မဲခေါင်၊ ဧပြီ ၈
ဟောမုဇ်ရေလက်ကြားအတွင်း အီရန်နိုင်ငံ၏ တိုက်ခိုက်ခြင်းကို ခံခဲ့ရသည့် Mayuree Naree ထိုင်းကုန်တင်သင်္ဘော မူယူရီးနာရီး ပေါ်ပါရှိသော ထိုင်းသင်္ဘောသား ၃ ဦးစလုံး သေဆုံးသွားပြီ ဖြစ်ကြောင်း ဒုတိယဝန်ကြီးချုပ်နှင့် နိုင်ငံခြားရေးဝန်ကြီးဖြစ်သူ သီဟာဆက်ဖောက်ကတ်ကောက အင်္ဂါနေ့တွင် အတည်ပြုပြောကြားလိုက်သည်။
သေဆုံးသူများ၏ မိသားစုဝင်များနှင့် ထပ်တူ ဝမ်းနည်းကြေကွဲရကြောင်းနှင့် ယခုဖြစ်ရပ်သည် လွန်တရာ ဝမ်းနည်းတုန်လှုပ်ဖွယ်ကောင်းသော ဆုံးရှုံးမှုဖြစ်ကြောင်း နိုင်ငံခြားရေးဝန်ကြီးဌာနတွင် ပြုလုပ်သည့် သတင်းစာရှင်းလင်းပွဲ၌ ဝန်ကြီးက ထည့်သွင်းပြောဆိုခဲ့သည်။
သီဟာဆက်သည် အိုမန်နိုင်ငံခြားရေးဝန်ကြီး၏ ဖိတ်ကြားချက်အရ လာမည့် ဧပြီ ၁၅ ရက်မှ ၁၆ ရက်အထိ အိုမန်နိုင်ငံသို့ သွားရောက်ရန် စီစဉ်ထားပြီး၊ ယင်းခရီးစဉ်အတွင်း ထိုင်းသင်္ဘောသားများအား ကူညီပေးခဲ့သည့် အိုမန်အစိုးရကို ထိုင်းနိုင်ငံကိုယ်စား ကျေးဇူးတင်စကား ပြောကြားသွားမည်ဖြစ်သည်။
ထို့ပြင် ဟောမုဇ်ရေလက်ကြားကို ပူးတွဲထိန်းချုပ်ထားသည့် အိုမန်နှင့် အီရန်နိုင်ငံတို့အကြား ရေကြောင်းသွားလာမှု စီမံခန့်ခွဲရေး၊ လုံခြုံရေးနှင့် ငြိမ်းချမ်းစွာ ကုန်သွယ်ကူးသန်းနိုင်ရေးအတွက် ဆွေးနွေးနေမှုများကိုလည်း ထိုင်းအစိုးရက အနီးကပ် စောင့်ကြည့်လျက်ရှိကြောင်း ၎င်းက ဆက်လက် ပြောကြားခဲ့သည်။
ဆွေးနွေးပွဲများမှ တိုးတက်မှုများ ရရှိလာမည်ဟု ထိုင်းနိုင်ငံက မျှော်လင့်ထားကြောင်းနှင့် သတင်းများအရ သိရသည့် ၂ ပတ်ကြာ အပစ်အခတ်ရပ်စဲရေး ကာလအတွင်း ရေလက်ကြား၌ ပိတ်မိနေသော သင်္ဘောများ ဖြတ်သန်းသွားလာနိုင်မည့် အခွင့်အလမ်း ရှိနိုင်ကြောင်း ၎င်းက မှတ်ချက်ပြုခဲ့သည်။
လက်ရှိတွင် ထိုင်းသင်္ဘောတစ်စီးမှာ ယင်းဧရိယာမှ ထွက်ခွာနိုင်ခဲ့ပြီ ဖြစ်သော်လည်း အရေးကြီးသည့် ဓာတ်မြေသြဇာများ တင်ဆောင်လာသော သင်္ဘောတစ်စီး အပါအဝင် အခြားထိုင်းသင်္ဘော ၉ စီးမှာမူ ဖြတ်သန်းခွင့်ရရှိရန် စောင့်ဆိုင်းနေဆဲဖြစ်သည်။
ယင်းအပစ်အခတ်ရပ်စဲရေး ကာလအတွင်း ကျန်ရှိနေသေးသော ထိုင်းသင်္ဘောများ ဟောမုဇ်ရေလက်ကြားကို ဘေးကင်းစွာ ဖြတ်သန်းနိုင်ရေးအတွက် အီရန်နိုင်ငံနှင့် ညှိနှိုင်းဆောင်ရွက်ပေးရန် အိုမန်နိုင်ငံ၏ အကူအညီကို ထိုင်းနိုင်ငံအနေဖြင့် တောင်းခံသွားမည် ဖြစ်ကြောင်း ပြောကြားခဲ့သည်။
Ref: Khaosod
#MeKongNews
#ဟောမုဇ်ရေလက်ကြား
#ထိုင်းရေယာဉ်
#ပျောက်ဆုံး
#သင်္ဘောသား
#သေဆုံး
