မဲခေါင်၊ ဇန်နဝါရီ ၃
စစ်ကောင်စီကျင်းပသည့် ရွေးကောက်ပွဲ မဲပေးသည့်ရက်၌ လုံခြုံရေးစောင့်ပေးသော တပ်သားများအတွက်ဟုဆိုကာ ပအိုဝ်းပြည်သူ့စစ် – PNO က တောင်ကြီးမြို့နယ်၊ ထီဖောင်းကျေးရွာအုပ်စုတွင် တစ်အိမ်လျှင် ငွေငါးထောင်ငါးရာကျပ်စီ ကောက်ခံနေကြောင်း ဒေသခံများထံမှ သိရသည်။
ပြီးခဲ့သည့် ဒီဇင်ဘာ ၂၈ ရက် မဲပေးချိန်တွင် လုံခြုံရေးစောင့်ပေးခဲ့သည့် PNO တပ်သား ၁၀ ဦးအတွက်ဟုဆိုကာ ကျေးရွာအုပ်စုအတွင်းရှိ အိမ်ခြေတိုင်းကို ငွေကြေးကောက်ခံနေခြင်း ဖြစ်သည်။
“ထီဖောင်းအုပ်စုမှာ ရွာအိမ်ခြေ ၅ ထောင်ကျော်ရှိတယ်။ လုံခြုံရေးစောင့်တဲ့ စစ်သားက ၁၀ ယောက်ပဲရှိတာကို အိမ်တိုင်းဆီက ငွေလိုက်ကောက်နေတာ။ အဲလောက်အများကြီး ကောက်တာကတော့ လွန်လွန်းပါတယ်” ဟု ဒေသခံတစ်ဦးက မဲခေါင်သို့ ပြောသည်။
ယင်းသို့ ငွေကောက်ခံခြင်းကို PNO လက်အောက်ရှိ ကျေးရွာအုပ်ချုပ်ရေးမှူး၊ ရွာသူကြီးနှင့် ဆယ်အိမ်ခေါင်းများက လိုက်လံကောက်ခံပေးနေခြင်းဖြစ်ပြီး၊ ယခုတစ်ပတ်အတွင်း အပြီးအစီး ထည့်ဝင်ကြရန်လည်း ညွှန်ကြားထားကြောင်း ဒေသခံက ဆက်ပြောသည်။
စစ်ကောင်စီ၏ ရွေးကောက်ပွဲကော်မရှင်က ပြုလုပ်သည့် အပိုင်း (၁) ရွေးကောက်ပွဲတွင် တောင်ကြီး၊ ဟိုပုံးနှင့် လွိုင်လင်မြို့နယ်တို့၌ PNO ပါတီက အနိုင်ရရှိထားကြောင်း သိရသည်။
စစ်ကောင်စီက ကျင်းပနေသည့် ရွေးကောက်ပွဲ ပထမပိုင်းတွင် ရှမ်းပြည်နယ်မှ မြို့နယ် ၁၂ ခု ပါဝင်ခဲ့ပြီး၊ လာမည့် ၂၀၂၆ ခုနှစ် ဇန်နဝါရီလအတွင်း ရွေးကောက်ပွဲ ဒုတိယပိုင်းအဖြစ် (၁၇) မြို့နယ်နှင့် တတိယပိုင်းအဖြစ် (၉) မြို့နယ်တို့ကို ဆက်လက်ကျင်းပသွားမည်ဟု ကြေညာထားသည်။
#MeKongNews
#ရှမ်းတောင်
#အတုအယောင်ရွေးကောက်ပွဲ
#PNO
#ငွေကောက်ခံ
