မဲခေါင်၊ ဧပြီ ၃၀
အီရန်စစ်ပွဲတွင် လက်ရှိအချိန်အထိ အမေရိကန်ဒေါ်လာ ၂၅ ဘီလီယံ ကုန်ကျသွားခဲ့ပြီ ဖြစ်ကြောင်း ပဋိပက္ခနှင့်ပတ်သက်၍ ပထမဆုံးအကြိမ် တရားဝင် ထုတ်ပြန်သော စစ်စရိတ်ခန့်မှန်းချက်တွင် ပင်တဂွန်အရာရှိကြီးတစ်ဦးက ပြောကြားသည်။
ဒေါ်နယ်ထရမ့်၏ ရီပတ်ဘလီကန်များက အောက်လွှတ်တော် လူများစုနေရာကို ဆက်လက်ထိန်းသိမ်းရန် ရုန်းကန်ရဖွယ်ရှိသော သက်တမ်းဝက် ရွေးကောက်ပွဲများ ကျင်းပရန် ၆ လ ခန့်သာ လိုတော့ချိန်တွင် လူကြိုက်မများသော စစ်ပွဲကို ကုန်ကျစရိတ် နှင့် ပြည်သူလူထုအပေါ် သက်ရောက်မှုများအား ချိတ်ဆက်ရန် ကြိုးပမ်းနေသည့် ဒီမိုကရက်များက လူထုစစ်တမ်းများတွင် အသာစီးရနေသည်။
စစ်ပွဲ၏ ကုန်ကျစရိတ် အများစုကို လက်နက်ခဲယမ်းများအတွက် အသုံးပြုခဲ့ခြင်း ဖြစ်ကြောင်း ဘဏ္ဍာရေးနှင့် စာရင်းအင်းဆိုင်ရာ ကြီးကြပ်ကွပ်ကဲသူအဖြစ် တာဝန်ယူထားသည့် ဂျူးလ်ဟတ်စ်က အောက်လွှတ်တော် လက်နက်ကိုင်တပ်ဖွဲ့များ ရေးရာကော်မတီအား ပြောကြားသည်။
ကုန်ကျစရိတ် ခန့်မှန်းချက်တွင် ပါဝင်သည့် အကြောင်းအရာများကို ဟတ်စ်က အသေးစိတ် မပြောခဲ့သလို ပဋိပက္ခအတွင်း ပျက်စီးခဲ့သည့် အရှေ့အလယ်ပိုင်းမှ အခြေစိုက်စခန်းများ ပြန်လည်ပြုပြင်စရိတ်ကို ထည့်တွက်ထားခြင်း ရှိ၊ မရှိ ကိုလည်း ၎င်းက မပြောခဲ့ပေ။
“အဲဒီမေးခွန်းကို ခင်ဗျားလာဖြေတာ ကျနော်တို့ ဝမ်းသာပါတယ်။ ဘာဖြစ်လို့လဲဆိုတော့ ဒီမေးခွန်းကို ကျနော်တို့ မေးနေတာ ကြာလှပြီ။ ဘယ်သူမှ လာမဖြေကြလို့ပဲ” ဟု အောက်လွှတ်တော် လက်နက်ကိုင်တပ်ဖွဲ့များရေးရာ ကော်မတီမှ ထိပ်တန်း ဒီမိုကရက်အမတ် အဒမ်စမစ်က ဟတ်စ်အား ပြောကြားသည်။
ဒေါ်လာ ၂၅ ဘီလီယံ ဘတ်ဂျက်သည် အမေရိကန်အာကာသအေဂျင်စီ နာဆာ၏ ယခုနှစ် တစ်နှစ်လုံးစာ ဘတ်ဂျက်နှင့် ညီမျှကြောင်း သိရသည်။
သို့သော် ပင်တဂွန်က ဒေါ်လာ ၂၅ ဘီလီယံ ခန့်မှန်းချက်အား မည်သို့ တွက်ချက်ခဲ့သည်ဆိုခြင်းမှာ မရှင်းလင်းပေ။
အကြောင်းမှာ စစ်ပွဲ၏ ပထမ ၆ ရက် ကုန်ကျစရိတ်တစ်ခုတည်းပင် ဒေါ်လာ ၁၁ ဒသမ ၃ ဘီလီယံ ရှိကြောင်း ထရမ့်အစိုးရက ပြီးခဲ့သည့်လအတွင်း ရိုက်တာသတင်းဌာနကို ပြောကြားခဲ့၍ ဖြစ်သည်။
အီရန်အနေဖြင့် နျူကလီးယားလက်နက် ပိုင်ဆိုင်မှုမရှိစေရေး အမေရိကန်၏ ရည်မှန်းချက်ကို ထောက်ရှုပါက ယင်းကုန်ကျစရိတ်မှာ ထိုက်တန်မှုရှိကြောင်း ကာကွယ်ရေးဝန်ကြီး ပိဟက်ဆက်က လွှတ်တော်အမတ်များအား ပြောသည်။
အေးကျော်
Ref: Reuters
#MeKongNews
#အီရန်စစ်ပွဲ
#ဒေါ်လာ
#ပင်တဂွန်
#ဖွင့်ဟ
