မဲခေါင်၊ မေ ၁၈

ရှမ်းပြည်တောင်ပိုင်း၊ ဟိုပုံးမြို့တွင် ရဲတပ်ဖွဲ့က ဖမ်းဆီးခေါ်ဆောင်သွားသည့် လူငယ်တစ်ဦးမှာ ပြန်လည်လွတ်မြောက်လာသည်ဟု သိရသော်လည်း ယခုအချိန်ထိ နေအိမ်သို့ ပြန်လည်မရောက်ရှိသေးဘဲ ပျောက်ဆုံးနေဆဲဖြစ်ကြောင်း မိသားစုဝင်များက ပြောသည်။

မိသားစုဝင်များ၏ ပြောကြားချက်အရ ပြီးခဲ့သည့် ဧပြီ ၁၈ ရက်တွင် ဟိုပုံးမြို့မရဲစခန်းမှ ရဲတပ်ဖွဲ့ဝင်များသည် တောင်ရပ်နယ်မြေ (၁) ရှိ ၎င်းတို့၏ နေအိမ်သို့ လာရောက်ကာ အစ်ကိုနှင့် ညီဖြစ်သူတို့ကို ဖမ်းဆီးခေါ်ဆောင်သွားခဲ့ကြောင်း သိရသည်။

ယင်းနောက် အစ်ကိုဖြစ်သူအား ဆက်လက် ဖမ်းဆီးထားဆဲဖြစ်ပြီး ညီဖြစ်သူ ခွန်ကျော်ရဲနိုင် (ခ) ခွန်လှကျော်ကိုမူ ဖမ်းဆီးသည့်ညတွင်ပင် ပြန်လွှတ်ပေးလိုက်ကြောင်း သိရှိရသော်လည်း ယခုအချိန်ထိ နေအိမ်သို့ ပြန်မရောက်လာသေးကြောင်း မိသားစုများနှင့် နီးစပ်သူက ဆိုသည်။

“မောင်လေးကို ပြန်လွှတ်ပေးတယ်လို့ သိရပေမယ့် အခုထိ အိမ်ပြန်မရောက်သေးသလို ဖုန်းအဆက်အသွယ်လည်း မရသေးပါဘူး။ ပြန်လွှတ်ပေးလိုက်တယ် ဆိုပေမယ့် လူက အခုထိ အိမ်မပြန်ရောက်သေးတာ မိသားစုအတွက် ပိုပြီးစိုးရိမ်စရာဖြစ်နေတယ်” ဟု မိသားစုနှင့် နီးစပ်သူတစ်ဦးက ပြောသည်။

ထို့ကြောင့် လက်ရှိတွင် မိသားစုဝင်များက ပျောက် ဆုံးနေသည့် လူငယ်အား တွေ့ရှိပါက သတင်းပေးအကြောင်းကြားပေးရန် လူမှုကွန်ရက်မှတစ်ဆင့် အကူအညီ တောင်းခံထားသည်။

ထို့ပြင် ဟိုပုံးဒေသခံရှိ လူငယ်များအား စစ်ကောင်စီတပ်နှင့် PNO နှင့် ဆက်စပ်အဖွဲ့များက ဖမ်းဆီးခေါ်ဆောင်ခြင်း၊ ငွေကြေးတောင်းခံခြင်းနှင့် ခြိမ်းခြောက်မှုများ မကြာခဏ ဖြစ်ပွားနေသည်ဟု မြို့ခံများက ဆိုသည်။

#MeKongNews
#ဟိုပုံး
#ရဲဖမ်း
#လူငယ်တစ်ဦး
#ပျောက်ဆုံး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)