မဲခေါင်၊ ဧပြီ ၁
ရှမ်းပြည်တောင်ပိုင်း၊ ပင်လောင်းမြို့နယ်တွင် ယခုနှစ်အတွင်း နှင်းရိုက်မှုကြောင့် အဖြူရောင် ပြောင်းလဲသွားသော ငရုတ်သီးများကို ပွဲစားများက တစ်ပိဿာ ၃ ထောင်ကျပ်ဖြင့် ဝယ်ယူနေကြောင်း ဒေသခံ တောင်သူများထံမှ သိရသည်။
ယခင်နှစ်များတွင် နှင်းရည်ထိပြီး အရည်အသွေး ကျဆင်းသွားသော ငရုတ်သီးများကို ဈေးကွက်မှ လက်မခံဘဲ စွန့်ပစ်ရသည့် အခြေအနေများ ရှိခဲ့သော်လည်း ယခုနှစ်တွင် ထူးခြားစွာ ဝယ်ယူမှုများ ပေါ်ပေါက်လာခဲ့ခြင်း ဖြစ်သည်။
“အရင်နှစ်တွေမှာ ဒီလို အဖြူရောင်ဖြစ်သွားရင် မရောင်းနိုင်ဘူး။ ဒီနှစ်တော့ အဖြူရောင်ဖြစ်လည်း ဈေးသတ်မှတ်ပြီး ဝယ်နေကြတာကြောင့် ပျက်စီးသီးနှံတောင် ဝင်ငွေပြန်ရလာတယ်။ အလေအလွင့် မဖြစ်ရတော့ဘူးပေါ့” ဟု တောင်သူတစ်ဦးက မဲခေါင်သို့ ပြောသည်။
ယခုနှစ်တွင် ငရုတ်သီးထွက်နှုန်း လျော့နည်းခြင်းနှင့် ဈေးကွက်လိုအပ်ချက် မြင့်တက်လာခြင်းတို့ကြောင့် အရည်အသွေးနိမ့် သီးနှံများပါ ဝယ်ယူမှုရှိလာခြင်း ဖြစ်ကြောင်း ငရုတ်ကုန်သည်များက ပြောသည်။
“ဒီနှစ်မှာ ငရုတ်သီးထွက်နှုန်း လျော့နည်းလာပြီး ဈေးကွက်လိုအပ်ချက်လည်း တက်လာတာကြောင့် အရည်အသွေး နည်းနည်းကျသွားတဲ့ သီးနှံတွေပါ ဝယ်ယူလာတာပါ။ အဖြူရောင်ဖြစ်သွားတဲ့ ငရုတ်သီးတွေလည်း အရောင်တော့ မလှပေမယ့် အပူအရှိန်အရသာ မလျော့တာကြောင့် စက်မှုလုပ်ငန်းတွေမှာ သုံးလို့ရပါတယ်၊ ပြီးရင် ခြောက်ပြီး ငရုတ်သီးမှုန့် လုပ်နိုင်တယ်။ တောင်သူတွေဘက်ကလည်း အရင်လို မစွန့်ပစ်တော့ဘဲ ဝင်ငွေတစ်စိတ်တစ်ပိုင်း ပြန်ရလာတာက ကောင်းတဲ့ အရာတစ်ခုပါ” ဟု အောင်ပန်းရှိ ငရုတ်ပွဲစားတစ်ဦးက မဲခေါင်သို့ ပြောသည်။
ယခုကဲ့သို့ ပျက်စီးသီးနှံများပါ ဈေးကွက်ဝင်လာနိုင်ခြင်းသည် ဒေသခံတောင်သူများအတွက် ဝင်ငွေ အခွင့်အလမ်းတစ်ရပ်အဖြစ် အကျိုးရှိလာခဲ့ကြောင်း သိရသည်။
သို့ရာတွင် ရာသီဥတု ပြောင်းလဲလာမှုကြောင့် နှင်းရိုက်ပြီး သီးနှံပျက်စီးမှုများ ဆက်လက်ဖြစ်ပေါ်နိုင်သဖြင့် အနာဂတ်တွင် ထိုကဲ့သို့သော ထိခိုက်မှုများ လျော့နည်းစေရန် စိုက်ပျိုးနည်းလမ်းများကို အထောက်အကူပြုစေမည် သင်တန်းများ၊ ပညာပေးအစီစဉ်များ လိုအပ်ကြောင်းလည်း တောင်သူများက ထောက်ပြကြသည်။
လက်ရှိတွင် အရည်အသွေးကောင်းသော အနီရောင် ငရုတ်သီးများမှာ တစ်ပိဿာ ၁၅၀၀၀ မှ ၁၈၀၀၀ အထိ ရရှိကြောင်း အောင်ပန်း ကုန်စည်ရောင်းဝယ်သူများထံမှ သိရသည်။
#MeKongNews
#ထွက်နှုန်းကျ
#နှင်းရိုက်
#ပင်လောင်းငရုတ်
#ဈေးကွက်ဝင်
