မဲခေါင်၊ မတ် ၅

ရှမ်းပြည်တောင်ပိုင်း၊ တောင်ကြီးမြို့တွင် အခြေခံစားသောက်ကုန်နှင့် ဆေးဝါးများ ပြတ်လပ်နိုင်သည်ဟူသော စိုးရိမ်မှုများ မြင့်တက်လာသဖြင့် ဒေသခံများက ဝယ်ယူစုဆောင်းမှုများ ပြုလုပ်နေကြသဖြင့် ကုန်ဈေးနှုန်းများ ဆက်လက် မြင့်တက်နေကြောင်း သိရသည်။

မြို့အတွင်း ဈေးကွက်များတွင် ဆန်၊ ဆီ၊ အခြေခံ စား သောက်ကုန်များအပြင် ဆေးဝါးအချို့ပါ ရှားပါးလာနေကြောင်း ပြောကြားမှုများရှိပြီး လက်လီဈေးနှုန်းများလည်း တစ်ရက်ထက်တစ်ရက် ပြောင်းလဲမြင့်တက်နေသည်ဟု ကုန်သည်များက ဆိုသည်။

“နယ်စပ်ဘက်က ပစ္စည်းဝင်တာ မသေချာတော့ လူတွေက ကြိုတင်ဝယ်ထားကြတာ များလာတယ်။ အဲဒီလို ဝယ်ယူ စုဆောင်းမှုများလာတော့ ဈေးက ပိုတက်သွားတယ်”ဟု မြို့ခံတစ်ဦးက မဲခေါင်သို့ ပြောသည်။

ထိုင်း – မြန်မာ နယ်စပ်ကုန်သွယ်ရေးလမ်းကြောင်း တစ်လျှောက်ရှိ စစ်ဆေးရေးဂိတ်များတွင် ကုန်စည်များကို အကြောင်းအမျိုးမျိုးပြကာ ဖမ်းဆီးခြင်း၊ ကန့်သတ်ခြင်းများ ပြုလုပ်နေကြောင်း သိရပြီး ယင်းအခြေအနေကြောင့် ကုန်သည်များအနေဖြင့် ပစ္စည်းအသစ်များ ထပ်မံတင်သွင်းရန် ခက်ခဲနေကြသည်။

လက်ရှိ ဈေးကွက်အတွင်းရှိ ပစ္စည်းလက်ကျန်များလည်း လျော့နည်းလာနေကြောင်း သိရသည်။

“လမ်းကြောင်းတွေမှာ စစ်ဆေးမှုတင်းကျပ်လာတော့ ကုန်သည်တွေက အန္တရာယ်ရှိလို့ မတင်ရဲတော့ဘူး။ အထဲမှာတော့ ဆေးတွေနဲ့ စားသောက်ကုန်တွေ ပြတ်လပ်မယ့် အခြေအနေကို စိုးရိမ်နေရတယ်” ဟု ၄င်းက ဆက်ပြောသည်။

ကုန်စည်ပြတ်လပ်နိုင်ခြေ၊ လမ်းကြောင်း ကန့်သတ်မှုများနှင့် ဝယ်ယူစုဆောင်းမှုများ တပြိုင်နက် ဖြစ်ပေါ်လာမှုကြောင့် တောင်ကြီးမြို့ရှိ ဈေးကွက်အခြေအနေမှာ မတည်ငြိမ်သေးဘဲ ကုန်ဈေးနှုန်းများ ဆက်လက်မြင့်တက်နိုင်ကြောင်း ကုန်သည်များက ခန့်မှန်းထားသည်။

#MeKongNews
#တောင်ကြီး
#ကုန်ပြတ်လပ်
#စိုးရိမ်မှု
#ကုန်ဈေးနှုန်း
#မြင့်တက်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)