မဲခေါင်၊ ဒီဇင်ဘာ ၅

ရှမ်းပြည်တောင်ပိုင်း၊ တောင်ကြီးမြို့နယ်၊ ကက္ကူလမ်းခွဲတွင် ၆ ဘီးကုန်ကားနှင့် ဆိုင်ကယ်တစ်စီး တိုက်မိပြီး ဆိုင်ကယ်မောင်းသူ သေဆုံးကာ နောက်မှစီးသူ တစ်ဦးလည်း ထိခိုက် ဒဏ်ရာရရှိခဲ့ကြောင်း ကယ်ဆယ်ရေးအဖွဲ့ထံမှ သိရသည်။

ဒီဇင်ဘာ ၄ ရက် ညနေ ၃ နာရီတွင် ယာဉ်တိုက်မှု ဖြစ်ပွားခဲ့ပြီး ယင်းနေရာသည် လမ်းကွေ့လည်း ဖြစ်သောကြောင့် ဆိုင်ကယ် အရှိန်မထိန်းနိုင်ဘဲ ကားကို မျက်နှာချင်းဆိုင် ဝင်တိုက်ခဲ့ကြောင်း ကယ်ဆယ်ရေးအဖွဲ့ဝင်များထံမှ သိရသည်။

“ကျွန်တော်တို့ ရောက်လာတော့ ဆိုင်ကယ်မောင်းသူက အသက် မရှိတော့ပါဘူး။ အဲဒီ လမ်းပေါ်မှာ ကား၊ ဆိုင်ကယ် မတော်တဆ ခဏခဏ ဖြစ်တယ်။ တောင်မရှည်ပေမယ့် ရုတ်တရက် ကွေ့တယ်၊ အကွေ့က ကြီးတယ်။ ဒါကြောင့် လမ်းကောင်းတိုင်းလည်း သတိ၊ ဝိရိယထားဖို့လိုတယ်။ ဖြစ်လာရင် ကိုယ်ပဲခံရတာမလို့ ဂရုစိုက် မောင်းကြပါဗျ” ဟု ကယ်ဆယ်ရေး အဖွဲ့ဝင်တစ်ဦးက မဲခေါင်သို့ ပြောသည်။

ယင်းသေဆုံးသူနှင့် ဒဏ်ရာရသူကို ကျောင်ထို၊ ထီရီး ‌ကြက်ခြေနီအဖွဲ့က စဝ်စံထွန်းဆေးရုံသို့ အရေးပေါ် ပို့ဆောင်ခဲ့ရကြောင်း ၎င်းက ဆက်ပြောသည်။

ယင်းလမ်းပါ်တွင် ယာဉ်တိုက်မှု မကြာခဏ ဖြစ်ပွားပြီး ဒေသခံများနှင့် ကျေးရွာလူကြီးများက သတိပေးစာနှင့် အမှတ်အသားများ ပြုလုပ်ပေးရန် တောင်းဆိုသော်လည်း တာဝန်ရှိသူများက မလုပ်ပေးသေးကြောင်း ဒေသခံများက ဆိုသည်။

ယင်းနေရာ၌ ယခုနှစ်အတွင်း ကားနှင့် ဆိုင်ကယ် မတော်တဆမှု (၁၀) ကြိမ်ကျော် ရှိခဲ့ပြီး သေဆုံးသူ ၇ ဦး ရှိပြီဖြစ်ကြောင်း ကယ်ဆယ်ရေးအဖွဲ့ထံမှ သိရသည်။

ပြီးခဲ့သည့် ဇူလိုင် ၁၅ ရက်တွင်လည်း တောင်ကြီး – ကက္ကူလမ်းပေါ် ပင်စုံရွာအနီးတွင် ဆန်တင်ကား ဘရိတ်ပေါက် ပြီး ဆိုင်ကယ်တစ်စီးနှင့် ချိတ်မိ၍ တိမ်းမှောက်ခဲ့ကာ ဆိုင်ကယ်ပေါ်ပါသူ နှစ်ဦးနှင့် ဆန်ကားနောက်လိုက်တို့ စုစုပေါင်းသုံးဦး ပွဲချင်းပြီး သေဆုံးခဲ့သေးသည်။

#MeKongNews
#ကက္ကူလမ်းခွဲ
#တောင်ကြီး
#ဆိုင်ကယ်တိုက်
#သေဆုံး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)