မဲခေါင်၊ မေ ၁၈

ရွာငံတွင် သဲကျင်းပြိုကျမှုတစ်ခု ဖြစ်ပွားခဲ့ရာ အမျိုးသား ၂ ဦး သေဆုံးပြီး တစ်ဦး ထိခိုက်ဒဏ်ရာရရှိခဲ့ကြောင်း ဒေသတွင်း ကယ်ဆယ်ရေးအဖွဲ့များထံမှ သိရသည်။

ရှမ်းပြည်တောင်ပိုင်း၊ ဓနုကိုယ်ပိုင်အုပ်ချုပ်ခွင့်ရဒေသ၊ ရွာငံမြို့နယ်၊ ယကြီးကျေးရွာအနီးရှိ သဲတူးဖော်နေသည့် နေရာတစ်ခုတွင် ယမန်နေ့ နံနက် ၁၁ နာရီခွဲဝန်းကျင်က သဲကျင်းပြိုကျခဲ့ခြင်းဖြစ်ပြီး ကျောက်သဲ တူးဖော်နေသည့် အမျိုးသား ၃ ဦး ပိတ်မိခဲ့ကြောင်း သိရသည်။

ထို့နောက် ရွာငံမြို့နယ် မီးသတ်စခန်းမှ ရှာဖွေကယ်ဆယ်ရေး တပ်ဖွဲ့ဝင်များနှင့် ဒေသခံများ ပူးပေါင်းကာ ကယ်ဆယ်ရေးလုပ်ငန်းများ ဆောင်ရွက်ခဲ့ပြီး ပိတ်မိနေသူ ၃ ဦးအား ထုတ်ယူနိုင်ခဲ့သော်လည်း ၂ ဦးမှာ အခင်းဖြစ်နေရာတွင်ပင် သေဆုံးသွားခဲ့ကြောင်း သိရသည်။

“သဲတူးဖော်တဲ့နေရာတွေမှာ လုံခြုံမှုမရှိဘဲ အလုပ်လုပ်နေကြရတာကြောင့် အခုလို မတော်တဆမှုတွေ ဖြစ်လာတာပါ။ အခုက မိုးရာသီအစလည်းဖြစ်ပြီး မိုးအဆက်မပြတ် ရွာထားတာကြောင့် မြေသားပျော့လာပြီး ပြိုကျသွားတာ ဖြစ်ပါတယ်။ မနက် ၁၁ နာရီဝန်းကျင်မှာ မြေပြိုမှုဖြစ်ခဲ့ပြီး ညနေ ၄ နာရီခန့်မှ သေဆုံးသူ ၂ ဦး ရုပ်အလောင်းကို မီးသတ်တပ်ဖွဲ့က ရှာဖွေတွေ့ရှိခဲ့တာပါ”ဟု ဒေသခံတစ်ဦးက မဲခေါင်သို့ ပြောသည်။

ထိခိုက်ဒဏ်ရာရရှိခဲ့သည့် အမျိုးသား တစ်ဦးမှာ လက်ရှိ ပင်းတယပြည်သူ့ဆေးရုံတွင် ဆေးကုသမှု ခံယူနေပြီး ဒဏ်ရာအခြေအနေမှာ မစိုးရိမ်ရကြောင်း သိရသည်။

သေဆုံးသူ ၂ ဦး၏ ရုပ်အလောင်းများကို မြန်မာနိုင်ငံ လူမှုကယ်ဆယ်ရေးအဖွဲ့ပိုင်ယာဉ်ဖြင့် မြိုင်ကျေးရွာ တိုက်နယ်ဆေးရုံသို့ ပို့ဆောင်ပေးခဲ့ပြီး လိုအပ်သည့် ဆေးဘက်ဆိုင်ရာနှင့် ဥပဒေဆိုင်ရာ လုပ်ငန်းစဉ်များ ဆက်လက် ဆောင်ရွက်နေကြောင်း သိရသည်။

မိုးရာသီကာလအတွင်း မိုးအဆက်မပြတ် ရွာသွန်းမှုကြောင့် မြေသားပျော့လာကာ သဲကျင်းပြိုကျမှုနှင့် မြေပြိုမှုအန္တရာယ်များ မြင့်တက်လာနိုင်ကြောင်း သိရသည်။

ထို့ကြောင့် သဲနှင့် ကျောက်တူးဖော်ရေး လုပ်ငန်းခွင်များတွင် လုပ်ကိုင်နေသူများအနေဖြင့် လုံခြုံရေးအစီအမံများ ပိုမိုဂရုစိုက်ဆောင်ရွက်ရန် လိုအပ်ကြောင်း ဒေသခံများက သတိပေးထားသည်။

#MeKongNews
#ရွာငံ
#သဲကျင်းပြိုကျမှု
#အမျိုးသား
#သေဆုံး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)