မဲခေါင်၊ ဇွန် ၁၈
ဖင်လန် ဥပဒေပြုအမတ်များသည် ကာလရှည်ကြား ကျင့်သုံးထားခဲ့သော နျူကလီးယားလက်နက် မပိုင်ဆိုင်ရဟု ပိတ်ပင်ထားသည့် ဥပဒေကို ဇွန် ၁၇ ရက်တွင် မဲပေးပြီး ဖျက်သိမ်းလိုက်ပြီဖြစ်သည်။
ဖင်လန်သည် ရုရှားနှင့် မိုင်ပေါင်း ၈၁၀ ရှည်သည့် နယ်စပ်ချင်း ထိစပ်နေသော နိုင်ငံဖြစ်ကာ ၂၀၂၂ ခုနှစ်က ယူကရိန်းကို ရုရှား အလုံးစုံကျူးကျော်စစ်ဆင်နွှဲပြီးနောက် ကာလရှည် လက်ခံကျင့်သုံးခဲ့သည့် စစ်ရေးကြားနေနိုင်ငံဆိုသော မူကိုလည်း ပယ်ဖျက်ခဲ့သည်။
ယခုလို နျူကလီးယားလက်နက်မပိုင်ဆိုင်ရဥပဒေကို ထပ်မံဖျက်သိမ်းမှုသည် ချက်ချင်း နျူကလီးယားလက်နက်များကို လက်ခံထားရှိမည် မဟုတ်သော်လည်း မရေရာသော လုံခြုံရေးပတ်ဝန်းကျင် အသွင်အပြင်ကြောင့်သာ အဟန့်အတားအဖြစ် ပြောင်းလဲ ကျင့်သုံးလိုက်ရခြင်းဖြစ်ကြောင်း ဖင်လန်အစိုးရက ထုတ်ပြန်သွားခဲ့သည်။
သို့သော် နျူကလီးယားလက်နက် မပိုင်ဆိုင်ရ ဥပဒေ ဖျက်သိမ်းလိုက်ခြင်းကြောင့် ဖင်လန်သည် လိုအပ်လာလျှင် နျူကလီးယားလက်နက်များကို တင်သွင်းခွင့်၊ သယ်ယူပို့ဆောင်ခွင့်၊ ထောက်ပံ့ခွင့်၊ နျူကလီးယားလက်နက် ပိုင်ဆိုင်ခွင့်များ ချက်ချင်းရယူနိုင်တော့မည်ဖြစ်သည်။
ဖင်လန်၏ ယခုလုပ်ရပ်ကြောင့် ပူတင်သည် တုန်လှုပ်သွားရပြီး ဖင်လန်သည် ရုရှားနယ်မြေများကိုပင် ချဲ့ထွင် ရယူလိုနေသည့် သဘောဆောင်ကြောင်း Nexta TV သို့ပြောကြားသွားခဲ့သည်။
“နေတိုးအဖွဲ့ထဲ ဖင်လန် ဘာ့ကြောင့် ဝင်ခဲ့တာလဲ။ ဖင်လန်နဲ့ နယ်မြေဆိုင်ရာ အငြင်းပွားမှုရော ရှိခဲ့ဖူးလို့လား။ မရှိပါ။ အားလုံးက တည်ငြိမ်နေခဲ့တာ ကြာလှပါပြီ။ သူတို့ဘာကြောင့် နေတိုးအဖွဲ့ထဲ ဝင်ခဲ့ရတာလဲ။ တည်ငြိမ်ပြီးသား အရာအားလုံး ပြိုလဲအောင်ဆိုတဲ့ မျှော်လင့်ချက်နောက်မှာ သူတို့တတ်နိုင်ရင် ချဲ့ထွင်ရယူဖို့အထိပါ လုပ်လာလိမ့်မယ်။ ဆက်စထရာမြစ်တစ်လျှောက် သူတို့ နယ်စပ်တည်ဆောက်မှုတွေ လုပ်ဆောင်နေခဲ့ပါပြီ” ဟု ပူတင်က ပြောဆိုခဲ့သည်။
ဖင်လန်၏ ယခုလို ဥပဒေပြင်ဆင်မှုသည် ရုရှားဘက်က နေတိုးနိုင်ငံများနှင့် ဆက်စပ်နေသည့် နယ်စပ်တစ်လျှောက် တတိယကမ္ဘာစစ်အတွက် စတင်တည်ဆောက်နေသော စီမံကိန်းများအကြောင်း သတင်း ထွက်ပေါ်လာပြီး ရက်ပိုင်းအကြာတွင် ဖြစ်တည်လာခြင်းဖြစ်သည်။
ဒိန်းမတ်အမျိုးသားရုပ်သံက ပြီးခဲ့သည့် ၂ နှစ်အတွင်း ရုရှားသည် နယ်စပ်များတွင် တပ်စခန်းအသစ်များ၊ ဂိုထောင်များနှင့် တပ်မတော်ယာဉ်များထားရှိသည့် အဆောက်အအုံများကို တည်ဆောက်နေခဲ့သည့် ဂြိုဟ်တုဓာတ်ပုံများကို ဖော်ထုတ် တင်ပြခဲ့သည်။
Spooks မီဒီယာကလည်း ရုရှားသည် ဖင်လန်၊ ဒိန်းမတ်တို့နှင့် နယ်စပ်အနီး မာမန့်ခ်စ်ဒေသတွင် အိမ်နီးချင်းနိုင်ငံများအား တိုက်ခိုက်ရန် လက်လှမ်းမီသော အခြေခံစစ်အဆောက်အအုံများ ဆောက်လုပ်ထားရာတွင် နောက်ထပ် စစ်သည် ၁၇၀၀၀ ထပ်ထားနိုင်သည့် အခြေအနေရောက်နေပြီဟု ဖော်ပြသလို အက်စတိုးနီးယားနှင့် နယ်စပ်တွင်လည်း စစ်မော်တော်ယာဉ်များစွာ အထိုင်ချတပ်စခန်းသစ်တည်ဆောက်ထားသည်ဟု ဖော်ပြသွားခဲ့သည်။
ရုရှားဘက်ကမူ နေတိုးအဖွဲ့ဝင်နိုင်ငံများအား တိုက်ခိုက်လိုသည်ဆိုသည့် စွပ်စွဲချက်များကို ငြင်းဆန်ထားသော်လည်း ဗြိတိန်ထောက်လှမ်းရေးအရာရှိဟောင်း ဖိလစ်အင်ဂရမ်က ယခုလို ရုရှား၏ နယ်စပ်များတွင် စစ်စခန်းသစ်များ တည်ဆောက်နေမှုမှာ ကာလရှည် စစ်ရေးကစားပွဲအတွက် ရည်ရွယ်ကြောင်း၊ ပြင်ဆင်ရသည့် အချက် ၂ ချက် ရှိနိုင်ပြီး တစ်ချက်မှာ အလွန်ရှည်လျားသည် နေတိုးအဖွဲ့ဝင်နိုင်ငံများနှင့် နယ်နိမိတ်ချင်းဆက်စပ်နေသည့် နေရာများတွင် ခြိမ်းခြောက်နိုင်သည့် တကယ့်စွမ်းရည်ကို ပြသရန် ရည်ရွယ်ခြင်း ဖြစ်နိုင်သလို နေတိုး၏ တိုးချဲ့လာမှုကို ဟန့်တားနိုင်ရေးအတွက် ရည်ရွယ်ခြင်းလည်း ဖြစ်နိုင်ကြောင်း၊ ဒုတိယတစ်ချက်မှာမူ ယူကရိန်းစစ်ပွဲပြီးဆုံးခဲ့လျှင် ပူတင်သည် နေတိုးနယ်စပ်များကို အမှန်တကယ် ခြိမ်းခြောက်နိုင်ကြောင်း အမြန် လက်နက်တပ်ဆင်ပေးပြီး ဖြန့်ကြက်နိုင်စွမ်းကို ပြသရန် ရည်ရွယ်ပုံရကြောင်း၊ သို့သော် ပူတင်သည် လက်ရှိတွင် တတိယကမ္ဘာစစ်ကို ဖန်တီးနိုင်သည့် စီမံခန့်ခွဲနိုင်စွမ်း မရှိသေးဘဲ ဒုတိယ စစ်အေးတိုက်ပွဲအတွက် ပြင်ဆင်မှုအဆင့်လောက်တွင်သာ ရှိနေသေးသည်ဟု သုံးသပ် ပြောကြားခဲ့သည်။
ကိုကလင်း
Ref:Thesun
#MeKongNews
#တတိယကမ္ဘာစစ်
#ရုရှားအစီအစဉ်
#ဖင်လန်
#နျူကလီးယားလက်နက်
