အယ်ဒီတာ့အာဘော်

စစ်ကောင်စီ၏ စက်သုံးဆီကြီးကြပ်စစ်ဆေးရေးကော်မတီသည် ရန်ကုန်၊ မန္တလေး၊ နေပြည်တော်နှင့် တောင်ကြီးမြို့ကြီးများတွင် စက်သုံးဆီဝယ်ယူမှုကို App နှင့် Barcode စနစ်ဖြင့် ကန့်သတ်ရန် မတ်လ ၁၂ ရက်မှစတင်၍ စမ်းသပ်လုပ်ဆောင်နေပြီဖြစ်သည်။ တစ်ရက်လျှင် တစ်ကြိမ်ထက်ပို၍ မဝယ်နိုင်စေရန် တားမြစ်ခြင်းသည် စက်သုံးဆီ ပြတ်လပ်မှုကို ဖြေရှင်းရန် ကြိုးပမ်းခြင်းဟု ဆိုသော်လည်း လက်တွေ့တွင်မူ ဤစနစ်သည် အခြေခံလူတန်းစားများကို အကျပ်အတည်းတွင်းသို့ ပိုမိုတွန်းပို့လိုက်ခြင်းပင် ဖြစ်သည်။

ဤစနစ်၏ အကြီးမားဆုံးသော အားနည်းချက်နှင့် ဘေးထွက်ဆိုးကျိုးမှာ “ဝှီးတက် (Wheel Tax)” သို့မဟုတ် “ယာဉ်လိုင်စင်” ရှိမှသာ ဆီဝယ်ယူခွင့်ရမည်ဆိုသည့် အချက်ဖြစ်သည်။ မြန်မာနိုင်ငံ၏ လက်ရှိစီးပွားရေး အခြေအနေအရ တောင်ကြီးကဲ့သို့သော မြို့ကြီးများအပါအဝင် နိုင်ငံတစ်ဝှမ်းရှိ အခြေခံလူတန်းစား အများစုမှာ လိုင်စင်ရှိသော ဆိုင်ကယ်များကို ဈေးကြီးပေး၍ မဝယ်ယူနိုင်ကြပေ။ ဝမ်းရေးအတွက် လိုင်စင်မဲ့ ဆိုင်ကယ်များကိုသာ အားကိုး၍ အလုပ်လုပ်နေရသူများ ဖြစ်သည်။

ယခုစနစ်အရ လိုင်စင်မဲ့ယာဉ် စီးနင်းသူများသည် စက်သုံးဆီ အရောင်းဆိုင်များတွင် တရားဝင်ဝယ်ယူခွင့် ဆုံးရှုံးသွားတော့မည် ဖြစ်သည်။ ထိုအခါ သူတို့အတွက် တစ်ခုတည်းသော ထွက်ပေါက်မှာ “ပြင်ပမှောင်ခိုဈေးကွက်” သာ ဖြစ်လာမည်။ လက်ရှိတွင်ပင် မှောင်ခိုဆိုင်များ၌ စက်သုံးဆီဈေးသည် တရားဝင်ဆိုင်ထက် ၃၀ ရာခိုင်နှုန်းမှ ၅၀ ရာခိုင်နှုန်းအထိ ပိုမိုမြင့်မားနေပြီးဖြစ်ရာ ယခုကဲ့သို့ ကန့်သတ်ချက်များကြောင့် မှောင်ခိုဈေးသည် ယခုထက် နှစ်ဆ၊ သုံးဆ ပိုမိုခုန်တက်သွားရန်သာ ရှိသည်။

အကျိုးဆက်အနေဖြင့် ဆိုင်ကယ်ဖြင့် ကုန်စည်ပို့ဆောင်သူများ၊ အငှားယာဉ်မောင်းသူများ၊ နေ့စားအလုပ်သမားများ၏ သွားလာစရိတ်သည် မတရား မြင့်တက်လာမည်ဖြစ်သည်။ ဤသည်မှာ လူနည်းစုသော လူချမ်းသာများအတွက် ပြဿနာမဟုတ်သော်လည်း နေ့စဉ်ဝင်ငွေပေါ်တွင်သာ ရပ်တည်နေရသည့် အခြေခံလူတန်းစားများအတွက်မူ ထမင်းအိုးကို ရိုက်ခွဲလိုက်ခြင်းနှင့် အတူတူပင်ဖြစ်သည်။

အာဏာပိုင်များအနေဖြင့် စက်သုံးဆီ ပြတ်လပ်မှုနှင့် ခိုးထုတ်မှုများကို တားဆီးချင်သည်ဆိုပါက ဆီတင်သွင်းမှုနှင့် ဖြန့်ဖြူးမှုအပိုင်း၌ရှိသော အကျင့်ပျက်ခြစားမှုများကိုသာ အဓိက ကိုင်တွယ်သင့်သည်။

ယခုကဲ့သို့ နည်းပညာကို အသုံးချကာ သာမန်ပြည်သူများ၏ လိုအပ်ချက်ကို ဖိနှိပ်ချုပ်ချယ်ခြင်းသည် ပြဿနာကို ဖြေရှင်းခြင်းမဟုတ်ဘဲ “မှောင်ခိုဈေးကွက်” ကို အားပေးအားမြှောက်ပြုကာ ပြည်သူကို ပိုမိုဆင်းရဲတွင်းနက်စေခြင်းသာ ဖြစ်သည်။

နည်းပညာဆိုသည်မှာ ပြည်သူ့ဘဝ သက်သာချောင်ချိရေးအတွက်သာ ဖြစ်သင့်ပြီး ပြည်သူကို ဒုက္ခပေးရန် မဖြစ်သင့်ပေ။

အကယ်၍ စစ်ကောင်စီအနေဖြင့် ဤစနစ်ကို ဇွတ်အတင်း ဆက်လက်ကျင့်သုံးနေပါက မြို့ပြနေ အခြေခံလူတန်းစားများ၏ မကျေနပ်မှုနှင့် အကျပ်အတည်းသည် ပိုမိုဆိုးရွာမည်ဖြစ်ပေသည်။

#MeKongNews
#စက်သုံးဆီ
#အယ်ဒီတာ့အာဘော်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)