မဲခေါင်၊ ဇန်နဝါရီ ၆
ရှမ်းပြည်တောင်ပိုင်း၊ တောင်ကြီးမြို့၊ ကျောက်တိုင်ကွင်း ပတ်လည်ရှိ တိုက်ခန်းနှင့် ဆိုင်ခန်းများကို အမြန်ဖယ်ရှား ရှင်းလင်းမည် ဖြစ်ကြောင်း ဇန်နဝါရီ ၅ ရက်တွင် ရှမ်းပြည်အစိုးရအဖွဲ့က စာပို့အသိပေးလာကြောင်း သတင်း ရင်းမြစ်များထံမှ သိရသည်။
ကျောက်တိုင်ကွင်း ပတ်လည်တွင် ဆောက်ထားသည့် ဆိုင်ခန်းနှင့် တိုက်ခန်းများ နေရာတွင် နိုင်ငံတကာ အဆင့်မီ အားကစားကွင်း၊ အားကစားရုံနှင့် ရေကူးကန်၊ လူငယ်ရေးရာ စင်တာများ ဆောက်လုပ်ရန် ဖယ်ရှားခိုင်းခြင်း ဖြစ်ပြီး ငှားရမ်းထားသော စာချုပ်များကိုလည်း ရပ်စဲလိုက်ကာ အမြန်ဆုံး ဖယ်ရှား ရှင်းလင်းရန်လည်း ဒုတိယအကြိမ် အသိပေးကြောင်း သိရသည်။
“နေလို့ လုံးဝ မရတော့ဘူး။ အသနားခံစာ တင်လို့လည်း မရဘူး။ တကယ်လို့ မဖယ်ပေးရင် ဘူဒိုဇာနဲ့ လာဖျက်မယ်လို့လည်း ပြောတယ်။ တချို့ကျတော့ ပစ္စည်းရွှေ့နေပြီ။ တချို့ကျတော့ ဒီမှာနေတာ ကြာပြီဆိုတော့ မရွှေ့နိုင်ကြ သေးဘူး။ ရွှေ့ဖို့လည်း မလွယ်တော့ဘူးလေ”ဟု ဆိုင်ခန်း ပိုင်ရှင်တစ်ဦးက မဲခေါင်သို့ ပြောသည်။
ထိုသို့ တိုက်ခန်းများ၊ ဆိုင်ခန်းများကို ဖယ်ရှားခိုင်းမှုကြောင့် တိုက်ခန်းတွင် ငှားရမ်း နေထိုင်သူများနှင့် တိုက်ခန်း ဝယ်ယူထားသူများ အခက်ကြုံနေရပြီး နေရာသစ် ထပ်မံ ငှားရမ်းရန် ငွေကြေးအခက်ခဲ ဖြစ်နေကြောင်း ၎င်းက ဆိုသည်။
ယင်းဘောလုံးကွင်း ဘေးပတ်လည်တွင် ဆိုင်ခန်း၊ တိုက်ခန်းပေါင်း ၂၀၀ ကျော်ပြီး အများစုသည် ဆိုင်ကယ် အပို ပစ္စည်းဆိုင်နှင့် ပုံနှိပ်ဆိုင်များ ရှိကြောင်း ၎င်းက ပြောသည်။
ပြီးခဲ့သည့် ၂၀၂၄ ခုနှစ်နှင့် ၂၀၂၅ ခုနှစ်တွင်လည်း ကျောင်းကြီးစု ရပ်ကွက်ရှိ ရှမ်းရိုးမတိုက်တန်းနှင့် တပ်ပိုင် မြေပေါ်ရှိ ဆောက်လုပ်ထားသည့် အဆောက်အအုံနှင့် ဆိုင်ခန်းများကို စစ်ကောင်စီက ဘူဒိုဇာများဖြင့် ထိုးပြီး ရှင်းလင်းခဲ့သေးကြောင်း သိရသည်။
#MeKongNews
#တောင်ကြီး
#ကျောက်တိုင်ကွင်း
#ဆိုင်ခန်း
#အမြန်ဖယ်ခိုင်း
