မဲခေါင်၊ မတ် ၁၄

ရှမ်းပြည်အရှေ့ပိုင်း၊ တာချီလိတ်မြို့တွင် စက်သုံးဆီဈေးနှုန်းများသည် မတ်လ ၂ ရက်မှစ၍ လက်ရှိတွင် တစ်လီတာလျှင် ထိုင်းဘတ်ငွေ ၁၀ ဘတ်ကျော်အထိ မြင့်တက်လာကြောင်း စက်သုံးဆီ တင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီ၏ ထုတ်ပြန်ချက်များအရ သိရသည်။

ပြီးခဲ့သည့် မတ် ၂ ရက်က တာချီလိတ်မြို့နယ်အတွင်းရှိ စက်သုံးဆီဆိုင်များတွင် ဓာတ်ဆီ 92 တစ်လီတာလျှင် ၂၅ ဘတ် (၃၁၅၀ ကျပ်)၊ ဓာတ်ဆီ 95 တစ်လီတာလျှင် ၂၆ ဘတ် (၃၂၇၆ ကျပ်) နှင့် ဒီဇယ်တစ်လီတာလျှင် ၂၆ ဘတ် (၃၂၇၆ ကျပ်) သာ ရှိခဲ့သော်လည်း၊ ယမန်နေ့ မတ် ၁၃ ရက်မှစ၍ ဓာတ်ဆီ 92 တစ်လီတာလျှင် ၃၈ ဘတ်၊ ဓာတ်ဆီ 95 တစ်လီတာလျှင် ၃၉ ဘတ်နှင့် ဒီဇယ်တစ်လီတာလျှင် ၄၅ ဘတ်အထိ ဈေးနှုန်းများ မြင့်တက်လာခြင်းဖြစ်သည်။

ယင်းသို့ ဈေးနှုန်း ပြောင်းလဲမှုကြောင့် ပြည်မပိုင်းရှိ ရည်ညွှန်းဈေးနှုန်းများအရလည်း ဓာတ်ဆီတစ်လီတာ ၃၀၅ ကျပ်နှင့် ဒီဇယ်တစ်လီတာ ၆၀၀ ကျပ်ခန့် မြင့်တက်လာခဲ့သည်။

“ဆီဆိုင်က လိုသလောက်မရဘူး။ ပြီးတော့ ဆီတန်းစီဖို့လည်း အချိန်မပေးနိုင်တော့ အပြင်ဆိုင်တွေကပဲ ဝယ်ထည့်ရတယ်။ အပြင်မှာတော့ တစ်လီတာကို ဘတ် ၁၀၀ (မြန်မာငွေ ၁၂၀၀၀ ကျပ်ကျော်) အထိ ပေးဝယ်နေရတယ်” ဟု တာချီလိတ်မြို့၊ မကာဟိုခမ်းရပ်ကွက်နေသူတစ်ဦးက မဲခေါင်သို့ ပြောသည်။

တာချီလိတ်ဘက်မှ လာသည့် ထိုင်းစက်သုံးဆီကိုသာ အဓိကအားထားနေရသည့် မိုင်းဆတ်၊ ကျိုင်းတုံနှင့် မိုင်းတုံမြို့များတွင်လည်း ယနေ့တွင် ဆီတစ်လီတာလျှင် ပျမ်းမျှတစ်ဆကျော်စီ မြင့်တက်လာကြောင်း သိရသည်။

တာချီလိတ်တွင် ယခင်က တစ်လီတာလျှင် ၃၅၀၀ ကျပ်သာရှိခဲ့သော်လည်း ယခုအခါ ၈၀၀၀ ကျပ်အထိ ပေါက်ဈေးရှိနေသည်။

ထိုင်းနိုင်ငံမှ မြန်မာနှင့် လာအိုနိုင်ငံများသို့ စက်သုံးဆီ ရောင်းချပေးနေသည်ဆိုသော်လည်း လိုသလောက်မရဘဲ ဈေးနှုန်းများ ဆက်တိုက် မြင့်တက်နေခြင်းမှာ ဆီအလုံအလောက် မရရှိသည့် လက္ခဏာဖြစ်သည်ဟု ရှမ်းပြည်အရှေ့ပိုင်း ဒေသခံများက သုံးသပ်နေကြသည်။

စစ်ကောင်စီကမူ မြန်မာနိုင်ငံတွင် ရက် ၄၀ စာ ဆီအလုံအလောက်ရှိနေပြီး ဆီတင်သင်္ဘောများ ဆက်တိုက် ဝင်ရောက်နေသည်ဟု ဆိုနေသော်လည်း မြေပြင်တွင် ဆီဈေးများ မြင့်တက်နေမှုအပေါ် ပြည်သူများက ဝေဖန်လျက်ရှိသည်။

ထို့ပြင် စစ်ကောင်စီက စက်သုံးဆီလျှော့ချရေး ခေါင်းစဉ်ဖြင့် ယာဉ်နံပါတ် စုံ/မ ခွဲခြား၍ ဆီဖြည့်ခိုင်းခြင်း၊ QR Code စနစ်ဖြင့်သာ ရောင်းချခြင်းများ ပြုလုပ်နေမှုကြောင့် အခြေခံလူတန်းစားများအတွက် ပိုမိုကျပ်တည်းစေသည်ဟု လူထုက ပြစ်တင်ရှုတ်ချနေကြသည်။

လက်ရှိတွင် အရှေ့အလယ်ပိုင်း စစ်ပွဲများကြောင့် ရေနံအကျပ်အတည်း ဖြစ်ပေါ်နေပြီး ကမ္ဘာ့ရေနံဈေးနှုန်းများမှာလည်း ဆက်တိုက် မြင့်တက်နေဆဲ ဖြစ်သည်။

#MeKongNews
#တာချီလိတ်
#စက်သုံးဆီအကျပ်အတည်း
#ထိုင်းဘတ်
#ဈေးခုန်တက်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)