မဲခေါင်၊ မတ် ၁၀
အမေရိကန်နှင့် အစ္စရေးတို့ လေကြောင်းတိုက်ခိုက်မှုများ အီရန်အပေါ် တစ်ပတ်ကျော်ကြာ အဆက်မပြတ် တိုက်ခိုက်မှုအတွင်း အီရန်အာဏာရှင်များ ချေမှုန်းခံရပြီးဖြစ်သော်လည်း နျူကလီးယားဘန်ကာများအောက်တွင် ရှိနေသေးသော ယူရေနီယံများကို ပြန်လည်ရယူရန် အီရန်က ကြိုးစားနေချိန် အမေရိကန် သမ္မတဒေါ်နယ်ထရမ့်ကလည်း ယူရေနီယံများ ရယူရေး အထူးကွန်မန်ဒိုများကို မြေပြင်စစ်ဆင်ရေး စေလွှတ်ရန် တွက်ဆနေကြောင်း သိရသည်။
ယမန်နှစ်က ၁၂ ရက် စစ်ပွဲအတွင်း အမေရိကန် B -2 ဗုံးကြဲလေယာဉ်များဖြင့် အီရန်၏ အရေးအပါဆုံး နျူကလီးယားစခန်းများ ဖြစ်သော အစ္စဖာဟန်၊ နာတန့်ဇ် နှင့် ဖော်ဒေါင်း နေရာများသို့ မြေအောက်ဘန်ကာခွင်းဗုံးများ ကြဲချဖျက်ဆီးခဲ့သည်။
သို့သော် မကြာသေးမီက ဂြိုဟ်တုဓာတ်ပုံများတွင် အီရန်သည် ဖျက်ဆီးခံ နျူကလီးယားဆိုက်များကို ဖောက်မမြင်နိုင်စေသည့် အမိုးများဖြင့် ပြန်ဖုံးကွယ်နေကာ အဏုမြူဗုံးများထုတ်နိုင်စေမည့် ယူရေနီယံ အဆင့်မြှင့်တင်မှုများ ဆက်လက်လုပ်နေဖွယ်ရှိသည်ကို သတိပြုမိခဲ့ကြသည်။
CIA အပါအဝင် အမေရိကန်ထောက်လှမ်းရေးရင်း မြစ်များက အီရန် နျူကလီးယားဆိုက် အပျက်အစီးပုံများအောက်တွင် ၆၀ ရာခိုင်နှုန်းသန့်စင်ပြီးသော ယူရေနီယံ ၄၅၀ ကီလိုဂရမ်ရှိနေသေးကာ ထိုယူရေနီယံ အဆင့်ကို ၉၀ ရာခိုင်နှုန်းအထိ အဆင့်မြှင့်တင်မှု လုပ်ငန်းစဉ်သည် ရက် သတ္တပတ်အနည်းငယ်သာ အချိန်ယူရမည်ဖြစ်ကာ ထိုအဆင့်ရောက်လျှင် အီရန်သည် အဏုမြူဗုံး ၁၁ လုံး ထုတ်လုပ်ကာ ကမ္ဘာကို ဒုက္ခပေးနိုင်မည်ဟု ယုံကြည်နေကြသည်။
ထို့ကြောင့် ဒေါ်နယ်ထရမ့်က Air Force One လေယာဉ်ပေါ်မှတစ်ဆင့် မြေပြင်ယှဉ်ပြိုင်တိုက်ခိုက်နိုင်စွမ်း မရှိသော အီရန်ကို နျူကလီးယားလက်နက်ပေးလိုက်ပါက အန္တရာယ်ကြီးသွားမည်ဖြစ်ခြင်းကြောင့် မည်သည့်အခါတွင်မှ နျူကလီးယားလက်နက်ပိုင်ဆိုင်ခွင့် မပြုနိုင်ကြောင်း၊ ချက်ချင်းမဟုတ်စေကာမူ မကြာမီ အမေရိကန် ထိပ်တန်းစစ်သည်များကို အီရန်နျူကလီးယားဆိုက်များသို့ စေလွှတ်မှုမျိုးရှိလာနိုင်ကြောင်း ပြောဆိုခဲ့သည်။
ထို့ပြင် အီရန်အာဏာရှင်များ လက်ရှိတွင် စစ်ပွဲကြောင့် အသက်လုနေရချိန် ယူရေနီယံများကိုလည်း သယ်ထုတ်လိုနေကြောင်း၊ အမေရိကန်ဘက်မှ လုပ်ဆောင်နိုင်စရာ ၂ ခုမှာ ယင်းယူရေနီယံများကို သွားသယ်ယူမည်လား၊ သို့မဟုတ် လက်နက်အဆင့် မရောက်ရှိစေရန် ဖျက်ဆီးပစ်မည်လားဆိုသည့် ၂ လမ်းဖြစ်ကာ သမ္မတနှင့် CIA တို့၏ ဆုံးဖြတ်ချက်အပေါ်တွင် မူတည်သည်ဟု အမေရိကန်အစိုးရအဖွဲ့ အကြီးအကဲတစ်ဦးကလည်း Axios မီဒီယာသို့ ပြောသည်။
ကိုကလင်း
Ref:Thesun
#MeKongNews
#အီရန်
#နျူစခန်းများ
#ယူရေနီယံ
#ကွန်မန်ဒို
#စေလွှတ်ရေး
#ထရမ့်
