည်း မသိရသေးကြောင်း သိရသည်။
ဆိုရှယ်မီဒီယာတွင် တင်ထားသော ဓာတ်ပုံများအရ အခင်းဖြစ်ရာနေရာတွင် တွေ့ရသည့် လေယာဉ်အစိတ်အပိုင်းများသည် ထိုင်ခုံအနည်းငယ်သာပါသော အပေါ့စား လေယာဉ်အမျိုးအစား ဖြစ်နိုင်ကြောင်း ဖော်ပြထားပြီး၊ ထိုလေယာဉ်သည် ဒေသတွင်း လေယာဉ်မောင်းသင်တန်းပေးသည့် Shuangyue General Aviation လေကြောင်းကုမ္ပဏီတွင် မှတ်ပုံတင်ထားသည်။
ယင်းနှင့်ပတ်သက်၍ ကုမ္ပဏီသို့ ဖုန်းဆက် အတည်ပြုသော်လည်း မဖြေကြားခဲ့ပေ။
FlightRadar လေယာဉ်ခြေရာခံဝက်ဘ်ဆိုက်မှ ဒေတာများအရ လေယာဉ်သည် ပေကျင်းအရှေ့ပိုင်း၊ ပင်ကုခရိုင် ရှိ လေယာဉ်ကွင်းတစ်ခုမှ ထွက်ခွာခဲ့ကြောင်း သိရသည်။
ထို့နောက် လေယာဉ်သည် အနီးပတ်ဝန်းကျင်တွင် လှည့်ပတ်ပျံသန်းပြီးနောက် မြို့လယ် အနောက်ဘက်သို့ ဦးတည်သွားခဲ့သည်။
ထိုပျက်ကျမှုသည် မတော်တဆလား သို့မဟုတ် ရည်ရွယ်ချက်ရှိရှိလား ဆိုသည်မှာ မရှင်းလင်းသေးပေ။
လေယာဉ်မောင်းသူသည် မြို့လယ်သို့ အဟန့်အတားမရှိ မည်သို့ ဝင်ရောက်နိုင်ခဲ့သနည်းဆိုသည်လည်း မသိရသေးပေ။
တရုတ်နိုင်ငံ လေကြောင်းအာဏာပိုင်အဖွဲ့နှင့် ပေကျင်းရှိ နီးစပ်ရာ ရဲစခန်းများကို The New York Times က ဆက်သွယ်သော်လည်း ဖုန်းမဖြေကြားခဲ့ကြောင်း သိရသည်။
“ဒီလေယာဉ်ကို ပေကျင်းအရှေ့ဘက်မှာ လေယာဉ်မောင်းသင်တန်းအတွက် ပုံမှန်အသုံးပြုတယ်” FlightRadar ပြောရေးဆိုခွင့်ရှိသူ အီယန် ပက်ချနစ်ခ်က ဟု ပြောကြားခဲ့သည်။
ယခုလေယာဉ်ပျံသန်းမှုသည် ထိုပုံမှန်အသုံးပြုမှုနှင့် မတူညီသည့် ထူးခြားသည့် လှုပ်ရှားမှု ဖြစ်ကြောင်း ၎င်းက ထပ်လောင်းပြောခဲ့သည်။
ယင်းမိုးမျှော်တိုက်ကို Citic Tower ဟုခေါ်ပြီး China Zun ဟုလည်း သိကြသည်။
၎င်းသည် တရုတ်နိုင်ငံ၏ အကြီးဆုံးအစိုးရပိုင် ဘဏ္ဍာရေးအုပ်စုများထဲမှ တစ်ခုဖြစ်သည့် Citic Group ၏ ရုံးချုပ်ဖြစ်သည်။
ဒေသစံတော်ချိန် ညနေ ၆ နာရီခန့်တွင် ၎င်းနှင့် မိတ်ဆွေများ လမ်းလျှောက်နေစဉ် လေယာဉ်တစ်စင်းသည် အဆောက်အအုံကို ဝင်တိုက်ခဲ့သည်ကို မြင်ခဲ့ရကြောင်း အနီးရှိ Gym တစ်ခုမှ ဝန်ထမ်းတစ်ဦးက ပြောသည်။
နောက်ပိုင်းတွင် ခေါင်းထိခိုက်ဒဏ်ရာ ရရှိထားသော အမျိုးသမီးတစ်ဦးကို လူနာတင်ယာဉ်ဖြင့် သယ်ဆောင်သွားခဲ့ကြောင်းလည်း ၎င်းက ဆိုသည်။
ထို့ပြင် အနီးရှိ စားသောက်ဆိုင်တစ်ခုမှ ဝန်ထမ်းတစ်ဦးကလည်း ထိုအချိန်ခန့်တွင် ကျယ်လောင်သည့် အသံတစ်ခု ကြားခဲ့ရကြောင်း ပြောကြားခဲ့သည်။
ထိခိုက်ဒဏ်ရာရသူများနှင့် ပတ်သက်သော အချက်အလက်များကို ချက်ချင်း အတည်ပြုနိုင်ခြင်း မရှိသေးသော်လည်း၊ တရုတ်အစိုးရအာဏာပိုင်များက သတင်းအပေါ် အထူးသတိထားနေသည့် လက္ခဏာအဖြစ်၊ ပျက်ကျမှုနှင့် အဆောက်အအုံနှင့် ပတ်သက်သော ဆိုရှယ်မီဒီယာပို့စ်များကို အွန်လိုင်းတွင် ဖယ်ရှား ကန့်သတ်ထားကြောင်း သိရသည်။
အထင်ကရဖြစ်သော ယင်းမိုးမျှော်တိုက်ကို ၂၀၁၈ ခုနှစ်တွင် တည်ဆောက် ပြီးစီးခဲ့ပြီး မြို့အနှံ့မှ မြင်တွေ့နိုင်သည်။
၎င်းသည် ပေကျင်းမြို့၏ နောက်ထပ်ထင်ရှားသော ဗိသုကာ အဆောက်အအုံတစ်ခု ဖြစ်သည့် တရုတ်ဗဟိုရုပ်မြင်သံကြားဌာန CCTV ရုံးချုပ်၏ မျက်နှာချင်းဆိုင်တွင် တည်ရှိပြီး သောကြာနေ့ညတွင် ထိုနေရာ၌ ရဲကား ၂၀ နီးပါး ရပ်ထားသည်ကို တွေ့ရသည်။
အနီးအနားတွင် နေထိုင်သူ ဝမ်ဆိုသူကလည်း ညနေ ၆ နာရီမတိုင်မီ ခန့်တွင် လမ်းမပေါ်မှ ကျယ်လောင်သံများ ကြားရပြီး မိုးမျှော်တိုက်ဘက်သို့ သွားကြည့်ခဲ့ရာ အဆောက်အအုံဘေးတွင် အပေါက်တစ်ခုကို တွေ့ခဲ့ရပြီး ယင်းနေရာတွင် ခဏတာ မီးလောင်နေခဲ့ကြောင်း ပြောသည်။
ထို့ပြင် အဆောက်အအုံ အောက်ခြေတွင် မီးလောင်နေသော လေယာဉ် အပျက်အစီးများကိုလည်း တွေ့ခဲ့ရကြောင်း၊ သို့သော် ရဲတပ်ဖွဲ့က ကြည့်ရှုနေသူများကို အမြန်ထွက်ခွာခိုင်းခဲ့သဖြင့် ထိခိုက်သေဆုံးမှုရှိ၊ မရှိ မသိနိုင်ခဲ့ကြောင်း ၎င်းက ဆိုသည်။
Ref: The New York Times
#MeKongNews
#ပေကျင်း
#အမြင့်ဆုံး
#မိုးမျှော်တိုက်
#လေယာဉ်ငယ်
#ဝင်တိုက်
