မဲခေါင်၊ ဧပြီ ၂၅
ရုရှားနိုင်ငံ၊ ခရက်စ်နိုဒါဒေသ၊ ကူဘန်ပြည်နယ်တက္ကသိုလ်တွင် သမ္မတပူတင်၏ မူဝါဒအရ တက္ကသိုလ် ကျောင်းသားများအား စစ်မှုထမ်းစာချုပ်ကြရန် စည်းရုံးသည့်ပွဲတစ်ခု၌ ယူကရိန်းစစ်သားတစ်ဦးသည် ဗီဒီယိုပရိုဂျက်တာအား Hack ပြီးနောက် စစ်မှုထမ်းရန် စာချုပ်သူများ အားလုံးကို သတ်ပစ်ရလိမ့်မည်ဟု ဝင်ရောက်ခြိမ်းခြောက် သတိပေးခဲ့သည်။
တက္ကသိုလ်မှ အကြီးအကဲများသည် တစ်လ ရုရှားစစ်သည် ၃ သောင်း ဆုံးရှုံးနေရသော ယူကရိန်းကျူးကျော်စစ် အတွက် နောက်ထပ်လိုအပ်သည့် တပ်သားသစ်များ ထပ်မံရရှိနိုင်ရေး စည်းရုံးမှု လုပ်ငန်းစဉ်တစ်ရပ်ကို လုပ်ဆောင်ရာတွင် စစ်မှုထမ်းကြရေး လှုံ့ဆော်ပေးနိုင်စွမ်း ရှိမည်ထင်သည့် ရုရှားစစ်သည်တစ်ဦးကို ဗီဒီယိုမှတစ်ဆင့် ဟောပြောပေးရန် ဖိတ်ကြားခဲ့သည်။
ထိုဖိတ်ကြားမှုကို ယူကရိန်းစစ်သားဘက်မှ ရုရှားစစ်သည်ယောင် ဆောင်ကာ မျက်နှာဖုံးဖြင့် ပရိုဂျက်တာမျက်နှာပြင်ပေါ် ပေါ်လာပြီးနောက် “ငါက စစ်သားတစ်ယောက်၊ ရုရှားတော့မဟုတ်ဘူး။ ယူကရိန်းစစ်သား။ ငါပြောချင်တာက ဘုရားသခင်က မင်းတို့ကို အဲဒီနေရာ မသွားစေချင်ဘူး။ ဒါပေမဲ့ မင်းတို့ စစ်မှုထမ်းစာချုပ်ခဲ့ရင် အားလုံးကို ငါသတ်ရလိမ့်မယ်။ မင်းတို့မျက်နှာတွေအားလုံးကိုလည်း မှတ်တမ်းတင်ထားပြီ။ ရှေ့တန်းစစ်မျက်နှာပြင်က ၄ နှစ်ရှိပြီ တန့်နေတုန်းပဲ။ အရိုးသားဆုံးပြောရရင် မင်းတို့ ယူကရိန်းစစ်မျက်နှာကို ရောက်လာခဲ့ရင် ငါတို့ဘက်က အားလုံးကို သုတ်သင်ရလိမ့်မယ်” ဟု ခြိမ်းခြောက် သတိပေးခဲ့သည်။
တက္ကသိုလ်မှ အကြီးအကဲများ ထိုခြိမ်းခြောက်မှုကို ဖျက်ထုတ်နိင်ရန် အစကတည်းက အသည်းအသန် ကြိုးစားခဲ့ကြသော်လည်း ယူကရိန်းစစ်သားဘက်မှ ပြောချင်သမျှ အကုန် ပြောပြီးမှသာ ခလုတ်ကို ဖြုတ်ကာ ပိတ်နိုင်ခဲ့သည်။
ရုရှားတွင် အစိုးရနှင့် မဟာမိတ် ဆန္ဒမဲကောက်ခံသည့် အဖွဲ့အစည်းဖြစ်သော FOM က နောက်ဆုံး စစ်တမ်းကောက်မှုတစ်ရပ်အား ထုတ်ပြန်ခဲ့ရာ လက်ရှိ ပူတင်အစိုးရပေါ် ထောက်ခံအားပေးသည့် မဲပေးသူ ၇၀ ရာခိုင်နှုန်းသာ ရှိတော့ပြီး ယခင်ကထက် ၅ ရာခိုင်နှုန်း ကျဆင်းသွားကြောင်း ဖော်ပြသွားခဲ့သည်။
လက်ရှိ ရုရှားနှင့် ယူကရိန်းတို့၏ ငြိမ်းချမ်းရေး ဆွေးနွေးမှုသည်လည်း အီရန်နှင့် ဖြစ်ပွားနေသော စစ်ပွဲကြောင့် အမေရိကန်သမ္မတ ဒေါ်နယ်ထရမ့် အလုပ်များနေသဖြင့် ရှေ့ဆက်မတိုးနိုင်ဘဲ တိုက်ခိုက်မှုများ ဆက်လက် တည်ရှိနေသည်။
ကိုကလင်း
Ref:thesun
#MeKongNews
#ရုရှားတက္ကသိုလ်
#စစ်မှုထမ်း
#ယူကရိန်းစစ်သား
#ခြိမ်းခြောက်သွား
